Космонавтхэм я щIыхькIэ

Псей щхъуантIэхэм я теплъэ дахэр ирапх уардагъэм, ар ехъулIэныгъэм и нэщэнэуи къалъытэ. ГупсысэкIэ ар уэгум етпхымэ - щэ?! Налшык КъБР-м и Правительствэм и Унэм деж щыIэщ «Космонавтхэм я аллее»-р. Абдеж псей щхъуантIэхэр космонавтхэм щыхасащ. Псей къэс и гупэм пхъэбгъу къитщ, ар хэзысамрэ щыхисамрэ теухуа хъыбар тету. Совет космонавт Леонов Алексей ди деж япэу щыхисащ псей щхъуантIэр. Алеем итщ Савиных Виктор, Рукавишников Николай, Климук Пётр, Севастьянов Виталий, Николаев Андриан, Лазуткин Александр сымэ, нэгъуэщIхэми я жыгхэр. Совет космонавтхэм здеблагъэ щIыналъэм псей щыхасэныр хабзэ дахэ яхуэхъуат. Правительствэм и Унэм деж псей щхъуантIэ хэзыса космонавтхэм ящыщу Леонов Алексейрэ Николаев Андрианрэ Налшык щIыхь зиIэ и цIыху хъуахэщ. КъБАССР-м и Лъахэхутэ музейм и фэеплъ тхылъым итщ Леоновым и псалъэхэр: «ПщIэ фхузощI, ныбжьэгъухэ, лъэпкъым, лъахэм я тхыдэр фегугъуу зэрызэхуэфхьэсыжым, зэрыфхъумэм, и блэкIамрэ и щыIэкIэмрэ зэрыфлъытэм папщIэ. СССР-м и кхъухьлъатэзехуэ, космонавт Леонов 11.06.1968».

Кхъухьым икIыу хьэрш зэIухам япэу ихьар Леонов Алексейщ. 1965 гъэм гъатхэпэм и 18-м кхъухьлъатэзехуэ Беляев Павел щIыгъуу ар «Восход-2»-кIэ хьэршым лъэтащ. Леоновыр етIуанэ пилотти, хьэршым и закъуэ ихьащ, кхъухьым метри 5-кIэ пэжыжьэу икIи дакъикъэ 12-кIэ зыщигъэгуващ. ЩIым къыщигъэзэжам Леоновым жиIауэ щытащ космонавтикэм и тхыдэм къыхэна псалъэхэр: «Хьэрш зэIухам ущыпсэу, ущылажьэ хъунущ».

Леоновым итхащ хьэршым теухуа щIэныгъэ лэжьыгъэ куэд, иригъэкIуэкIащ абы епха къэхутэныгъэу плIы. «Пешеход космоса», «Солнечный ветер», «Выхожу в космос», «Время первых. Судьба моя - я сам…» абы и тхылъхэм щызэпкърихащ хьэршым теухуа гупсысэхэр.

Николаев Андриан «Восток-3» кхъухьымкIэ япэу хьэршым итащ 1962 гъэм шыщхьэуIум и 11-15-хэм. 1963 - 1968 гъэхэм космонавт отрядым и командирт. 1968 гъэм Жуковскэм и цIэр зезыхьэ дзэ-уэгу инженер академиер къиухащ. ЕтIуанэу хьэршым итащ 1970 гъэм мэкъуауэгъуэм и 1 - 19-хэм, «Союз - 9» хьэрш кхъухьым и командиру. ЩIылъэм къагъэзэжа нэужь, космонавтхэм я Iэпкълъэпкъыр абы есэжыным гугъуехьхэр пылъащ. Махуэ 17-рэ сыхьэт I6-рэ дакъикъэ 58-рэ хьэршым ита космонавтхэм яIа щытыкIэм иужькIэ фIащыжащ «эффект Николаева».

ГУГЪУЭТ Заремэ.