Хъыбар кIэщIхэр

Уэрамыр бгъуэ ящI

Налшык къалэм Байсултановым и цIэр зезыхьэ и уэрамыр къызыхуэтыншэу зэрагъэпэщыж мы махуэхэм. ПэхуэщIэм къызэрыщыгъэлъэгъуамкIэ, уэрамым и кыхьагъкIэ машиниплI зэуэ щызэблэкIыфын хуэдэу гъуэгур нэхъ бгъуэ ящIынущ.

Абы нэмыщI, лэжьыгъэхэм хыхьэу, псы жапIэхэр хуащIынущ, бордюрхэр зэрахъуэкIынущ, зэхыхьэпIэ-зэхэкIыпIэхэр къыхагъэщхьэхукIынущ, асфальтрэ бетонрэ зэхэщIауэ тIуащIэу гъуэгущхьэм тралъхьэнущ.

Лъэс лъагъуэхэри зыхуей хуагъэзэнущ. Апхуэдэуи, «Уафэ къабзэ» программэм ипкъ иткIэ, иджырей уэздыгъэхэр щыпадзэнущ, ток кIапсэхэр щIы щIагъым щIалъхьэнущ. ИужькIэ гъуэгу дамыгъэхэр, къэухьхэр щагъэувынущ.

Сабийхэм папщIэ

 2025 гъэм щрагъэжьауэ, «Унагъуэ» лъэпкъ пэхуэщIэм ипкъ иткIэ, Бахъсэн къалэм и хьэблэщIэм щаухуэ сабий садыщIэм нобэ щоужьэрэкI. Ар бгъурытщ иджыблагъэ къызэIуаха курыт еджапIэ №12-м икIи сабийуэ 140-рэ зэуэ абы щыпхуэIыгъынущ.

 ПэхуэщIэм къызэрыщыгъэлъэгъуамкIэ, сабий садыщIэм зы гектар хуэдиз хухахащ, езыр къатитIу зэтетынущ икIи псори зэхэту метр зэбгъузэнатIэу I980-рэ иубыдынущ.

Къат къэс сабийхэр щаIыгъын, макъамэмрэ физкультурэмкIэ щадэлэжьэн пэшхэр, нэгъуэщIхэри хэтынущ.

 Лэжьыгъэхэр 2027 гъэм и кIэхэм зэфIагъэкIынущ.

  Школыр зэрагъэпэщыж

«Егъэджэныгъэ IэнатIэм зегъэужьын» къэрал программэм ипкъ иткIэ Бахъсэн районым щыщи Бахъсэненкэ къуажэм и курыт еджапIэ №I-р къызыхуэтыншэу зэрагъэпэщыжын щIадзащ.

Школыр ухуэныгъитIу зэхэтщ, япэр 1968-рэ, етIуанэр 1972 гъэхэм яухуащ икIи зэхэту метр зэбгъузэнатIэ 4400-рэ яубыд.

Лэжьыгъэ ирагъэкIуэкIынухэм хыхьэу унащхьэр, бжэ-щхьэгъубжэхэр, инженер коммуникацэхэр къанэ щымыIэу зэрахъуэкIынущ. Школым и теплъэми зэхъуэкIыныгъэхэр ирагъэгъуэтынущ, ухуэныгъэхэм я IуплъапIэхэр ягъэдэхэнущ. ИужькIэ, иджырей обрудованэхэр щIагъэувэнущ.

Зэгъэпэщыжыныгъэ лэжьыгъэхэр школым щекIуэкIыхукIэ еджакIуэ 393-р школ №3-м щеджэнущ.

  Псы къабзэ яIэрохьэ

«Коммунальнэ инфраструктурэр егъэфIэкIуэн» къэрал пэхуэщIэм ипкъ иткIэ Шэджэм щIыналъэм псы къабзэ зэрыкIуэ, зэбгрызытыкI и бжьамийхэр къагъэщIэрэщIэж.

ЖыпIэнурамэ, Шэджэм къалэм Лениным и цIэр зезыхьэ, Советскэ уэрамхэм я бжьамийхэр щызэрахъуэкI, псори зэхэту километри 6-м щIигъу я кIыхьагъыу.

 Абыхэм къадэкIуэу Шэджэм ЕтIуанэ къуажэм и хьэблэщIэм и инженер коммуникацэхэр щызэтраухуэ. Мыбдежым псы къыщIэшыпIэщIэ  щаухуэнущ, бжьамийуэ псори зэхэту километри 8 хъууэ щашэщIынущ. Апхуэдэ щIыкIэкIэ, жыджэру зэхэтIысхьэ хьэблэщIэр псы къабзэкIэ зэпымыууэ къызэгъэпэща хъунущ.

ЧЭМОКЪУЭ Мылэ.