Къэбэрдей-Балъкъэрым и вагъуэ цIыкIу

Къэбэрдей-Балъкъэрым и вагъуэ цIыкIущ Бэрэгъун Заур. Илъэси 4-м иту Заур уэрэд жыIэным зэрыдихьэхар нэрылъагъу хъуат. Япэ дыдэу зыкъыщигъэлъэгъуэн щIидзащ уэрэдымрэ къафэмкIэ «Амикс» гупым.

Ди республикэм гъуазджэм, щэнхабзэм, литературэм теухуауэ щекIуэкIа зэпеуэхэм текIуэныгъэ куэд къыщихьащ. Урысей Федерацэм и утыкушхуэхэми ихьащ итIанэ. Илъэс еплIанэ хъуауэ макъамэр куууэ щедж Минск къалэм. «Пэрытхэм я жанагъ» урысей зэгухьэныгъэм и Iуэхухэр ядегъэкIуатэ, абы и зэхыхьэм ирагъэблагъэри, Шаман, Полунин Сергей сымэ ящIыгъуу уэрэд жиIащ. Ар хэтащ Агутин Леонид илъэс 50 щрикъум ящIа концертым. 2024 гъэм Бэрэгъунхэ я унагъуэр щытекIуащ ВДНХ-м щекIуэкIа «Родные-Любимые» урысейпсо унагъуэ зэпеуэм. А гъэм уэрэджыIакIуэм зэфIэкI щигъэлъэгъуащ утыкушхуэхэм: Москва щекIуэкIа «Твой голос», Санкт-Петербург къыщызэрагъэпэща «Дети поют» урысейпсо зэпеуэхэм Гран-при къыщихьащ, Минск щекIуэкIа, жанр куэду зэхэт «Поколение NEXT» зэпеуэм Гран-при-уэ тIу къыщихьащ, «Белый пароход» фестивалым и президент, оперэ уэрэджыIакIуэ Диденкэ Николай и саугъэтыр къыхуагъэфэщащ, «Большая сцена» дунейпсо макъамэ фестивалым и кIэух зэпеуэм пхыкIащ, «Голос. Дети» телепроектым хэтащ.

Бэрэгъун Заур Мариинскэ театрым, Чайковскэм и цIэр зезыхьэ залым, Кремлым, Манежым, «Россия» лъэпкъ центрым, нэгъуэщIхэми уэрэд щыжиIащ, щIыхь тхылъхэр къыщыхуагъэфащэу. Кавказ Ищхъэрэ федеральнэ щIыналъэм и лIыкIуэу ар щыIащ Хэку зауэшхуэм ТекIуэныгъэ Иныр къызэрыщытхьрэ илъэс 80 зэрырикъуам и щIыхькIэ ирагъэкIуэкIа уэрэд зэпеуэу къэралым щыщ сабий куэд зыхэтам. Абы Гран-при къыщихьри, УФ-м СледствиемкIэ и комитетым и унафэщI Бастрыкин Александр и щIыхь тхылъ къыхуагъэфэщащ. Бэрэгъуным иIэщ псапэ щIэным теухуа «Лучезарный ангел» кинофестивалыр къызэзыгъэпэщахэм я унафэщI Медведевэ Светланэ и щIыхь тхылъри. Урысейм и лIыкIуэу хэтащ «Славянский базар» зэпеуэм, абы дыжьын медаль къыщихьащ. «Славянский базар в Витебске» фестивалым зыкъыщигъэлъэгъуащ. Урысеймрэ Беларусымрэ я Парламент зэхуэсым и диплом иIэщ.

Мы гъэм интернетым яфIэгъэщIэгъуэну еплъащ Ганс Христиан Андерсен и «Девочка со спичками» рассказым къытращIыкIа теплъэгъуэ цIыкIум. Видеотеплъэгъуэм зыкъыщызыгъэлъэгъуар Бэрэгъун Заурщ. Рассказым къытрищIыкIри, уэрэд цIыкIу зэхилъхьащ, абы къыдэкIуэуи, псапэ щIэным ехьэлIа «Спичка надежды» Iуэхур интернетым къыщыхилъхьащ абы. Уэрэд зэхилъхьамкIи клип трахащ. Клипыр зэхигъэуващ и анэр къыдэIэпыкъуурэ. Уэрэдри, макъамэри, гупсысэри зэуIу хъуа нэужь, клипыщIэр къэунэхуащ.

 «Сыт утыкум укъыщихьэкIэ зыхэпщIэр?» - деупщIащ Заур.

«Утыкум сыкъихьэу залым щIэсхэм сахэплъа нэужь, къару лъэщ къысхохьэ. Сыхуейщ си гум щыщ хуабагъэрэ гуапагъэрэ къызэдаIуэхэм ялъэзгъэIэсыну», - жеIэ.