IэщIагъэу хъуам я пажэ

 «ЕгъэджакIуэ къудейуэ ущыткIэ Iуэхур зэфIэкIыркъым, сабийхэм ныбжьэгъу уахуэхъун хуейщ, я дзыхь къуагъэзын папщIэ», - жеIэ егъэджакIуэ ныбжьыщIэ ПщыукI Темрыкъуэ.

Тэрч районым хыхьэ Курп Ищхъэрэ къуажэм дэт школым физикэмкIэ щригъэджын зэрыщIидзэрэ куэд щIакъым абы, ауэ фIыуэ щыгъуазэщ щIэблэр Iущу къэгъэтэджыным епхауэ егъэджакIуэм къалэнышхуэ и пщэ зэрыдэлъым.

Ди зэманым щIэныгъэ зэзыгъэгъуэт щIалэгъуалэм я нэхъыбэм, дауи, нэхъ къащтэ къалэхэм къыщынэмэ. Темрыкъуэ къуажэм щылэжьэну зэрытегушхуам теухуауэ жеIэ: «Сэ езыр сыкъыщыхъуар къуажэщи, къуажэдэс сабийхэр нэхъ спэгъунэгъущ, я хьэл-щэнхэм, дуней тетыкIэмрэ гупсысэкIэмрэ нэхъ сыщыгъуазэщ. Арауэ къыщIэкIынщ къуажэм сыщылэжьэну сыщIытегушхуари. Къапщтэмэ, сызэрыцIыкIури къуажэ гъащIэр сфIэфIт, хадэ хэтщIэу, былым зетхуэу дыкъэхъуащ. ИтIанэ, зыми и жагъуэ сщIыну сыхуейкъым, ауэ адыгэм ди хабзэ-нэмысыр къуажэхэм нэхъ къыщызэтенауэ къызолъытэ».

Ди тхыгъэр зытедухуа щIалэщIэр къыщалъхуар Акъбаш Ипщэ къуажэрщ. Абы жеIэ: «ПэщIэдзэ классхэм щегъэжьауэ тхылъ еджэн сфIэфIу щытащ, сыкъыдэкIуэтеиху математикэмрэ физикэмрэ нэхъ сыдахьэхащ. Сыт хуэдэ щIалэ цIыкIуми хуэдэу, сфIэгъэщIэгъуэнт физикэр зэрызэхэлъыр, абы и щэхухэр къэсщIэну. Школыр къыщызухым, Къэбэрдей-Балъкъэр къэрал университетым физикэмрэ математикэмкIэ и факультетым щIэныгъэ щызэзгъэгъуэтыну мурад сщIащ».

НэгъуэщI зы Iуэху гъэщIэгъуэни хэлъу къыдолъытэ щIалэм и IэщIагъэр къызэрыхихам - и анэр илъэс 26-рэ хъуауэ егъэджакIуэу зэрылажьэр. Шэч къытетхьэркъым Темрыкъуэ ар щапхъэ зэрыхуэхъуам.

ПщыукIыр еджапIэ нэхъыщхьэм щIэсыху, и щIэныгъэм егугъуащ, егъэджакIуэфIхэр зэриIар къыхегъэщ, лабораторэхэм, конференцхэм зэрыщIэсахэр иджы къыхуощхьэпэж. 2025 гъэм ехъулIэныгъэ иIэу «медицинэ физикэ» IэщIагъэмкIэ магистратурэр къиухащ. Иджы езыр иужь итщ школакIуэхэр физикэм зэрыдригъэхьэхыным. ЗэрытщIэщи, егъэджакIуэхэм сабийхэр ирагъаджэ, ягъасэ, трагъэгушхуэ, езыхэр гъуазэ яхуохъу.

- ЕджакIуэхэм физикэр яфIэгъэщIэгъуэн мэхъу, ар гъащIэм къызэрыщысэбэпыр къагурыIуа нэужь. Шей бгъэвэнми телефон бгъэлэжьэнми физикэр къосэбэп, абы хэпщIыкIыну щхьэпэщ, - дыщегъэгъуазэ Темрыкъуэ. - ЕджакIуэхэр си щхьэ изолъытри, дерсхэм зыщыхуэзгъэхьэзыркIэ, сэ езыр школым сыщыщIэсам нэхъ сфIэгъэщIэгъуэну къэсщIэну сызыхуеяхэр сигу къызогъэкIыж. Дерсым щымыщуи школакIуэхэр зыщIэупщIэ Iуэхугъуэхэм дытопсэлъыхь. Апхуэдэ щIыкIэкIэ егъэджакIуэмрэ еджакIуэмрэ нэхъ узэгурыIуэну къысщохъу. Иджырей щIалэгъуалэр нэхъ къуейщIей, щхьэзыфIэфI хъуауэ жызыIэ щыIэщ. Пэжщ, ауэ еджакIуэ псори зэхуэдэкъым: фIыи мащIэу щхьэприхи яхэтщ. Апхуэдэу щыщыткIэ, дэтхэнэ еджакIуэми дэ бгъэдыхьэкIэ щхьэхуэ къыхуэдгъуэтын хуейуэ аращ, Iэмал зэриIэкIэ ахэр дедгъэхьэхыпхъэщ еджэнми спорт, щэнхабзэ Iуэхухэми.

Темрыкъуэ мы гъэм хэтащ «ЕгъэджакIуэ ныбжьыщIэ нэхъыфI» зэхьэзэхуэм и муниципальнэ Iыхьэм, икIи и зэфIэкIыр къыщалъытащ «ЕгъэджакIуэм и гугъапIэ» унэтIыныгъэм. Мыпхуэдэ зэпеуэхэм я мыхьэнэ нэхъыщхьэращи, ахэм хэтыху цIыхум и Iэзагъым хегъахъуэ. ПщыукIми и щIэныгъэр къигъэщхьэпэну, щIэблэ Iущ къигъэхъуну ди гуапэщ.

БАГЪЭТЫР Луизэ.