КъБР-м курортхэмрэ туризмэмкIэ и министрым и къуэдзэ Щхьэгъэпсо Аслъэнбий яIущIащ Урыс географие зэгухьэныгъэм и ГъэзэщIакIуэ дирекцэм щIалэгъуалэм ядэлэжьэнымкIэ и департаментым и унафэщIым и къуэдзэ Кабановэ Дарье, РГО-м и къудамэу КъБР-м щыIэм и ЩIалэгъуалэ центрым и унафэщI Мокаев Тенгиз, КъегъэлакIуэхэм я Урысей зэгухьэныгъэм хэт Наурзокъуэ Назир сымэ.
Кабановэ Дарье тепсэлъыхьащ 2025 гъэм ди республикэм и щIыналъэхэм щагъэзэщIа «Шынагъуэншагъэм и щIыуэпс» щIалэгъуалэ-турист проектым щыщ Iыхьэм, апхуэдэуи щIыуэпсыр хъумэным теухуауэ ирагъэкIуэкI Iуэхухэм. Дарье и гугъу ищIащ КъБР-м щыщ сабийхэр «Мир открытий» Урыс географие зэгухьэныгъэм и профильнэ сменэхэм, «Артек», «Орленок», «Алые паруса», «Смена», «Океан» сабий центрхэм зэрагъэкIуэфынум.
Мокаев Тенгиз къытеувыIащ РГО-м и къудамэу КъБР-м щыIэм и ЩIалэгъуалэ зэщIэхъееныгъэм турист-лъахэхутэ, спорт, волонтёр проектхэмкIэ ягъэзэщIа лэжьыгъэм. Абы зэрыжиIамкIэ, Урыс географие зэгухьэныгъэм и ГъэзэщIакIуэ дирекцэм, абы и къудамэу КъБР-м щыIэм и ЩIалэгъуалэ центрым, КъБР-м Курортхэмрэ туризмэмкIэ и министерствэр ехъулIэныгъэхэр яIэу зэдолажьэ.
- Дэ ди мурадщ «ШынагъуэншагъэмкIэ еджапIэ» щIалэгъуалэ егъэджэныгъэ проектыр дгъэзэщIэну, республикэм и бгылъэ щIыпIэхэм этнографие экспедицэ щедгъэкIуэкIыну, щIыпIэ пхыдзахэм экспедицэ зыбжанэ къыщызэдгъэпэщыну, бгылъэ щIыпIэхэм дыкIуэну. Мы Iуэхухэм хэтынущ, нэхъ жыджэру къыддэлажьэхэри, нэгъуэщI къалэхэм къикIахэри. Урыс географие зэгухьэныгъэм и ГъэзэщIакIуэ дирекцэмрэ КъБР-м Курортхэмрэ туризмэмкIэ и министерствэмрэ зэпымыууэ къызэрыддэIэпыкъум, къетхьэжьэ Iуэхугъуэхэр къызэрыддащтэм папщIэ фIыщIэ яхуэсщIыну сыхуейщ, - къыхигъэщащ Мокаев Тенгиз.
Наурзокъуэ Назир жиIащ республикэм и бгылъэ щIыпIэхэм щызекIуэ туристхэмрэ гупу къакIуэ хьэщIэхэмрэ я шынагъуэншагъэр къызэгъэпэщыным мыхьэнэшхуэ зэриIэр. Илъэс къэс Къэбэрдей-Балъкъэрым зыплъыхьакIуэ къакIуэхэм я бжыгъэм зэрыхэхъуэм къыхэкIыу, туристхэм я шынагъуэншагъэм гулъытэ хэха хуэщIыныр зэрыIэмалыншэр дыщIигъуащ щIалэм.
ЗэIущIэм хэтхэр тепсэлъыхьащ дызэрыт илъэсым зэрызэдэлэжьэну я мурадхэм. Щхьэгъэпсо Аслъэнбий Урыс географие зэгухьэныгъэм и ГъэзэщIакIуэ дирекцэмрэ ЩIалэгъуалэ центрымрэ я унафэщIхэм фIыщIэ яхуищIащ жыджэру зэрылажьэм папщIэ икIи дяпэкIэ ехъулIэныгъэ яIэу зэрызекIуэнум шэч къызэрытримыхьэр жиIащ.
- Ди республикэр турист зэфIэкI и лъэныкъуэкIэ телъыджэщ. Урыс географие зэгухьэныгъэм лэжьыгъэшхуэ ирегъэкIуэкI географиемрэ абы пыщIа щIэныгъэхэмрэ хэIущIыIу щIыным, тхыдэ-щэнхабзэ щIэинхэмрэ щIыуэпс телъыджэмрэ хъумэным теухуауэ, апхуэдэуи сабийхэмрэ щIалэгъуалэмрэ лэжьыгъэшхуэ ядрегъэкIуэкI. Ди лъэныкъуэкIэ сыт щыгъуи дыхьэзырщ фи лэжьыгъэм тхузэфIэкIкIэ дыхэлIыфIыхьыну, зэгъусэу проектхэр дгъэзэщIэну», - къыхигъэщащ Щхьэгъэпсом.
