Ноби чэнджэщэгъу схуохъу

НэхъыжьыфI зиIэ нэхъыщIэфIи иIэщ.  Зи нэхъыжь едаIуэ и Iуэху мэкIуатэ. Нэхъыжь зыгъэлъапIэ щхьэ лъапIэгъуэ йохуэ…

Нэхъыжьым и пщIэм, и нэмысым, абы ди гъащIэм щиубыд увыпIэм теухуа псалъэжьхэр, жыIэгъуэхэр, псалъэ шэрыуэхэр лъэпкъым ди мащIэкъым. Дэтхэнэми купщIэшхуэ хэлъщ, гупсысэшхуэ щIэлъщ. Абыхэм я мыхьэнэм щапхъэ техъуэж Iуэхугъуэхэр ди гъащIэм щымащIэкъым. Пэжыр жыпIэмэ, цIыху псоми гъуазэ яхуэхъуа нэхъыжьыфI яIэщ. ГъащIэм и пIалъэ фIыуэ хэгъуэза нэхъыжьыфIхэрщ щIалэгъуалэм гъуэгугъэлъагъуэ яхуэхъур. Апхуэдэ зыщ зытеухуар Къэбэрдей Адыгэ Хасэм и тхьэмадэм и къуэдзэ Хъыжьрокъуэ Азэмэт и тхыгъэр.

«Лъэхъэнэ къэс иIэщ лъэпкъыр зэрыгушхуэ, абы и зыузэщIыныгъэм телэжьа цIыху цIэрыIуэхэр. Апхуэдэхэращ нэхъыбэу гъащIэм игъуэт зыужьыныгъэри зэлъытыжар. УзэплъэкIыжмэ, абы и лъэныкъуэкIэ, щапхъэ зытепх хъун нэхъыжьыфI куэд диIащ адыгэ лъэпкъым. Ноби къытхэтщ апхуэдэ цIыху щыпкъэхэр.  Абы и щапхъэщ Гуэщокъуэ Абдул-Бакъи.                                                                    

2011 гъэм ди гъунэгъум зы дадэ екIу къахуэкIуат. Ар Тыркум Iэпхъуа адыгэхэм я щIэблэ, хэхэс гъащIэр зи натIэ хъуа, иджы Хэкужьыр псэупIэ зыщIыжа Гуэщокъуэ Абдул-Бакъит. ЩIэныгъэ куу зыбгъэдэлъ, щэнхабзэ дахэ зыхэлъ дадэр зэрыслъагъуу си псэм занщIэу къыдыхьащ. Нэхъ гъунэгъуу дызэрыцIыхуа нэужь, Iуэхугъуэ куэдым сыхуиущиящ абы. Дин, щэнхабзэ IуэхухэмкIэ Iустаз схуэхъуну сыщелъэIуми, сыкъигъэщIэхъуакъым. А зэманым сэ нэмэз сщIырт си анэшхуэм сригъэсауэ, ауэ КъурIэным седжэфу щытыныр си хъуэпсапIэт. ИкIи ар къызэхъулIащ Абдул-Бакъи и фIыгъэкIэ. Дин щIэныгъэми, адыгэ лъэпкъ Iуэхухэми нэхъ куууэ сыхэгъуэзэнымкIэ ар дэIэпыкъуэгъушхуэ къысхуэхъуащ. Ноби абы и жьауэм сыщIэту, ар чэнджэщэгъу схуэхъуу сыкъокIуэкI.

Тыркум щIэныгъэ щызригъэгъуэта нэужь, Гуэщокъуэр Хэкум къэкIуэжри, узэщIакIуэу мыдрисэм щыIащ, итIанэ Ислъам университетым щригъэджащ. И ныбжьыр илъэс 70-м нэсами, Абдул-Бакъи жыджэрщ, Шууей хасэм хэтщи, щIалэхэм я пашэу зекIуэ гъуэгуанэ жыжьэхэми тоувэ.

НэхъыжьыфIым сохъуэхъу узыншагъэ быдэ иIэу, лъэпкъым хуэщхьэпэн IуэхуфIхэр илэжьу иджыри илъэс куэдкIэ къытхэтыну!»