Иджыблагъэ Налшык къалэ щекIуэкIа Iэнэ хъурейм нэхъыщхьэу щытепсэлъыхьащ къэрал къулыкъущIапIэхэм, санаторэ-курорт зэгухьэныгъэхэм, хьэрычэт Iуэхум пэрытхэм, щIэныгъэлIхэм я къарур зэгъэуIуауэ, КъБР-м и санаторэ-курорт IуэхущIапIэхэр сэбэпынагъ пылъу лэжьэным пыщIа гугъуехьхэр къахутэным, ахэр гъэзэкIуэжыным.
Къызэхуэсахэм и гугъу ящIащ зыгъэпсэхупIэмрэ узыншагъэр егъэфIэкIуэнымкIэ ди щIыналъэм щыIэ IуэхущIапIэхэмрэ зегъэужьыным ехьэлIа хэкIыпIэ нэхъыщхьэхэм. Абыхэм ящыщт КъБР-м и санаторэ-курорт IэнатIэм и иджырей щытыкIэмрэ зыужьыкIэ хъунумрэ; инфраструктурэр егъэфIэкIуэныр, Iуэхутхьэбзэхэм я фIагъыр къэIэтыныр; IэщIагъэлIхэр гъэхьэзырыныр; щIыуэпс-рекреацэ зэфIэкIымрэ инновацэ технологиехэмрэ къэгъэIэрыхуэныр; курорт Iуэхум зиужьын папщIэ щIэныгъэр, хьэрычэт Iуэхур къепхыныр; нэгъуэщIхэри. КъБКъУ-м МенеджментымкIэ, туризмэмрэ хьэщIагъэ индустриемкIэ и институтым и унафэщI Лыджыдэ Рэмэзан къызэхуэсахэм псалъэ гуапэкIэ захуигъэзащ. «Санаторэ-курорт комплексым республикэм и социально-экономикэ зыужьыныгъэмкIэ мыхьэнэшхуэ иIэщ. Ар ефIэкIуэн папщIэ егъэджэныгъэм, щIэныгъэм, хьэрычэт IэнатIэм я къарур зэхэлъхьэн хуейщ. Дэ туризмэм зегъэужьынымкIэ Iэмалхэр зэхалъхьэн папщIэ методологие, къэхутэныгъэ дэIэпыкъуныгъэхэр еттыну, къэхутакIуэхэр зэлэжьыпхъэхэр зэфIэтхыну дыхьэзырщ», - къыхигъэщащ Лыджыдэм.
КъБР-м Курортхэмрэ туризмэмкIэ и министерствэм туризмэм зегъэужьынымкIэ и къудамэм и унафэщI Къаскъул Виолеттэ и гугъу ищIащ «Налшык» федеральнэ мыхьэнэ зиIэ курортым зегъэужьынымкIэ хэкIыпIэхэм. 2025 гъэм ди республикэм туристу къакIуэм я бжыгъэр цIыху мелуани 2-м щIигъуащ. Республикэм и къалащхьэм щохьэщIэ цIыху мини 156-м щIигъу, абыхэм ящыщу мин 63-м санаторэ-курорт IуэхущIапIэхэм зыщагъэпсэхуащ. Нэхъ кхъахэ хъуа IуэхущIапIэхэр зэрагъэпэщыжмэ, иджыри цIыху мини 10-м нэс щIагъэтIысхьэфынущ. Къаскъулым къызэрилъытэмкIэ, мы IэнатIэм и гугъуехь нэхъыщхьэхэм ящыщщ лэжьакIуэ зэрахуримыкъур, апхуэдэуи зэгъэпэщын хуейщ Iуэхутхьэбзэр зыхуей хуэзэу цIыхухэм яхуэщIэныр, маркетингыр зэтеублэныр, нэгъуэщIхэри.
-Туризмэмрэ хьэщIэщ IуэхумкIэ IэщIагъэлIхэм дахуэныкъуэм и закъуэкъым, - игъэбелджылащ къэпсалъэм. - ЩIыналъэм хурикъуркъым дохутыр-курортологхэр, медсестрахэр, медицинэ техникэмкIэ инженерхэр. Дэ иужь дитщ турист IэнатIэм и фIагъым зэрыхэдгъэхъуэным, IэщIагъэлI Iэзэхэр къызэретшэлIэным, цIыхухэм ягу дыхьэ зыгъэпсэхупIэхэр, я узыншагъэр щрагъэфIакIуэ щIыпIэхэр нэхъыбэ зэрытщIыным.
Дохутыр Iэзэхэм, санаторэхэм я унафэщIхэм, КъБР-м Курортхэмрэ туризмэмкIэ и министерствэм и лIыкIуэхэм студентхэм я упщIэхэм жэуап иратащ икIи гупсысэщIэхэр къыхалъхьащ. Ар и щыхьэтт республикэм и санаторэ-курорт IэнатIэм зегъэужьыным щIалэгъуалэми гулъытэ зэрыхуащIым.
Iэнэ хъурейм хэтахэм къыхагъэщащ апхуэдэ зэIущIэхэр щIэх-щIэхыурэ егъэкIуэкIын зэрыхуейр икIи мыпхуэдэ унафэхэр къыщащтащ: хущхъуэгъуэ зыхэлъ щIыуэпс хъугъуэфIыгъуэхэр къагъэсэбэпу технологиехэмрэ зэреIэзэ Iэмалхэмрэ егъэфIэкIуэн; санаторэ-курорт IэнатIэм щылэжьэнухэр гъэхьэзырын; курортологиемкIэ щIэныгъэ-къэхутэныгъэ лэжьыгъэхэр егъэкIуэкIын; IэнатIэм бжыгъэр и лъабжьэу зегъэужьын; маркетингымрэ КъБР-м и турист брендымрэ гъэкIуэтэн; егъэджэныгъэ IуэхущIапIэхэм ядэлэжьэн; бальнеологие хъугъуэфIыгъуэхэм зегъэужьын. Мы жэрдэмхэмрэ чэнджэщхэмрэ Къэбэрдей-Балъкъэрым и министерствэхэмрэ ведомствэхэмрэ хуагъэхьынущ санаторэ-курорт комплексым зегъэужьынымкIэ щIыналъэ стратегиер щызэхалъхьэкIэ къалъытэн папщIэ.
