Космонавтикэм и махуэр зэрырагъэкIуэкIыпхъэр

Мэлыжьыхьым и 12-р Космонавтикэм и махуэщ. Ар тхыдэм дыщэпскIэ итха Iуэхугъуэщ. 1961 гъэм а махуэм урыс щIалэ Гагарин Юрэ «Восток-1» уэщIлъатэм ису вагъуэхэм лъагъуэ яхухишауэ щытащ.

А махуэм абы жиIауэ щыта «Нежьэ!» псалъэри щIэныгъэм, лIыгъэм, хахуагъэм, лъэхъэнэщIэм я нэщэнэ хъуауэ къалъытэ. ЩIым зэ къекIуэкIыу къигъэзэжыным дакъикъи 108-рэ ихьауэ аращ, ауэ сыхьэтитI иримыкъум зыкъыдигъэзат ди дуней еплъыкIэм.

Мы гъэм илъэс 65-рэ ирокъу абы лъандэрэ. 2025 гъэм дыгъэгъазэм и 29-м УФ-м и Президент Путин Владимир Iэ щIидзащ Урысейм а махуэр зэрыщагъэлъэпIэну щIыкIэмрэ ирагъэкIуэкIыну зэIущIэхэмкIэ Унафэм. Апхуэдэу, нобэ, мэлыжьыхьым и 9-м «Урысей» Лъэпкъ IуэхущIапIэм щызэхашэ хьэршымкIэ Урысейпсо зэIущIэ. Президентым и Унафэм тету, 2026 гъэм щыщIэдзауэ илъэс къэс мэлыжьыхьым и 6 - 12-хэм ди къэралым щрагъэкIуэкIынущ Хьэршым и тхьэмахуэ зыфIаща зэIущIэхэр.

Урысей Космонавтикэм щэнхабзэ къулей ещIэкIащ, ди гуапэ зэрыхъунщи. А унэтIыныгъэмкIэ ди къэралым зригъэгъуэтащ ехъулIэныгъэфIхэр. Псалъэм папщIэ, япэ дыдэу хьэршым яутIыпща «Салют» станцыр, «Мир» программэр, Дунейпсо хьэрш станцым щыщ хъуа «Звезда» модулыр, нэгъуэщIхэри.

ЕхъулIэныгъэщIэхэр хэIущIыIу тщIым и закъуэ мыхъуу, алъандэрэ ялэжьам и тхыдэр хъумэнри ди къалэнщ. Урысей космонавтикэм зегъэужьыным хэлъхьэныгъэ хуэзыщIа щIэныгъэлIхэм, космонавтхэм, къэхутакIуэхэм я цIэхэр хъумэн хуейщ.

Мыбдеж къыхэгъэщыпхъэщ: зи гугъу тщIы зэIущIэхэр утыкум щызэхашэфынущ, абы хэтынухэмрэ еплъынухэмрэ шынагъуэншагъэ и лъэныкъуэкIэ нэхъ хъума щыхъуну щIыналъэхэмрэ щIыпIэхэмрэ. Шынагъуэншагъэм шэч къыщытрахьэ щIыналъэхэм а зэIущIэхэр унэ кIуэцIым щрагъэкIуэкIын хуейщ, видеозанщIэ жыпхъэ къыхэмыкIыу.

Фырэ Анфисэ.