Урысей Федерацэм самбэмкIэ пашэныгъэр къыщыхьыным хуэунэтIа зэхьэзэхуэ щекIуэкIащ Ямало-Ненецкэ автономнэ округым и Ноябрьск къалэм и «Факел» спорт комплексым. Абы щызэпеуащ ди къэралым и щIыналъэ куэдым я спортсмену 300-м щIигъу, я ныбжькIэ илъэс 14 - 16 хъухэу.
Къэбэрдей-Балъкъэрым щыщу зэхьэзэхуэм щыIащ Бахъсэн къалэм Щауэ Iэхьед и цIэр зезыхьэ и спорт еджапIэм и гъэсэн Къумыкъу Ренат икIи килограмм 46-рэ зи хьэлъагъхэм я деж ещанэ увыпIэр къыщихьащ.
Ди щIалэм и тренерхэр ПшынащIэ Муратрэ Къарэмышэ СулътIанрэщ.
Фигу къэдгъэкIыжынщи, Оренбург къалэм нэгъабэ щекIуэкIа мыпхуэдэ зэхьэзэхуэм Къумыкъу Ренат дыщэ медаль къыщихьауэ щытащ. Абы щыгъуэ ар щыбэнар килограмм 42-рэ зи хьэлъагъэхэм я дежщ.
Террорыр и бийхэу
«Спортыр террорым и бийщ» фIэщыгъэм щIэту дзюдомкIэ зэхьэзэхуэ зэIуха Май къалэм щекIуэкIащ. Ар къызэригъэпэщащ Герусовэ Аннэ зи унафэщI спорт еджапIэм. Хэгъэрейхэм нэмыщI, зэхьэзэхуэм хэтащ Тэрч, Прохладнэ щIыналъэхэм я бэнакIуэ ныбжьыщIэу, щIалэхэри хъыджэбзхэри зэгъусэу, 86-рэ.
Май къалэм и спорт еджапIэм и гъэсэнхэм ехъулIэныгъэфIхэр абы щаIащ икIи медаль зэхуэмыдэхэр къыщахьащ. ЖыпIэнурамэ, я хьэлъагъ елъытауэ зыхэта гупхэм щытекIуащ Кириченкэ Марк (кг 24-рэ), Набиев Амир (кг 42-рэ), Бэлахъуэ Къантемыр (кг 46-рэ), Ким Марк (кг 60) сымэ.
Набиев Ринат (кг 22-рэ), Къэжэр Малик (кг 38-рэ), Щыхъалы Щамил (кг 42-рэ) сымэ етIуанэ увыпIэхэр къахьащ.
Ещанэ хъуахэщ Хапаевэ Алия (кг 24-рэ), Джэршыш Сэлим (кг 27-рэ), Аслъэн Расул (кг 46-рэ), Тен Давид (кг 46-рэ), Героевэ Даринэ (кг 63-рэ), Черноусовэ Златэ (кг 63-рэ) сымэ.
Зэхьэзэхуэм къыщыхэжаныкIахэм медалхэр, кубокхэр, щIыхь тхылъхэр иратащ.
Ингушым щызэпоуэ
Кавказ Ищхъэрэм ММА-кIэ и чемпионатрэ пашэныгъэр къэхьыным хуэунэтIа зэхьэзэхуэрэ Ингушым и къалащхьэ Магас щекIуэкIащ. Абы щызэпеуащ КИФЩI-м и спортсмену I60-м нэблагъэ, Къэбэрдей-Балъкъэрым икIахэри яхэту.
Ди республикэм и лIыкIуэхэм ящыщу я хьэлъагъ елъытауэ щызэуа гупхэм Истэпан Алимрэ (кг 93-рэ) Шагъыр Ратмиррэ (кг 57-рэ) ещанэ увыпIэхэр щаубыдащ икIи Iэмал ягъуэтащ УФ-м пашэныгъэр къыщыхьыным хуэунэтIауэ мы гъэм накъыгъэм и 21 - 23-хэм Сочэ къалэм щызэхашэну зэхьэзэхуэм я зэфIэкIхэр щагъэлъэгъуэну.
ЩIалэхэм я тренерыр Чэлимэт Амирщ.
