Лъэпкъ пэхуэщIэхэм я фIыгъэкIэ

Дзэлыкъуэ районым хыхьэ Сэрмакъ къуажэм иджырей мардэхэм тету дохутыр амбулаторэ ухуэн щыщIадзэ. 1954 гъэм ящIауэ щыта а IуэхущIапIэм зэгъэпэщыжыныгъэхэр зэрыщрамыгъэкIуэкIрэ лIэщIыгъуэ ныкъуэм щIигъуащ, медицинэ дэIэпыкъуныгъэм къигъэув иджырей жыпхъэхэми хуэкIуэжыркъым.

КъБР-м Узыншагъэр хъумэнымкIэ и министерствэм и «Фармедтех» компанием, Дзэлыкъуэ район сымаджэщым,  ухуэныгъэр езыгъэкIуэкIыну IуэхущIапIэм я лIыкIуэхэр щыIащ амбулаторэр щаухуэну щIыпIэм икIи лэжьыгъэр зэрырагъэкIуэкIынум теухуа упщIэхэр абдеж щызэфIахащ.

Метр зэбгъузэнатIэу 350-рэ хъуну ухуэныгъэщIэр иджырей амбулаторэм пэмыжыжьэу щытынущ. Медицинэ IуэхущIапIэм цIыху мини 8-м щIигъум зыхуэныкъуэ дэIэпыкъуныгъэхэр щагъуэтынущ.

Дохутыр амбулаторэр иджырей медицинэ IэмэпсымэхэмкIэ къызэрагъэпэщынущ, абы и фIыгъэкIи цIыхухэм хуащIэ Iуэхутхьэбзэхэр хъарзынэу ефIэкIуэнущ.

*  *  *

«ГъащIэ кIыхь икIи жыджэр» лъэпкъ пэхуэщIэм хыхьэу республикэм и медицинэ IуэхущIапIэхэр къэгъэщIэрэщIэжыным, щIэуэ ухуэным теухуауэ лэжьыгъэшхуэ ирагъэкIуэкI.

Иджыблагъэ сыт и лъэныкъуэкIи зыхуей хуэзэу зэрагъэпэщыжащ Шэджэм районым хыхьэ Щхьэлыкъуэ къуажэм и амбулаторэр. Апхуэдэ лэжьыгъэхэр илъэс 38-рэ хъуауэ щрамыгъэкIуэкIа IуэхущIапIэр абы къекIуалIэхэм я тыншыпIэм хуэщIауэ къагъэщIэрэщIэжащ. Амбулаторэм и пэшхэм я зэкIэлъыхьыкIэр яхъуэжащ, дэтхэнэри зыхуей хуэзэу зыхуэныкъуэ хьэпшыпхэмрэ IэмэпсымэхэмкIэ къызэрагъэпэщащ. Абы къепха щIыналъэри гъатхэм ирихьэлIэу зэIузэпэщ ящIынущ.

IуэхущIапIэм лэжьэн щIидзэжащ. Махуэ лэжьэгъуэм къриубыдэу абы зыхуей дэIэпыкъуныгъэ щратыфынущ цIыху 70-м. Псори зэхэту а IуэхущIапIэм къепхащ къуажэм щыпсэу цIыху 9360-рэ, абы щыщу 3059-р сабийщ.