Балъкъэрхэм я махуэр зэдагъэлъэпIащ

Хабзэ зэрыхъуауэ, Къэбэрдей-Балъкъэрым мы махуэхэм щагъэлъэпIащ Балъкъэр лъэпкъым я къэщIэрэщIэжыныгъэм и махуэр. Республикэм и къалэхэмрэ районхэмрэ щыпащащ абы иращIэкIа гуфIэгъуэ зэхыхьэхэм.
Къэбэрдей-Балъкъэрым и япэ Президент КIуэкIуэ Валерэ 1994 гъэм къыхилъхьауэ щытащ, илъэс 13 дэкIауэ, 1957 гъэм Азие Курытым къиIэпхъукIыжу я щIыналъэм къэзыгъэзэжа балъкъэрхэм я махуэр гъэлъэпIэныр.
КъБР-м и Музыкэ къэрал театрым концерт гукъинэж щекIуэкIащ балъкъэр лъэпкъым и къэщIэрэщIэжыныгъэм и щIыхькIэ. IуэхущIапIэм и пэIущIэ пэшым щагъэуват сурэтхэмрэ дэфтэрхэмрэ щызэхуэхьэса «Моя Балкария» выставкэмрэ декоративно-прикладной гъуазджэмкIэ и IэпщIэлъапщIэхэм я IэдакъэщIэкI гъэщIэгъуэнхэмрэ. ГуфIэгъуэ пшыхьым зыкърагъэхьэлIащ Къэбэрдей-Балъкъэрым щыпсэухэмрэ ди хьэщIэхэмрэ, щIыналъэм и унафэщIхэм ящыщхэм, жылагъуэ лэжьакIуэхэм, студентхэм, еджакIуэхэм. Концертыр ягъэдэхащ республикэм и уэрэджыIакIуэ, къэфакIуэ цIэрыIуэхэм. Республикэм и артистхэр къеджащ балъкъэрхэм я гъащIэм теухуа усэ купщIафIэхэм. Пшыхьыр зэхуащIыжащ «Си Къэбэрдей-Балъкъэр» уэрэдымрэ зэныбжьэгъугъэм и къафэкIэ.

Щэнхабзэ зыужьыныгъэмкIэ центрым, «Искож» хьэблэм къыщызэIуахам, зэкъуэтыныгъэм и концерт щекIуэкIащ, балъкъэр лъэпкъым я къэщIэрэщIэжыныгъэм и щIыхькIэ. Пшыхьыр ягъэдэхащ къалэм и уэрэджыIакIуэ, къэфакIуэ ныбжьыщIэхэм. Апхуэдэхэщ центрым и унафэщI Мэзыхьэ Анастасие и гъэсэн «Гармония» студием екIуалIэ цIыкIухэр, ПIаз Аннэ зи художественнэ унафэщI «Иоканто» студиер, Шолоховэ Ксение зи унафэщI «Пандора» къэфакIуэ гупым ящыщхэр. Пшыхьым щагъэзэщIа уэрэдхэмрэ къызэджа усэхэмрэ Хэкум, щIыналъэм и щIыуэпсым и дахагъэм, насыпу къэлъытапхъэм теухуат.
- Зи щIыналъэм, жьэгум къэзыгъэзэжа балъкъэр лъэпкъым я махуэр ядэдгъэлъэпIэн папщIэ дызэхуэсащ, - жиIащ Мэзыхьэ Анастасие. – Лъэпкъыр зыпхыкIа гузэвэгъуэхэр, ахэр зыщIэхъуэпса гугъэфIхэр къазэрехъулIар нобэ ягу къагъэкIыж. Гугъуехьхэр къызэранэкIыу балъкъэрхэм я бзэр, я хабзэр, я щэнхабзэр, Хэкум хуаIэ лъагъуныгъэр зэрахъумам и щыхьэтщ тхыдэр.
Къэбэрдей-Балъкъэр къэрал филармонием и симфоние оркестр, Темыркъан Борис и цIэр зезыхьэм Налшык и «Горный родник», «Маяк» зыгъэпсэхупIэхэм концертхэр щитащ. ЩIалэгъуалэм я унэм щекIуэкIащ балъкъэр лъэпкъыр къэщIэрэщIэжыным теухуа фестиваль щIэщыгъуэ.
КъБР-м и Лъэпкъ музейм къыщызэIуахащ Уянаев Аслъэн и лэжьыгъэхэр щызэхуэхьэса «Аббат» выставкэр. АдэкIэ, КъБР-м и Лъэпкъ музейм утыку къыщрахьащ Бахъсэн Ипщэ къуажэм и IэпщIэлъапщIэхэм я IэдакъэщIэкIхэр щызэхуэхьэса «Тепло земли Балкарии моей» гъэлъэгъуэныгъэр.

КъБР-м и Лъэпкъ къэрал библиотекэ Мэлбахъуэ Тимборэ и цIэр зезыхьэм къыщызэрагъэпэщащ «Мы вернулись к родному очагу» зэхыхьэмрэ «Долгий путь на землю предков» тхылъ гъэлъэгъуэныгъэмрэ. Абы щатащ «Символы гостеприимства балкарского народа» мастер-классыр. НыбжьыщIэхэм я библиотекэм, Мечиев Кязим и цIэр зезыхьэм, щекIуэкIащ «Горит наш огонь…» литературэ-макъамэ пшыхьымрэ «В семье единой» тхылъ гъэлъэгъуэныгъэмрэ.

ХьэтIохъущокъуэм и жыг хадэм, Усыгъэм и алеем, Мечиев Кязимрэ ПащIэ Бэчмырзэрэ я фэеплъхэм деж усэ къеджэнымкIэ зэпеуэ щекIуэкIащ, а усакIуэхэм ятеухуауэ. Налшык и спорткомплексым къыщызэрагъэпэщат ныбжьыщIэхэм (2020-2011 гъэхэм къалъхуахэм) я республикэпсо спорт зэхьэзэхуэхэр. КъинэмыщIауэ, Къэщкъэтау къуажэм и спорткомплексым IэпщэрыбанэмкIэ урысейпсо зэпеуэ щекIуэкIащ, илъэс 17-18 хъухэм папщIэ.

Налшык къалэм и Сабий музыкэ школхэм, библиотекэхэм гъэлъэгъуэныгъэхэр, тхакIуэхэмрэ усакIуэхэмрэ я зэIущIэхэр, лъахэхутэ дерсхэр, лекцэхэр, литературэ сыхьэтхэр, мастер-классхэр къыщызэрагъэпэщащ.

Бахъсэн, Прохладнэ къалэхэм, Бахъсэн, Дзэлыкъуэ, Лэскэн, Май, Прохладнэ, Тэрч, Аруан, Шэджэм, Шэрэдж, Iуащхьэмахуэ районхэм ЩэнхабзэмкIэ я унэхэм, библиотекэхэм, курыт еджапIэхэм щекIуэкIащ концертхэр, пшыхьхэр, выставкэхэр, литературэ, тхыдэ, лъахэхутэ сыхьэтхэр, зэIущIэхэр, спорт зэхьэзэхуэхэр, кино гъэлъэгъуэныгъэхэр.