Спорт хъыбархэр

Хьэгуарэ Илонэ япэщ

Урысей Федерацэм бэнэкIэ хуитымкIэ хъыджэбзхэм я деж пашэныгъэр къыщыхьыным хуэунэтIа зэхьэзэхуэ Ивановэ къалэм щекIуэкIащ. Абы щызэпеуащ ди къэралым и щIыналъэхэм ящыщу 50-м я спортсменкэу 300-м щIигъу, я ныбжькIэ илъэс 16-м щIимыгъуауэ.

Ди гуапэ зэрыхъущи, Къэбэрдей-Балъкъэрым щыщу зэхьэзэхуэм щыIа Хьэгуарэ Илонэ япэ увыпIэр къыщихьащ килограмм 50 зи хьэлъагъхэм я деж. Финалым абы ерыщу къыщыпэщIэтащ Ростов областым щыщ Чозгиян Агние, ауэ ди пщащэр нэхъ лъэщу къыщIэкIащ.

Хъыджэбзым и тренерыр Расулов Магомедсэламщ.

Ди командэр къахощ

Кавказ Ищхъэрэм псы есынымкIэ и чемпионатрэ пашэныгъэр къыщыхьыным хуэунэтIа зэхьэзэхуэрэ Краснодар къалэм щекIуэкIащ иджыблагъэ. Абы щызэпеуащ УФ-м и щIыналъэхэм ящыщу 14-м я спортсмену, щIалэхэри хъыджэбзхэри зэхэту, 670-рэ.

Зэхьэзэхуэхэм Къэбэрдей-Балъкъэрым щыщ цIыху 11 хэтати, медаль 13 абыхэм къыщахьащ.

КИФЩI-м псы есынымкIэ и чемпионатым зы дыщэрэ дыжьынрэ, домбеякъыу 3 къыщихьащ ди командэм. Щхьэзэкъуэ зэпеуэхэу Шелаевэ Марие зыхэтахэм япэ, етIуанэ, ещанэ увыпIэхэр щиубыдащ. Гупхэм я зэпеуэм ди щIалэхэми цIыхубзхэми домбеякъ медалхэр къыщахьащ.

Пашэныгъэр къэхьыным хуэунэтIа зэхьэзэхуэм, илъэс 14-15 зи ныбжьхэм я деж, КъБР-м и командэм дыщэ медалу 2, дыжьыну 4, домбеякъыу 1 къыщихьащ.

Щхьэзакъуэ зэпеуэхэм Батыр Софие метр 800-м япэ, метр 1500-м етIуанэ щыхъуащ. Ким Владислав метр 50-м япэ, метр 200-м етIуанэ увыпIэхэр щиубыдащ. Махуэ Марат метр 50-м, 100-м, 200-м дыжьын медалхэр къыщихьащ.

Ди командэм дэлажьэр Котов Вадим, Гаракян Роберт, Къардэн Миланэ, Газатулин Марат сымэщ.

Зы домбеякъ

Якутием и Нерюнгри къалэм гъатхэпэм и 21 - 22-хэм щекIуэкIащ Урысей Федерацэм мас-рестлингымкIэ и чемпионат. Абы щызэпеуащ ди къэралым и щIыналъэхэм ящыщу 30-м я спортсмену, щIалэхэри хъыджэбзхэри зэхэту, 200-м щIигъу.

Къэбэрдей-Балъкъэрым и щIыхьыр яIэту зэхьэзэхуэм цIыхуищ хэтащ икIи абыхэм ящыщу АфэщIыж Ричард домбеякъ медаль къихьащ. Балигъхэм яхэту мы гъэм япэу зыкъэзыгъэлъэгъуа ди щIалэм дежкIэ ар ехъулIэныгъэшхуэщ.

Домбеякъ медаль къыхуэхьыну щытащ КъуэщIысокъуэ Кристини, ауэ ещанэ увыпIэм щхьэкIэ зыхэта зэпеуэм фэбжь хихри, къыхэмыкIыу хъуакъым адэкIэ.

Ди спортсменхэм ядэлажьэр КъБР-м и командэ къыхэхам и тренер нэхъыжь Гъубж БетIалщ.