Лэскэн щIыналъэм хыхьэ Уэзрэдж къуажэм щагъэлъэпIащ Щэнхабзэм и лэжьакIуэхэм я махуэр. Ар къызэригъэпэщащ КъБР-м ЩэнхабзэмкIэ и министерствэм.
КъБР-м щэнхабзэмкIэ и министр Къумахуэ Мухьэдин къахуеджащ республикэм и Iэтащхьэ КIуэкIуэ Казбек зи махуэр зыгъэлъапIэхэм зэрызахуигъазэ хъуэхъу тхыгъэм.
Министрыр щэнхабзэм и лэжьакIуэхэм ехъуэхъуащ я IэнатIэр ирагъэфIэкIуэну, зрагъэужьыну, узыншагъэ быдэ яIэну. Къумахуэм фIыщIэ, щIыхь тхылъхэр зыхуагъэфэща цIыху 30-м нэблагъэм яритыжащ, илъэс куэд щIауэ щэнхабзэ IуэхущIапIэхэм псэемыблэжу зэрыщылажьэм, IэщIагъэм зэрыхуэпэжым, IэнатIэм и зыужьыныгъэм хэлъхьэныгъэ зэрыхуащIым папщIэ. Пшыхьым щагъэлъэпIахэм ящыщщ КъБР-м щэнхабзэмкIэ и министерствэм и лэжьакIуэхэу Ахъмэт Татьянэ, Къуэдз Мадинэ, Габоевэ Саният, КъБР-м и Музыкэ театрым и артист Енин Евгений, КъБР-м и Гуащэ театрым и артист Жариков Артём, НыбжьыщIэхэм я библиотекэ Мечиев Кязим и цIэр зезыхьэм и къудамэм и унафэщI Пащты Мадинэ, «Кабардинка» ансамблым и артист Несрэн Мурат сымэ.
Лэскэн щIыналъэм и администрацэм и Iэтащхьэ Инжыжокъуэ Сэфарбий зэхуэсахэм фIэхъус гуапэ ярихри, щэнхабзэм и лэжьакIуэхэм ехъуэхъуащ ехъулIэныгъэ, зэфIэкI, узыншагъэ яIэну. Абы КъБР-м и Iэтащхьэ КIуэкIуэ Казбекрэ Къумахуэ Мухьэдинрэ фIыщIэ яхуищIащ ЩэнхабзэмкIэ унэхэр ди щIыналъэм зэрыщаухуэм, зэрыщызэрагъэпэщыжым, IэнатIэм и лэжьакIуэхэм гулъытэ ин зэрыхуащIым папщIэ.
Пшыхьыр ягъэдэхащ уэрэджыIакIуэхэу Насып Астемыр, Царикаевэ Дианэ, шыкIэпшынауэ Iэзэ Еуаз Зубер, Анзорей къуажэм ГъуазджэхэмкIэ и сабий школым и ансамбым, «Анзорей» къэфакIуэ гупым, Арщыдан къуажэм ЩэнхабзэмкIэ унэм и къэфакIуэ ансамблым, макъамэ IэмэпсымэхэмкIэ «Арщыдан» гупым, а жылэм и сабий гъэсапIэ №4-м екIуалIэ цIыкIухэм, Урыху къуажэм и сабий гъэсапIэ №1-м и «Насып» ансамблым, нэгъуэщIхэми.
