Тэмэму зэгупсыса Iуэхугъуэхэр

Къэбэрдей-Балъкъэрым Транспортымрэ гъуэгу хозяйствэмкIэ и министерствэм къызэритамкIэ, «ГъащIэм хуэщIа инфраструктурэ» лъэпкъ пэхуэщIэм ипкъ иткIэ республикэм и щIыналъэ автомобиль гъуэгум щыщу километр 73-рэ мы гъэм зыхуей хуагъэзэнущ. Тэмэму зэгупсыса Iуэхугъуэхэмрэ лъэныкъуэхэм и чэзум зэращIылIа зэгурыIуэныгъэхэмрэ я фIыгъэкIэ щIыпIэхэм я нэхъыбэм лэжьыгъэхэм щыпэрыхьащ.

Япэ игъэщыпхъэхэм, мыхьэнэ нэхъ ин зиIэхэм ящыщу къалъытащ Новопавловск – Прохладнэ – Мэздэгу автомобиль гъуэгур зэIузэпэщ щIыныр. Лэжьыгъэхэр мыбы щрагъэжьащ 2025 гъэм. Гъуэгум псори зэхэту километри 7,6-рэ и кIыхьагъщ, щIыналъэ зыбжанэ зэпещIэ икIи зы махуэм къриубыдэу автомобиль зэхуэмыдэу мини 10-м нэблагъэ щызэблокI. Иджыпсту лэжьакIуэхэм гъуэгущхьэм асфальтыжьыр тратхъунщIыкI, ухуэныгъэ материалхэр кърашалIэ.

КъищынэмыщIауэ, Новопавловск – Прохладнэ – Мэздэгу автомобиль трассэм щхьэпрыкI, метр 224-рэ зи кIыхьагъ, щIыналъэ мыхьэнэ зиIэ гъуэгури, зыхуей хуагъазэ.

Лэжьыгъэшхуэхэр мы гъэм щрагъэкIуэкIыну щIыпIэм хохьэ Черная Речкэ – Благовещенск къуажэхэми. Ахэр зэпызыщIэ автомобиль гъуэгум километр 12,6-рэ и кIыхьагъщ икIи Аруан, Прохладнэ щIыналъэхэр зэпещIэ.

Мыбдежми, лэжьыгъэхэм щоужьэрэкI, асфальтрэ бетонрэ зэхэщIауэ тIуащIэу зэрытралъхьэнум и лъабжьэр хуагъэхьэзыр, къыкIэлъыкIуэу, гъуэгу дамыгъэхэр, къэухьхэр щагъэувынущ.

Апхуэдэуи, щыIэ мардэм кърагъэтIасэ Малкэ – Ингушли автомобиль гъуэгум хыхьэу щIыпIитI: Чыщбалъкъ къуажэм километри 4 зи кIыхьагъ, Сэрмакъ къуажэм километри 7,4-рэ зи кIыхьагъ я уэрамхэр. Гъуэгухэм я щхьэфэм асфальтыжьыр щытратыхъунщIыкIащ, лъабжьэхэр щагъэбыдащ, мывэхэмкIи кърагъэбыдэкIыжащ.

Тэрч щIыналъэм и Хьэмидей къуажэми гъуэгу лэжьыгъэхэр щагъэувыIэркъым. Къудеймрэ Бориймрэ я цIэхэр зезыхьэ уэрамхэр зыхуей щыхуагъазэ. Абыхэм зэхэту километри 4,8-рэ я кIыхьагъщ. Къуажэм и лъэс лъагъуэхэри зэIузэпэщ щащIынущ мыбы, иджырей уэздыгъэхэри щыпадзэнущ.

2026 гъэм лэжьыгъэхэр щызэфIагъэкIынущ Шэрэдж Ищхъэрэ – Жэмтхьэлэ – Сукан-Суу автомобиль трассэми. Псыгуэнсурэ Шэрэдж Ищхъэрэмрэ къуажэхэм пхырыкI а гъуэгур 2019 гъэм щегъэжьауэ къагъэщIэрэщI. Апхуэдэ лэжьыгъэхэри щрагъэкIуэкI Налшык – Май къалэхэр зэпызыщIэ, километри 7 зи кIыхьагъ гъуэгуми. Ар хуозэ Прохладнэрэ Елхъуэтрэ зэпызыщIэ, машинэ куэд щызэблэкI трассэм.

Дызэрыт илъэсым лэжьыгъэхэр и кIэм щынагъэсынущ Шэджэм ЕтIуанэ, Булунгу къуажэхэр зэпызыщIэ автомобиль гъуэгур къэгъэщIэрэщIэжыным ехьэлIауэ 2022 гъэм къыщыщIэдзауэ ирагъэкIуэкIхэр. Мыбы Шэджэм аузым и щIыпIэ телъыджэхэм уахуешэ.

ЩIыналъэ гъуэгу фондым и мылъкукIэ Тэрч щIыналъэм и Белоглинскэ къуажэм ПащIэм и цIэр зезыхьэ, километр 1,1-рэ зи кIыхьагъ и уэрамыр зыхуей хуагъазэ мы махуэхэм.

Иджыпсту лъэс лъагъуэм и лъабжьэр ягъэбыдэ, мывэхэмкIэ кърагъэбыдэкI, зыхуэныкъуэну материалхэр кърашалIэ. ИужькIэ уэрамым асфальт тIуащIэу тралъхьэнущ, уэздыгъэхэр щыпадзэнущ, дамыгъэхэр къыщыхагъэщхьэхукIынущ.

Япэ илъэсхэми хуэдэу, щIыпIэ куэдым щрагъэкIуэкI лэжьыгъэхэм я нэхъыбэр зыхуагъэувыжа пIалъэм намыгъэсу, 2026 гъэм и кIэхэм зэфIагъэкIынущ, щыжаIащ КъБР-м Транспортымрэ гъуэгу хозяйствэмкIэ и министерствэм.