Урысейм и гимныр Iуащхьэмахуэ щоIу

Гъатхэпэм и 28-м щыщIэдзауэ 31-рэ пщIондэ Iуащхьэмахуэ лъапэ щекIуэкIащ «Эльбрусский хорофон» II дунейпсо фестиваль-зэ­пеуэр. Ар къызэригъэпэщащ УФ-м и Лъэпкъ артийскэ комитетым, егъэджэныгъэм, щэн­хабзэм, гъуазджэм зегъэужьынымкIэ «Эоловэ арфэ» АНО-м, «Общественная академия творчеств» щIыналъэ жылагъуэ зэгухьэныгъэм, Урысей музыкэ союзыр, щэнхабзэ жэрдэмхэмкIэ «Пётр Великий» Лъэпкъ фондыр, «Кавказ.РФ» АО-р и дэIэпыкъуэгъуу. 

Фестивалыр къызэрагъэпэщащ лъэпкъ хорхэм я хабзэхэр къагъэщIэрэщIэжын, иджы­рей уэрэд жыIэкIэм зрагъэужьын папщIэ. «Эль­брусский хорофон» зэхыхьэр япэу нэгъабэ ­ирагъэкIуэкIащ. Европэм и бгы нэхъ лъагэ дыдэм къэралым и хорхэм Урысейм и гимныр япэу абы щыгъуэм щагъэзэщIащ. Ар зэдэгъэзэщIэныр я дамыгъэщ лъэпкъхэм я зэ­къуэтыныгъэмрэ щэнхабзэм зегъэужьы­нымрэ. Ар къызэрагъэ­пэщащ 2026 гъэр Урысейм и лъэпкъхэм я ­зэ­къуэтыныгъэм и илъэсу зэрагъэувам хыхьэу. 
Iуащхьэмахуэ бгым метр 3500-рэ зи лъагагъ и «Мир» станцым кIапсэ гъуэгумкIэ дэкIри, фестивалым и курых Iуэхур - Урысей Федера­-цэм и къэрал гимныр - хорхэм ягъэзэщIащ. Фестивалым хэтащ къэралым и щIыналъэ зэ­мылIэужьыгъуэхэм я сабий, студент, балигъ хор, уэрэджыIакIуэ гупхэр. Абыхэм я лэжьыгъэр ­къипщытащ щэнхабзэмрэ гъуазджэмрэ я цIыху цIэрыIуэхэр зыхэта жюрим. 
2026 гъэм зэпеуэм и программэр нэхъ щIэ­щыгъуэу ягъэхьэзыращ. Абы хыхьэу къызэрагъэпэщащ зэIущIэхэр, зекIуэхэр, лауреатхэм я концерт, нэгъуэщIхэри. 
- «Эльбрусский хорофон»-р зэпеуэ къудейкъым, атIэ хор уэрэд жыIэкIэр хъумэнымкIэ мыхьэнэшхуэ зиIэ Iуэхущ, - жеIэ зэхьэзэхуэм и къызэгъэпэщакIуэ комитетым хэт, Лъэпкъ артийскэ комитетым и президент Бейтыгъуэн ­Iэуес. 
- Европэм и бгы нэхъ лъагэ дыдэм нэгъабэ япэу фестивалыр къыщызэдгъэпэщащ. Мы гъэм псоми я фIэщ тщIащ гъуазджэмрэ Хэку ­лъагъуныгъэмрэ гъунэ зэрамыIэр, - пищащ къызэгъэпэщакIуэ комитетым хэт, «Эоловэ арфэ» АНО-м зегъэужьынымкIэ унафэщI Ле­вадный Павел.