ПщIэ зыхуэсщI Мухьэмэд!
Уэ лъэпкъым теухуауэ уемызэшыжу, илъэс куэд хъуауэ ебгъэкIуэкI къэхутэныгъэхэмрэ къыдэбгъэкIа тхылъхэмрэ я фIыгъэкIэ ди Къэбэрдей-Балъкъэрым исхэм, нэхъ жыжьэу узэIэбэкIыжмэ, СССР-м и лъэхъэнэм щыпсэуахэм Iэмал гъуэзэджэ ягъуэтащ адыгэхэм я къекIуэкIыкIам, Урысейм, хамэ къэралхэм щыпсэуа, щыпсэу адыгэлI щэджащэ куэ-дым ятеухуа хъыбархэр къащIэну. Журналистикэмрэ литературэмрэ къэбгъэсэбэпурэ, уэ быдэу дапыпщIэжащ Къэрэшей-Шэрджэсым, Адыгейм, Осетие Ищхъэрэм, Краснодар, Ставрополь крайхэм, Москва, къалащхьэм пэжыжьэ щIыпIэхэм щыпсэу ди лъэпкъэгъухэм.
Сыт хуэдиз IуэхуфI яхузэфIэбгъэкIа ди къуэш абхъазхэм! Егупсысауэ псалъэу, куууэ къыщIэгъэлъауэ Iуэхур зэпкърихыу, хэкупсэ нэсу, нэгъуэщI лъэпкъхэми пщIэ яхуищIу зи гъащIэ гъуэгур къэзыкIу уэ, сэ сызэреплъымкIэ, иджырей АДЫГЭЛIЫМ и шыфэлIыфэ нэхъыфIхэр богъэлъагъуэ. ЦIыхугъэр, щIыхьыр, напэр, захуагъэр псалъэ къызэрыгуэкIкъым уи дежкIэ, атIэ уи хьэл-щэным лъабжьэ хуэхъуауэ къыбдэгъуэгурыкIуэ нэщэнэщ. Уи акъыл жаным, щIэныгъэ куум щIыгъу апхуэдэ щэнхэм псэм и къулеягъыр ягъэбелджылыуэ къызолъытэ. Ахэращ уэ лъэпкъыр зэрыгушхуэ цIыху щэджащэ узыщIар.
Илъэс щэщI ипэкIэ, Иорданием сыщыIэу, къэрал, жылагъуэ лэжьакIуэ, генерал, дипломат цIэрыIуэ Бырмамыт Фоаз сыхуэзауэ щытащ. И унагъуэм сригъэблэгъауэ дызэбгъэдэсти, и ныбжьэгъу нэхъыфIхэм я гугъу щищIым уи цIэри къриIуат. ГушыIэ тIэкIуи щIэлъу генералым жиIат: «Мы ХьэфIыцIэжьыр ди адыгэ лъэпкъым и набдзэщ!».
Мухьэмэд, IущыгъэкIэ гъэнщIауэ къыдэбгъэкIа тхылъхэр нобэ сэбэп мэхъу цIыхум и къэухьым зиужьынымкIэ, тхылъыр Iэпэдэгъэлэл щыхъуа мы лъэхъэнэм ахэр иджыри кърахьэкI акъыл, щIэныгъэ, хабзэ, дерс гъуэзэджэхэр кърахыу, цIыху лъапIэныгъэхэр ягу къигъэкIыжу. Илъэс куэд хъуауэ дызэрызэныбжьэгъум сыщогуфIыкI икIи срогушхуэ. Иджыри узыншагъэ быдэ, ехъулIэныгъэщIэхэр, гуфIэгъуэ куэд уиIэну, уи унагъуэ дахэм я жьантIэр куэдрэ бгъэбжьыфIэну сынохъуэхъу, Мухьэмэд.
ПщIэ къыпхуэзыщI Жэман Ахьмэд,
МТС-Банкым и вице-президент,
Урысейм и Журналистхэм я зэгухьэныгъэм хэт.
