Мазэм кърикIуахэр

Къэбэрдей-Балъкъэр Республикэм щIыналъэм илъ Iуэхухэр щагъэбелджылы и центрым (ЦУР) 2026 гъэм и ­гъатхэпэ мазэм иригъэкIуэкIа лэжьыгъэм кърикIуахэр ­къипщытэжащ.

Зи гугъу ящI пIалъэм къриу­быдэу, ЦУР-м и IэщIагъэлIхэр елэжьащ «Инцидент Менеджмент» IэмалымкIэ республикэм щыпсэухэм зэрызыкъыхуа­гъазэу къаIэрыхьа Iуэху мини 4-м нэблагъэм. Ахэр псори ­проценти 100-кIэ ягъэзэщIащ.
Хъыбар нэхъыбэ къызыбгъэдэкIар Налшык, Прохладнэ къалэхэм, Аруан муниципальнэ районым щыпсэухэрщ. 
Зэрызыкъыхуагъэзахэр ятеу­хуауэ щытащ кIэрыхубжьэ­ры­хур зэрыдашым, ЖКХ-м, гъуэгу­хэм я щытыкIэм, зэIу­зэпэ­щыгъэм, узыншагъэр хъу­мэным. 
IуэхущIапIэр муниципальнэ щIыналъэхэм зэрадэлэжьам кърикIуащ уэрам щхьэхуэхэм псыр зэрыдэлъадэм теухуа ­ныкъусаныгъэхэр ягъэзэ­кIуэ­жы­ныр, псы фIейр зрикIуэ бжьамийхэм елэжьыжыныр, псы щIыIэрэ хуабэрэ иратыныр. ­КъищынэмыщIауэ, лэ­жьы­гъэ­хэр ирагъэкIуэкIащ уэ­рамхэм уэздыгъэхэр щыфIэ­дзэным ехьэ­лIауэ. Жылагъуэ зыбжа­нэм хуит ямыщIу къы­щызэ­рагъэпэща кIэрыху­-бжьэрыху идзыпIэхэр щагъэ­кIуэдыжащ, псэупIэ унэхэр хуа­бэкIэ къы­зэрызэрагъэпэщыр зэ­фIа­гъэу­вэжащ, сабий джэгупIэхэр яу­хуащ. 
Къэбэрдей-Балъкъэрым и ЦУР-м къипщытащ IуэхущIапIэхэмрэ муниципальнэ щIыналъэхэмрэ Интернетыр зэры­щы­лажьэм и фIагъыр зыхуэдэр. Къалъытащ цIыхухэм зэрызыкъыхуагъазэхэм жэуап зэры­ратыр, абыхэм ику иту трагъэ­кIуадэ зэманыр, аккаунтхэр зэ­рырагъэкIуэкI щIыкIэр.
ЦIыхухэм къаIэт Iуэхухэр псынщIэу зэфIэхынымкIэ пашэ хъуащ КъБР-м Узыншагъэр хъу­мэнымкIэ и министерствэр. ЕтIуанэ увыпIэр къихьащ ­КъБР-м Лэжьыгъэмрэ со­циаль­нэ дэIэпыкъуныгъэмкIэ и министерствэм, ещанэр - ­КъБР-м Транспортымрэ гъуэгу хозяйствэмкIэ и министерст­вэм. 
Республикэм и щIыналъэ 13-м я деж япэ увыпIэр къыщихьащ Налшык къалэ округым и щIыпIэ администрацэм, етIуа­нэр - Бахъсэн районым и щIы­пIэ администрацэм, ещанэр ягуэшащ Бахъсэн, Прохладнэ къалэхэм. 
«Мыхьэнэ зиIэ Iуэхухэр» жы­хуиIэм ипкъ иткIэ, эфир занщIэ драгъэкIуэкIащ КъБР-м псэу­пIэ­хэр зыхуей хуэгъэзэнымкIэ и фондым и унафэщI Кулиев Мустэфир. Нэтыным хыхьэу, абы жэуап иритащ фэтэр куэду зэхэт унэхэр 2026 гъэм зэгъэ­пэ­щыжыным, жьы хъуа лифтхэр зэхъуэкIыным, Iуэхутхьэбзэхэм я уасэхэр зыхуэдэнум теухуауэ кърата упщIэхэм.
КъищынэмыщIауэ, Iуащхьэмахуэ муниципальнэ районым и администрацэм и Iэтащхьэ Отаров Мухътар тепсэлъыхьащ ятIэпсым жапIэ хуэщIыным, ухуэныгъэхэм уней мылъкум къыхегъэлъхьэным теухуауэ ялэ­жьым, гъуэгухэр ирагъэ­фIэ­кIуэнымкIэ, псэупIэ-коммунальнэ IэнатIэр къэгъэщIэ­рэ­щIэжынымкIэ яIэ мурадхэм.