СПОРТ ХЪЫБАРХЭР

Къуажэхэмрэ къалэхэмрэ зэпоуэ

«Шахмат губгъуэ» фIэщыгъэр зэрихьэу Налшык къалэм и «Каисса» шахмат клубым щекIуэкIащ республикэм и курыт еджапIэхэм я командэхэм я зэхьэзэхуэ. Абы щызэпеуахэр Къэбэрдей-Балъкъэрым и къуажэ щIыпIэхэмрэ къалэ цIыкIухэмрэ я шахматист ныбжьыщIэ гупхэрщ, псори зэхэту 10 хъууэ.

ГъэщIэгъуэну икIи удэзыхьэхыу екIуэкIа зэхьэзэхуэхэм къарикIуахэр зэхалъхьэжа нэужь, япэ увыпIэр иратащ Шэджэм къалэм и курыт еджапIэ №5-м и командэм хэта Гуанэ Инус, Щоджэн Данияр, Бауаевэ Наиля, Щоджэн Атия сымэ.

Зэпеуэм етIуанэ щыхъуащ Тэрч къалэм и лицей №1-м и лIыкIуэхэр. Ахэр Джатэгъэжь Викторие, КIыщ Амир, Лысенкэ Ростислав, Джатэгъэжь Даринэ сымэщ.

Прохладнэ щIыналъэм и Солдатскэ станицэм и курыт еджапIэм и гъэсэнхэу Бабаевхэ Борисрэ Натанрэ, Ашрафов Дениз, Решетняк Адрианнэ сымэ ещанэ увыпIэр къахьащ.

Зэхьэзэхуэм къыщыхэжаныкIахэм иратащ КъБР-м СпортымкIэ и министерствэм и медалхэмрэ щIыхь тхылъхэмрэ. Кубокхэр къыбгъэдэкIащ а министерствэм Олимп джэгухэм хэмыхьэ спорт лIэужьыгъуэмкIэ и еджапIэм.

Зэпеуэм щытекIуа командэр хэтынущ мы гъэм накъыгъэм и 21 – мэкъуауэгъуэм и 1-хэм Сочэ къалэм щызэхэтыну «Шахмат губгъуэ» 3-нэ урысейпсо зэхьэзэхуэм.

Зэгъусэу япэу ирагъэкIуэкI

Налшык къалэм и «Гладиатор» спорт комплексым щекIуэкIащ «Динамо» спорт зэгухьэныгъэм кикбоксингымкIэ и урысейпсо зэхьэзэхуэ. Абы щызэпеуащ ди къэралым и щIыналъэхэм ящыщу 11-м я спортсмену, щIалэхэри хъыджэбзхэри зэхэту, 190-м нэблагъэ, я ныбжькIэ илъэс 13-16-м хъухэу.

КъищынэмыщIауэ, Урысейм и лъэпкъхэм я зэкъуэтыныгъэм и илъэсым траухуауэ илъэси 7-12 зи ныбжь цIыкIухэм папщIэ зэпеуэ щхьэхуэу ирагъэкIуэкIащ. Абы хэтащ спортсмен ныбжьыщIэу 250-рэ.

Къэбэрдей-Балъкъэрым и командэм нэхъыжьхэм я зэхьэзэхуэм медаль зэхуэмыдэу 30 къыщихьащ икIи цIыху 11-м Iэмал ягъуэтащ УФ-м пашэныгъэр къыщыхьыным хуэунэтIауэ мы гъэм накъыгъэм Мэзкуу областым и Одинцовэ къалэм щызэхэтыну зэIущIэм я зэфIэкIхэр щагъэлъэгъуэну. Абыхэм нэмыщI, иджыри 5 Урысей спартакиадэм хэтынущ.

Къыхэдгъэщынщи, КъБР-м КикбоксингымкIэ и федерацэмрэ «Динамо» спорт зэгухьэныгъэмрэ зэгъусэу мыпхуэдэ зэIущIэ ин япэу ирагъэкIуэкIауэ аращ.

Медалу 31-рэ

Урысей Федерацэм каратемкIэ пашэныгъэр къыщыхьыным хуэунэтIа зэхьэзэхуэ Орел къалэм щекIуэкIащ. Абы хэтащ ди къэралым и щIыналъэхэм ящыщу 66-м я спортсмену, щIалэхэри хъыджэбзхэри зэгъусэу, 2500-м нэблагъэ.

Зэхьэзэхуэхэр екIуэкIащ каратем и унэтIыныгъэ зыбжанэмкIэ икIи Къэбэрдей-Балъкъэрым и командэм медаль зэхуэмыдэу 31-рэ абыхэм къыщихьащ.

Я хьэлъагъ елъытауэ зыхэта гупхэм щытекIуащ Къармокъуэ Руслан, Рахаев Сэлихь, Мамаев Рэмэзан, Къардэн Хьэсэн, Шахмурзаев Iэмин, Жамбей Айдэмыр, Конторин Роман, ЛIымахуэ Идар, Лазаренкэ Ангелинэ сымэ. Иджы, УФ-м и командэ къыхэхам хэту абыхэм я зэфIэкIхэр щагъэлъэгъуэнущ мы гъэм щэкIуэгъуэм екIуэкIыну дунейпсо зэхьэзэхуэм.

Спортсменхэм ядэлажьэр Сабаншы Мурат, КIыщ Даут, Мэкъуауэ Алан, ДыщэкI Мухьэмэд, Щоджэн Руслан, Кумыщ Алихъан, Акъсорэ Ахьмэд, Шахмурзаев Щыхьмырзэ, Нэгъуейалий Азэмэт сымэщ.

Биткаш Давид ещанэщ

Урысей Федерацэм киокусинкаймкIэ 22-нэ и чемпионат Мэзкуу къалэм щекIуэкIащ иджыблагъэ. Зэхьэзэхуэм хэтащ ди къэралым и щIыналъэхэм ящыщу 23-м я спортсмену 105-рэ.

Къэбэрдей-Балъкъэрым и щыхьыр иIэту зэпеуэм щы Iащ Биткаш Давид икIи килограмм 90 зи хьэлъагъхэм я деж ещанэ увыпIэр къыщихьащ.

ЩIалэм дэлажьэр Биткаш Емельянрэ Тилов Артуррэщ.