Журт Бибеод и тхыгъэ нэхъыфIхэр гъащIэм щыщ Iуэхугъуэ нэхъыщхьэхэрт зытеухуар. Абы и псалъэ купщIафIэхэр зыщIэлъ уэрэдхэм ягъэлъапIэ, ягъэдахэ лъахэр, ныбжьэгъугъэр, цIыхугъэр, лъагъуныгъэр, къинэмыщI Iуэхугъуэхэр. Нобэ лъэпкъ литературэм игъуэта зыужьыныгъэм Журт Биберд и гуащIи, и фIыщIи хэлъщ. Ар ящыщщ адыгэ сабий литературэр езыгъэфIэкIуа тхакIуэхэм.
ТхакIуэ Елгъэр Кашифрэ Журт Бибердрэ зэныбжьэгъушхуэу къызэдекIуэкIащ. И ныбжьэгъум теухуауэ Елгъэрым жиIэн и куэдт, и гъащIэр къызэрекIуэкIами и творческэ гъуэгуанэми фIыуэ щыгъуазэт. Кашиф и зы гукъэкIыж теплъэгъуэ фыщыдогъэгъуазэ.
«Зи адэри зи анэри пасэ дыдэу зыфIэкIуэду зеиншэу къэна сабийхэм я гур иудауэ, дунейр яфIэмыIэфIу къанэ хабзэщ. Ауэ Журт Биберд лIыгъэ хэлъу, цIыху нэжэгужэу, гушыIэрейуэ щытащ. Я адэр Хэку зауэшхуэм хэкIуадэри, зым нэхърэ зыр нэхъ цIыкIужу, сабиитIыр къызыхуэна я анэми къигъэщIэжагъэшхуэ щыIэкъым. Арати, зэкъуэш цIыкIуитIыр къэхъуащ Iыхьлыхэм, благъэхэм, гъунэгъу цIыхуфIхэм я нэIэ тету. ЗэрыжаIэу, мафIэми ирагъэсакъым, псывэми хагъэупIакъым. Къуажэ ив нэхърэ - къуажэ ифI щIыжаIэр гурыIуэгъуэщ: мылъкур уэсэпсу мэкIуэдыж. КIуэдыж зимыIэр къуажэм дэс цIыхуфIхэм я фIыщIагъэращ. Апхуэдэ фIыщIагъэращ къезыгъэлар зеиншэ къабзэу къэна Бибердрэ абы и шынэхъыщIэ цIыкIумрэ. Ар зэи щыгъупщакъым цIыхуфIхэм я нэIэ тету къагъэхъуа, гъуэгу захуэм трагъэува, ирагъэджа Журт Биберд. Езыри ерыщт, гъащIэм и гугъуехьхэм япсыхьати, IэнатIэ хьэлъэхэм щышынэу зэи къикIуэтакъым. Уэ хьэрычэт щIэ, сэ берычэт хэслъхьэнщ, жи Алыхьым. Хьэрычэт щIэным, езымрэ и къуэшымрэ зэрыпсэуным телажьэу, цIыхухэм къытхуащIэм дыкъуэсынщ жимыIэу, я щхьэ зэрагъэпсэужыным псэемыблэжу телэжьа щIалэщIэм Тхьэм гущIэгъу къыхуищIащ: унагъуэ Iуэхури еджэнри зэригъэкIэсыфащ. ЕджапIэ нэхъыщхьэри апхуэдэущ абы къызэриухар: лэжьащ икIи еджащ.
