Зыми емыщхь гуфIэкIэ

ЦIыхум хьэршыр къызэрихьэхуам уи щхьэр лъагэу уегъэIэт, ар пэжщ. А Iуэхугъуэ дахэм и гугъу сабийм хуэпщIынуи зэи пасэкъым. Сыт и уасэ,  Гагарин Юрий ракетэм ису хьэршым зэрылъэтам ущытепсэлъыхькIэ, сабийм ар зэригъэщIагъуэм укIэлъыплъыну!

Дуней псом япэ дыдэу хьэршым лъэта Гагарин Юрий щыцIыкIум тхылъымпIэм къыхэщIыкIа кхъухьлъатэхэр иутIыпщыну фIэфIт. Уи нэгу къыщIэгъэхьэт: егъэджакIуэм бжэр къыIуихыу  классым къыщыщIыхьэкIэ, кхъухьлъатэ цIыкIухэм пэшым къыщалъэтыхьу…

- Хэт иджы къуейщIейр? – щIэупщIэрт егъэджакIуэр.

ГуфIэгъуэр и нэгум къищу, сытым дежи къуейщIейр ещанэ классым щIэс Гагарин Юрэти:

- Е-е-й, Юрэ, Юрэ, дапщэщ уэ балигъ ущыхъунур?! – жиIэурэ, и щхьэр игъэкIэрахъуэрт абы.

Зэгуэр еджапIэм къэкIуащ къэпщытакIуэ ябгэр. Ар а махуэм губжьат, гукъыдэмыжт, и бампIэр зытрикъутэн лъыхъуэрти, упэщIэхуэнкIэ Iэмал иIэтэкъым. Псори уафэмкIэ дэплъейти, къэхъуар къыгурымыIуэу къэпщытакIуэми и нэр щиIэтым ирихьэлIэу, еджапIэм и щхьэгъубжэхэм ящыщ зым кхъухьлъатэ къыдэлъэтащ.

- Мыр сыт хьэдэгъуэдахэ! – къэгубжьащ нэхъри инспекторыр. – Еджэным и пIэкIэ, кхъухьлъатэ яутIыпщри щIэсщ!

Кхъухьлъатэр зы тэлайкIэ хьэуам щыуфэразэу, къэпщытакIуэм и пыIэм къыщытетIысхьэжым, школ пщIантIэм сабийуэ дэтыр къыщыдыхьэшхащ,  ауан къащIащ. Абдеж инспекторыр нэхъ Iеижу къытехьэщ, къызэкIуэкIри кIиящ:

- Ар зыщIари абы кIэлъымыплъа егъэджакIуэри дэхун хуейщ школым!

Iуэхур зэхигъэкIыну къэпщытакIуэр еджапIэм щIыхьащ, къызэщIэнауэ.

- Хэт ар зыщIар? – хъумакIуэ лIыжьрат япэу къыIущIари, абы телъащ.

- Гагарин хъунщ. НэгъуэщIым хэт… Кхъухьлъатэ егъэгъэлъатэ фIыуэ, зыми зэран хуэхъуркъым ар, - итащ жэуап лIыжьым.

Гагарин Юрэ жыхуаIэжыр зыщIэс классымкIэ иунэтIауэ, дэкIуеипIэм щыдэкIуейм, къэпщытакIуэм къыхуэзащ зы щIалэ цIыкIу. Ар апхуэдизкIэ къабзэу, гухэхъуэу, дахэу гуфIэрти, инспекторым напIэзыпIэм и губжьыр щхьэщыкIри, пыгуфIыкIащ.

- Гагарин Юрэ жыхуаIэр здэщыIэр къызжепIэн, си ныбжьэгъу цIыкIу? – еупщIащ абы инспекторыр.

- Сэращ ар, - нэхъри къэгуфIащ щIалэ цIыкIур. – Кхъухьлъатэри сэращ зейр. КхъыIэ, къысхуэгъэгъу, сIэщIэкIри, щхьэгъубжэм дэлъэтауэ аращ.

Инспекторым фIы дыдэу ищIэрт кхъухьлъатэхэр езыр-езыру щхьэгъубжэм зэрыдэмылъэтыр, ауэ зишыIэри, IэщIэлъ планерыр еджакIуэм хуишиящ:

- Мэт, сыгъэлъагъут зэрыбгъэлъатэр! – жиIэри.

КъэпщытакIуэм апхуэдизкIэ игу ирихьат Гагарин и кхъухьлъатэхэр зэриутIыпщри, езыми щэ-плIэ игъэлъэтащ, фIэгъэщIэгъуэну. ИужькIэ инспекторым къакIуэу щIидзащ кхъухьлъатэр зэрызэпкъралъхьэм щрагъасэ, Нинэ Васильевнэ иригъэкIуэкI кружокым. Абы и закъуэ, мызэ-мытIэуи кхъухьлъатэхэр щхьэгъубжэм къыдиутIыпщыкIащ езы дыдэм.

Абы щыгъуэ къэпщытакIуэ бзаджэм дэнэ щищIэнт и губжьыр щхьэщызыха щIалэ цIыкIур хьэршым зэрылъэтэнур, «Гагарин и гуфIэкIэ» жаIэу дуней псом цIэрыIуэ зэрыщыхъунур.

Фырэ Анфисэ.