Я лэжьыгъэр купщIафIэщ

Ди республикэм и Iэтащхьэ КIуэкIуэ Казбек МАХ-м щиIэ напэкIуэцIым «Хэкум и хъумакIуэхэр» къэрал фондыр къызэрызэрагъэпэщрэ илъэсищ зэрырикъум теухуауэ щитхащ: 

«Хэкум и хъумакIуэхэр» къэрал фондыр къызэгъэпэщыным теухуа Унафэм Урысей Федерацэм и Президентым Iэ зэ­рыщIидзрэ илъэсищ блэкIащ. А зэманым къриубыдэу къэ­ралым тэмэму зэтеухуа щыхъуащ дзэ Iуэху хэхам и ветеранхэм, абыхэм я Iыхьлыхэм, зэпэщIэувэныгъэм хэкIуэда лIы­хъужьхэм я унагъуэхэм исхэм социальнэу защIэгъэкъуэ­нымкIэ IэнатIэм и лэжьэкIэр. 
А социальнэ институтым щызэфIах Iуэхугъуэхэм я лъабжьэщ IэнатIэ зэмылIэужьыгъуэхэр зэдэууэ, зэпыщIауэ зэ­ры­зэдэлажьэр. Абыхэм я лэжьэкIэ мардэщ закъыхуэзыгъазэ дэтхэнэми бгъэдыхьэкIэ щхьэхуэ къахуэгъуэтыныр, зэры­хъу­кIэ сэбэп яхуэхъуныр. Апхуэдэу щыхъукIи, фондым и IэщIагъэлIхэм я дежкIэ мыхьэнэшхуэ иIэщ цIыхухэмрэ езы­хэмрэ яку дэлъ зэпыщIэныгъэм. 
Урысей фондым Къэбэрдей-Балъкъэрым щиIэ къудамэр къызэрызэрагъэпэщ япэ махуэ лъандэрэ дэIэпыкъуэгъу ­яхуохъу зыкъыхуэзыгъазэхэм. Социальнэу лэжьыгъэр зэ­зыгъэуIухэр ветеранхэми зэуапIэм икIуэдахэм я унагъуэхэ­ми сэбэпышхуэ яхуохъу зыхуеину дэфтэр зэмылIэужьыгъуэ­хэр ягъэхьэзырынымкIэ, медицинэ, психологие, юрист дэIэпы­къуныгъэхэр ягъуэтынымкIэ. Къудамэм и IэщIагъэлIхэр лэ­жьыгъэкIэ япыщIащ республикэм и министерствэхэмрэ ведомствэхэмрэ. 
«Хэкум и хъумакIуэхэр» къэрал фондым ди щIыналъэм щиIэ къудамэм и лэжьыгъэр адэкIи едгъэфIэкIуэну ди мурадщ».