Курыт IэщIагъэм нэхъ хуосакъ

Къэбэрдей-Балъкъэр къэрал университетым Курыт IэщIагъэ щрагъэгъуэт и управленэм и унафэщI Тау Мадинэ иджыблагъэ хэтащ КъБР-м и Жылагъуэ палатэм и еханэ зэхуэсыгъуэм иригъэкIуэкIа зэIущIэм. Ахэр нэхъыщхьэу зытепсэлъыхьар ди щIыналъэм курыт IэщIагъэ щрагъэгъуэт (СПО) еджапIэхэм я Iуэху зыIутырщ.

Тау Мадинэ утыку кърихьащ «ЩIалэгъуалэмрэ сабийхэмрэ» лъэпкъ проектым ипкъ иткIэ университетым и колледжхэм щрагъэкIуэкI лэжьыгъэр зыхуэдэр.

Абы къызэрыхигъэщамкIэ, КъБКъУ-р лъэныкъуэ куэду зэхэт егъэджэныгъэ ухуэкIэм тету мэлажьэ. Абы и колледжхэм щIэс студентхэм хуитыныгъэ яIэщ еджапIэ нэхъыщхьэм и Iэмал псори къагъэсэбэпыну: иджырей библиотекэхэм къыщыщIэдзауэ хъыбарегъащIэ сетхэм нэс.

ИджыкIэ КъБКъУ-м и колледжиплIым IэщIагъэ 25-м щыхурагъаджэ. Курыт IэщIагъэ щрагъэгъуэт IуэхущIапIэхэм цIыху мини 5,5-м нэблагъэ щIэсщ, ар республикэм и СПО-м IэщIагъэ щызэзыгъэгъуэтхэм я процент 30 мэхъу. Колледжхэм щылажьэхэм я гугъу пщIымэ, штатым и лэжьакIуэ 260-м ящыщу 37-р щIэныгъэхэмкIэ кандидатщ, егъэджакIуи 140-м квалификацэ категорие нэхъыщхьэ яIэщ.

«Илъэс къэс егъэджакIуэхэм я щIэныгъэм зрагъэужь: 2025 гъэм къриубыдэу егъэджакIуи 160-м я Iэзагъым хагъэхъуащ, стажировкэ щыIащ. Дунейм псынщIэу зехъуэж, абы щIыгъуу егъэджакIуэхэмрэ еджакIуэхэмрэ бжыгъэхэр зи лъабжьэ Iэмалхэм тету лэжьэфу щытын хуейщ», - жиIащ Тау Мадинэ, егъэджакIуэхэм я щIэныгъэм зэпымыууэ хэгъэхъуэным мыхьэнэшхуэ зэриIэр къыхигъэщу.

ЗэIущIэм къыщыпсэлъахэм я нэхъыбэр къытеувыIащ «ЩIалэгъуалэмрэ сабийхэмрэ» лъэпкъ проектым и мурадхэм. Таум ягу къигъэкIыжащ проектым ипкъ иткIэ, зи узыншагъэм сэкъат иIэу университетым щеджэхэм Iэмал хъарзынэхэр къызэрыхузэрагъэпэщар, «Альтаир» студент центрыр къызэрызэIуахар, хэкупсэ унэтIыныгъэ зиIэ Iуэхугъуэ 60-м щIигъу зэрыщагъэзащIэр, «Мыхьэнэ зиIэ зэпсэлъэныгъэ» лекцэхэр зэрыщрагъэкIуэкIыр, «Фронтым папщIэ еджапIэ нэхъыщхьэхэр» программэр зэрыщылажьэр.

Колледжхэм я дежкIэ мыхьэнэшхуэ иIэщ ар къэзыуххэм щIэупщIэ зэраIэр. КъБКъУ-м зэгурыIуэныгъэ 30-м щIигъу щызэращIылIащ экономикэм и IэнатIэ зэмылIэужьыгъуэхэм ядэлэжьэну. ЛэжьапIэ зытхэм я лIыкIуэхэр колледжхэм я советхэмрэ экзамен къеIызых къэпщытакIуэхэмрэ хохьэ. Ику иту къапщтэмэ, КъБКъУ-м и колледжхэр къэзыухахэм я процент 68-р зыхуеджа IэщIагъэмкIэ лэжьапIэ мэув, абыхэм ящыщу процент 21-м еджапIэ нэхъыщхьэм щIэныгъэм щыпащэ. Нэхъыбэу щIэупщIэ зиIэр медицинэ, педагогикэ унэтIыныгъэхэрщ.

Къэпсэлъэныгъэр щиухым, Тау Мадинэ къигъэлъэгъуащ университетым СПО унэтIыныгъэм дяпэкIэ зэрызыщиужьынур. Къалэн нэхъыщхьэр КъБКъУ-р щIалэгъуалэм утыку гъэщIэгъэун, узыIэпызышэ яхуэщIынырщ, дэтхэнэми и зэфIэкIыр къыщызыкъуихыфу.

«Иужьрей илъэсхэм дэ долъагъу КъБКъУ-м и колледжхэр экономикэм щылэжьэнухэр гъэхьэзырыным зэрегугъур, абы Iэмал къитынущ IэнатIэ зэмылIэужьыгъуэхэм щIэупщIэ щызиIэ IэщIагъэлIхэр дгъэхьэзырыну. Дэ шэч къытетхьэркъым ди къару зэхэтлъхьэмэ, инновацэ бгъэдыхьэкIэхэр ди тегъэщIапIэу дылажьэмэ, зыхуэдгъэувыжа мурадхэмрэ зэманым къытхуигъэув мардэхэмрэ зэрызэдгъэхъулIэфынум, IэщIагъэлI нэхъыфIхэм щIэблэ къащIэувэнымкIэ сэбэп дызэрыхъуфынум», - къызэщIикъуэжащ жиIахэр КъБКъУ-м Курыт IэщIагъэ щрагъэгъуэт и управленэм и унафэщIым.

ЗэрыгурыIуэгъуэщи, университетым курыт IэщIагъэ щрагъэгъуэт и ухуэкIэр иджырей мардэхэм къитIасэ къудейкъым, атIэ Къэбэрдей-Балъкъэрым и социально-экономикэ зыужьыныгъэм жыджэру хуолажьэ.