СПОРТ ХЪЫБАРХЭР

Губернаторым и Кубокыр къахь

Санкт-Петербург и Губернаторым и Кубокыр дзюдомкIэ къэхьыным хуэунэтIауэ ныбжьыщIэхэм я дунейпсо зэхьэзэхуэ а къалэм щызэхэтащ иджыблагъэ. Абы щызэпеуащ Урысей Федерацэм, Армением, Белоруссием, Таджикистаным я бэнакIуэу, щIалэхэри хъыджэбзхэри зэгъусэу, 1000-м щIигъу, я ныбжькIэ илъэс 18-м щхьэдэмыхауэ.

МахуитIкIэ екIуэкIа зэхьэзэхуэм ехъулIэныгъэфIхэр щызыIэрагъэхьащ Къэбэрдей-Балъкъэрым и спортсменхэм. ЖыпIэнурамэ, килограмм 66-рэ зи хьэлъагъхэм я деж дыщэ медаль къыщихьащ Хъуран Къантемыр. Апхуэдэ зэфIэкI зэхьэзэхуэм щиIащ килограмм 48-рэ зи хьэлъагъхэм я деж щыбанэ Джэданэ Алини.

Щад Дилианэ мызыгъуэгукIэ етIуанэ увыпIэм къыщыувыIащ. Ар щыбанэр килограмм 70 зи хьэлъагъхэм я дежщ.

Иджы екIуэкIа зэхьэзэхуэр къызэрыхахыу щытащ икIи абы къыщыхэжаныкIахэм Iэмал яIэнущ Европэм пашэныгъэр къыщыхьыным хуэунэтIауэ мы гъэм Испанием щекIуэкIыну зэIущIэм, Эквадорым щызэхашэну дунейпсо зэпеуэм, ныбжьыщIэхэм я Олимп джэгуу Сенегалым къыщызэрагъэпэщынум я зэфIэкIхэр щагъэлъэгъуэну.

Ди спортсменхэр зэхьэзэхуэм хуагъэхьэзыращ Джэданэхэ Залымрэ Алимрэ, Лукьянов Геннадий, Дзухэ Залымрэ Беслъэнрэ.

Текеев Анзор и фэеплъу

Къэрэшей-Шэрджэсым и Домбей къалэм щекIуэкIащ «Урысей» профсоюзхэм я физкультурэ-спорт зэгухьэныгъэм и Советым боксымкIэ и чемпионатрэ пашэныгъэр къэхьыным хуэунэтIа зэхьэзэхуэрэ. Апхуэдэуи, СССР-м спортымкIэ и мастер Текеев Анзор и фэеплъу щытащ ар.

Зэхьэзэхуэм кърихьэлIащ ди къэралым и щIыналъэ куэдым я спортсменхэр, КъБР-м и лIыкIуэхэри яхэту, икIи, ди гуапэ зэрыхъущи, медаль зэхуэмыдэу 8 абы къыщахьащ ди щIалэхэм.

Я хьэлъагъ елъытауэ зыхэта гупхэм япэ увыпIэхэр щаубыдащ Кулиев Уэсмэнрэ (кг 44-рэ) ХьэпцIэ Дамиррэ (кг 54-рэ). Дыжьын медалхэр къахьащ Хьэтщыкъуэ Кемран (кг 52-рэ), Шыкъ Дамир (кг 60), АфэщIагъуэ Iэмал (кг 63-рэ), Кулиев Абубакр (кг 80), Берд Ахьмэд (кг 90) сымэ.

Килограмм 52-рэ зи хьэлъагъхэм я деж Шурдым Беслъэн ещанэ щыхъуащ.

Зэхьэзэхуэр къызэрыхахыу щытащ - абы къыщыхэжаныкIахэр хэтынущ УФ-м боксымкIэ пашэныгъэр къыщыхьыным хуэунэтIауэ мы гъэм накъыгъэм и 14-24-хэм Мэзкуу областым и Одинцовэ къалэм щекIуэкIыну зэпеуэм.

КъБР-м и командэр зэхьэзэхуэм хуагъэхьэзыращ Куэшмэн Аслъэн, Гелистанов Марат, Елгъэр Елдар, КIэрэф Арсен, Бахъсэн Нур-Мухьэмэд, Шурдым Рустам сымэ.

ЕкIуу зыкъагъэлъагъуэ

Кавказ Ищхъэрэм стIолыщхьэ теннисымкIэ пашэныгъэр къыщыхьыным хуэунэтIа зэхьэзэхуэ Налшык къалэм щекIуэкIащ. Хэгъэрейхэм нэмыщI, абы щызэпеуащ Ставрополь крайм, Шэшэным, Осетие Ищхъэрэ – Аланием, Дагъыстэным, Луганск, Херсон къалэхэм я спортсменхэр, щIалэхэри хъыджэбзхэри зэхэту, 200-м нэблагъэ.

Махуэ зыбжанэкIэ екIуэкIа зэхьэзэхуэм Къэбэрдей-Балъкъэрым и командэм зэфIэкIыфIхэр къыщигъэлъэгъуащ: щIалэхэм я зэхьэзэхуэм етIуанэ, хъыджэбзхэм я зэпеуэм ещанэ увыпIэхэр къыщахьащ. Абы нэмыщI, щIалэхэмрэ хъыджэбзхэмрэ зэгъусэу ирагъэкIуэкI зэхьэзэхуэхэм домбеякъыу медалищ къыхахащ.

Спортсменхэм я тренерхэр Хъыдзэдж Бэллэрэ Темыркъан Зауррэщ.