Тэрч щIыналъэм къикIахэр ятокIуэ

Курыт еджапIэхэм шахма­тымкIэ я щIыналъэ зэхьэзэхуэ, «Дебют» зыфIащар, Налшык къалэм и «Каисса» шахмат клубым щекIуэкIащ мы махуэ­хэм. Ар гупхэм я зэпеуэу щы-тащ икIи абы хэтахэр 2017  гъэм къалъхуахэмрэ нэхъы­щIэ­хэмрэщ.

ГъэщIэгъуэну икIи удэзы­хьэ­хыу екIуэкIа зэхьэзэхуэм япэ увыпIэр щиубыдащ Тэрч райо­ным и Дей къуажэм Къанкъуэщ Ахь­мэдхъан и цIэр зезыхьэ и шко­лым и командэм. Абы хэтащ ХьэтIэф Эмиль, Бэв Аслъэхъан, КIуантIэхэ Миланэрэ Камилэрэ. 
ЕтIуанэ увыпIэр къахьащ Налшык къалэм и «Олимп» уней еджапIэм и шахматистхэм. Ахэр Нэхущ Мухьэмэд, Мамэ Максими­лиан, Архэст Ансар, Пухальская Ульянэ сымэщ.
Налшык къалэм и курыт еджапIэ №32-м и командэм - Лу Те­мыр­лан, Темрокъуэ Те­мыр, Унэж Дианэ сымэ - ещанэ увыпIэр яубыдащ. 
Зэхьэзэхуэм къыщыхэжаны­кIахэм КъБР-м СпортымкIэ и министерствэм къыбгъэдэкIыу медалхэмрэ щIыхь тхылъхэмрэ ­иратащ. Абы нэмыщI, япэ увыпIэр къэзыхьа командэр хэтынущ Сочэ къалэм и Сириус щIыналъэм щызэхашэну урысейпсо зэхьэзэхуэм и кIэух Iыхьэм. Ар щекIуэкIынур мы гъэм накъыгъэм и 25 - мэкъуа­уэгъуэм и 1-хэрщ.