«УчимЗнаем» урысейпсо проектым ипкъ иткIэ Урысейм и сымаджэщхэм къыщызэIуахащ еджапIэу 72-рэ. Ахэр щыIэщ ди къэралым и щIыналъэ 40-м щIигъум. Абы и лэжьыгъэр хуэунэтIащ пIалъэ кIыхькIэ сымаджэщым щIэлъ сабийхэр еджэныгъэм къыкIэрымыгъэхуным. Ди республикэми щолажьэ апхуэдэ еджапIэ. Ар Налшык къалэ дэт, Узыфэ зэмылIэужьыгъуэхэр зыпкърытхэм щеIэзэ республикэ сабий сымаджэщым хэту къызэIуахащ. Сабийхэм ядолажьэ предмет куэдым щыхурагъаджэ республикэ гимназием и егъэджакIуэхэр.
«Республикэм и сымаджэщым еджапIэ къызэрыщызэIуахар мыхьэнэшхуэ зиIэ лъэбакъуэщ. Иджы пIалъэ кIыхькIэ сымаджэщым щIэлъыну къызыхуихуэ сабийхэм я узыншагъэр зэрызэфIагъэувэжым къыдэкIуэу, я еджэныр зэпымыууэ я щIэныгъэм хагъэхъуэфынущ, заужьыфынущ, школ гъащIэм къыхэхуа мыхъуу», - жиIауэ щытащ еджапIэр къыщызэIуахым проектым и унафэщI Шариков Сергей.
Сымаджэщым хэт школым щрагъэкIуэкI еджэныгъэр сабийм и узыншагъэр зыхуэдэмрэ медицинэ чэнджэщхэмрэ ятеухуауэ къызэрагъэпэщ. Iуэхум къыщагъэсэбэп «УчимЗнаем» проектым ипкъ иткIэ зэхалъхьа методикэ щхьэхуэхэр.
Проектым и фIыгъэкIэ мы гъэ еджэгъуэм республикэм и сымаджэщ школхэм нобэр къыздэсым щIэныгъэ щагъуэтащ сабий 1678-м. Я узыншагъэр ирагъэфIэкIуэжыну икIи щеджэну щIыналъэм къокIуэ Москва, Санкт-Петербург, Кавказ Ищхъэрэ федеральнэ щIыналъэм хыхьэ республикэхэм, Урысейм и нэгъуэщI хэгъэгухэми щыщ сабийхэр. КъБР-м Узыншагъэр хъумэнымкIэ, Егъэджэныгъэмрэ щIэныгъэмкIэ и министерствэхэм зэгъусэу ирагъэкIуэкI лэжьыгъэр икъукIэ щхьэпэщ, дэтхэнэ сабийри, иIэ узыфэм емылъытауэ, еджэныгъэм къыкIэрымыхуу Iуэхур къызэгъэпэща хъунымкIэ.
УФ-м Узыншагъэр хъумэнымкIэ и министерствэм къызэригъэлъагъуэмкIэ, илъэс къэс сабий мелуани 6-м нэблагъэм къэралым и сымаджэщхэм я узыншагъэр щызэфIагъэувэж, абыхэм ящыщу мин 250-м медицинэ IуэхущIапIэхэм пIалъэ кIыхькIэ зыщаIэжьэ.
Иджыблагъэ «УчимЗнаем» проектыр «Егъэджэныгъэм хуищIа хэлъхьэныгъэм папщIэ» унэтIыныгъэмкIэ «Знание. Премия-2025» узэщIакIуэ саугъэт лъапIэм и лауреат хъуащ.
Ди республикэм щыIэ а еджапIэм и лэжьыгъэр сыт и лъэныкъуэкIи зыхуей хуэзэу зэтеублащ. Дохутырхэм жыджэру ядолажьэ зыпэрыт Iуэхум фIыуэ хэзыщIыкI IэщIагъэлI 20. Сабийхэм ирахьэлIэн хуей Iэзэгъуэм теухуауэ къызэрагъэпэщ я еджэныр. Иджырей технологиехэм я фIыгъэкIэ зэман гуэркIэ къэмытэджу пIэм хэлъын хуей сабийхэми Iэмал яIэщ я еджэныр зэпамыгъэуну. А дерсхэм къищынэмыщIауэ, сабийхэм мультипликацэмкIэ, робототехникэмкIэ мастер-классхэр драгъэкIуэкI, Урысейм и лъэпкъхэм я зэкъуэтыныгъэм и илъэсым ипкъ иткIэ, ахэр щагъэгъуазэ цIыхубэ IэпщIэлъапщIагъэхэм, цIыху цIэрыIуэхэр зыхэт зэIущIэхэр къыхузэрагъэпэщ.
«УчимЗнаем – Заботливая школа» VII урысейпсо конференцым Къэбэрдей-Балъкъэрым сымаджэщ педагогикэм щиIэ зэфIэкIыр къэралым щынэхъыфI щIыналъэ Iуэху бгъэдыхьэкIэхэм ящыщу къыщалъытащ.
