Бахъсэн щIыналъэм и къэфакIуэ ныбжьыщIэхэр

  КъБР-м и Музыкэ театрым щекIуэкIащ «В ритме танца» урысейпсо фестиваль-зэпеуэр.

  Зэхьэзэхуэм жыджэру зыкъыщагъэлъэгъуащ Бахъсэн щIыналъэм и къэфакIуэ ныбжьыщIэхэм. Ислъэмей, Зеикъуэ къуажэхэм икIахэр къэфэным зэрыхуэIэзэр, зэфIэкI зэраIэр къыхагъэщащ, дамыгъэ лъапIэхэр къыхуагъэфэщащ.

   КъэпщытакIуэхэм псом хуэмыдэу ягу дыхьащ Ислъэмей къуажэм и «Дух Кавказа» ансамблым и къэфакIуэ цIыкIухэр. НэхъыщIэ дыдэхэм, илъэси 4-5 ныбжьым итхэм зыкъыщагъэлъагъуэ Iыхьэм хыхьэу, Абазэхэ Ясинрэ Яшэррэ удахьэхыу ягъэзэщIащ «Бжьэдыгъу ислъэмей» къафэр икIи япэ увыпIэр къахьащ. Илъэси 6-8 хъухэм хыхьэу, сэшхуэхэр игъабзэу къэфа Къэбардэ Имран зэпеуэм къыхэжаныкIащ. Япэ увыпIэм къыдэкIуэу, Гран-при саугъэт нэхъыщхьэри абы къыхуагъэфэщащ. Ислъэмей къуажэр зэрыгушхуэ артист ныбжьыщIэхэр ирагъэблэгъащ Батуми щекIуэкIыну «Гордость Кавказа» международнэ фестивалым.

 Фестиваль-зэпеуэм ехъулIэныгъэшхуэ щиIащ Зеикъуэ къуажэм ей, щапхъэу къалъыта «Азорелла» ансамблми. Гупым «Къафэ къуаншэ», «Лъапэрисэ», «Хала Вайнах», нэгъуэщI къафэхэри  утыку щагъэлъэгъуащ. КъэпщытакIуэхэм дэтхэнэ зы къафэми саугъэт щхьэхуэхэр къыхуагъэфэщащ.

ТЕКIУЖЬ Заретэ.