ЗэрыжысIащи, цIыхуфI куэдым я щIыхуэ къытехуэурэ къэхъуащ Биберд. Ахэр пшыныжын зэрыхуейр къыгурыIуэрт абы. АрщхьэкIэ… Дауэ? СыткIэ? ФIыщIэмыгъэкIуэд, псэ дахэрэ гу къабзэрэ зиIэ Биберд мылъкушхуэ бгъэдэлъу къыщIокI: абы Алыхьыр зэчийкIэ, талант жыхуаIэмкIэ, къыхуэупсат. Зы мылъкуми пэпщI мыхъун мис а къулеигъэ инымкIэ ипшыныжу щIедзэ къытехуа щIыхуэхэр. Ар абыкIэ ядогуашэ зеиншэ IэнатIэ хьэлъэм къизышахэм. Абы уахътыншэ ещI и гъунэгъухэр, и къуажэгъухэр, и Iыхьлыхэр, и благъэхэр – зи гулъытэрэ зи фIыгъуэрэ илъэгъуа псори. Ахэращ Журт Биберд и япэ рассказхэм, повестхэм лIыхъужь нэхъыщхьэу хэтыр. Абыхэм я хьэл-щэнхэм, я дуней тетыкIэм, я щыIэкIэ-псэукIэм, я гуапагъэ гъунапкъэншэм къагуэпх мыхъуну езы тхакIуэри яхыдолъагъуэ. Мис ахэр псэуэ яхэтщи аращ Биберд и тхыгъэхэр гъащIэ кIыхь, уахътыншэ зыщIыр.
Журтым и IэдакъэщIэкIхэр зэпкърысхыну сыхуежьамэ, си псалъэр икъукIэ кIыхь хъунт. Сэ апхуэдэ муради сщIакъым. Сызыхуейр илъэс щэ ныкъуэкIэ сыкъызыдэгъуэгурыкIуа, шыгъупIасти зыдэсшха, пэжыр щхьэ бзыщIын хуей, Iуэхутхьэбзи зыбжанэрэ къысхуэзыщIа, фIы куэди зыдэслъэгъуа си ныбжьэгъур псалъэ гуапэкIэ аргуэру сигу къэзгъэкIыжыну аращ. Сыту жыпIэмэ, псэ хьэлэл, гу къабзэ зиIэ апхуэдэ цIыху телъыджэхэр пщыгъупщэ хъунукъым – абыхэм я псэри, я сурэтри сыт щыгъуи тщIыгъущ дэ. Сэ, псалъэм папщIэ, ноби слъагъу хуэдэщ тэмакъкIыхьагъыр, гурбиянагъыр къыщытекIуэхэм деж тIэкIуи сыщешхыдэкIэ, зышыIэныгъэм хуэзущийуэ щызгъэукIытэкIэ, къызэмыплъыфу зи щхьэр ехьэхауэ щыт Биберд. Ар къыщIэгубжьым щхьэусыгъуэ зэриIэри къызгурыIуэрт – абы хьэрэмыгъэр, бзаджэнаджагъэр игу техуэнкIэ Iэмал иIэтэкъым. Апхуэдэ щыхуэзэхэм деж зэуэ къэгубжьырт, къызэщIэплъэрти, и пIэм имызэгъэжу хъийм икIырт. Псэ хьэлэлрэ ну пцIанэрэ зиIэ Биберду умыщIэжыну, гум ежэлIэн, къыбжьэдэкIын емыкIу псалъэхэри кърипхъынти, асыхьэтуи къигъэзэжынт. Ар зэщхьыр кърапэса лейр, къуаншагъэр зигу темыхуэу къыщиуду къэгъ сабий хьэрэмыгъэншэрт. ГушыIэ дази зыхэлъти, абы езыр-езыруи зытригъэужырт, уэри узыдигъэгушыIэрт. ЖыпIэнурамэ, Биберд уригъусэу узэшынутэкъым, ерыскъынши ухъунутэкъым. Абы дэнэ къали, дэнэ къуажи ныбжьэгъу щикуэдт, хыхьэхэкIышхуи иIэт. Биберд куэдым куэд къригъэщIэфырт, езыми зым и щIыхуи зытригъахуэртэкъым – цIыхум Iуэхутхьэбзэ хуэщIэнкIэ нэхъ жумарт, псэемыблэж уигъэлъыхъуэнт. Уэ пщIэращ, узэрыхущытращ къыпхуащIэжынури къызэрыпхущытыжынури – ар щынэрылъагъут Биберд и дежи. Арат абы ныбжьэгъу щIикуэдри, ар ныбжьэгъухэм щIащымыгъупщэжри. Ар и цIыхугъэмкIи и творчествэмкIи Журт Биберд къилэжьащ».
