ХэкIыпIэхэр къалъыхъуэ

Налшык щекIуэкIащ «ЩIэб­лэ узыншэ: сабийхэмрэ балигъхэмрэ я псэу­кIэм и фIагъыр» II Кавказ Ищхъэрэ форумыр. Ар къызэрагъэпэщащ КъБР-м Узын­шагъэр хъумэнымкIэ министерствэмрэ академик Сперанский Г.Н. и цIэр зезы­хьэ зэпымыууэ IэщIагъэр щрагъэгъуэт Урысей медицинэ академием педиатриемкIэ и кафедрэмрэ. Форумыр хуэгъэпсащ Жьэжьейм и ­дунейпсо махуэм икIи са­бийхэмрэ балигъхэмрэ я узын­шагъэмрэ зэIу­з­эпэ­щыгъэмрэ ехьэлIа Iуэхухэм траухуащ. 

КъБР-м узыншагъэр хъу­мэнымкIэ и министрым и ­къуэдзэ Къармэ Марат зэхы­хьэм хэтхэм фIэхъус псалъэкIэ захуигъэзащ. Абы къыхигъэщащ илъэс къэс ме­дицинэ щIэныгъэм зыужьы­ныгъэ лъэ­бакъуэшхуэхэр зэ­ри­чыр, ауэ куэдрэ уз­ри­мыхьэлIэ узыфэ гъэхъужы­гъуейхэр зыпкърытхэм еIэ­зэныр узыншагъэр хъумэ­нымкIэ IэнатIэм дежкIэ къалэн гугъуу къызэрынэжыр, абы и хэкIыпIэхэр къэ­-лъы­хъуэныр форумым и къалэн нэхъыщ­хьэхэм ящыщ зыуэ зэрыщытыр.
Зэхуэсым и етIуанэ махуэр жьэжьей узы­фэхэм трау­хуащ. IэщIагъэлIхэр тепсэ­лъы­хьащ узыфэм пэщIэ­ты­нымкIэ, ар и чэзум къэ­ху­тэ­нымкIэ щыIэ Iэмалхэм, абыхэм я IуэхукIэ унэтIыныгъэм игъуэта зыужьыныгъэхэм, Iэзэгъуэр егъэфIэкIуэным, хущ­хъуэщIэхэр зэхэлъхьэ­ным, медицинэ Iэ­мэ­псы­мэ­щIэхэр къэгупсысыным. Гулъытэ ­хэха хуащIу и гугъу ящIащ куэдрэ узримыхьэлIэ узыфэ гъэхъужыгъуейхэр зыпкъ­­рытхэм зэреIэзэну IэмалыщIэхэм.
Зэхыхьэм и ещанэ махуэр адэ-анэхэм я щIэныгъэ-узэ­щIыныгъэ Iуэхухэм хухахащ. РМАНПО-м педиатриемкIэ и кафедрэм и IэщIагъэлIхэр тепсэлъыхьащ сабийм и узын­шагъэм теухуауэ дэтхэнэ зы адэ-анэри зыгъэгумэщI­хэм. Апхуэдэу и гугъу ящIащ вирус узыфэ зэрыцIалэр зыпкърытхэм узэреIэзэнум, сабий къалъхуагъащIэхэм уа­зэрыкIэлъыплъынум, бы­дзышэкIэ гъэш­хэным и мы­хьэнэм, фошыгъу узымрэ пшэр хъунымрэ зэрапэщIэ­тынум, узыфэ зэры­цIалэхэм земыгъэубгъунымкIэ вакци­нэр къэгъэсэбэпыным иIэ мы­хьэнэм, нэгъуэщI­хэми. 
Форумыр КъБР-м Узын­шагъэр хъу­мэ­нымкIэ министерствэм цIыхухэм вакцинэр зыхрагъэлъхьэным, я узыншагъэр кърагъэпщытэным теу­хуауэ ирагъэкIуэкI узэ­­-щIы­ныгъэ лэжьыгъэхэм ­къы­пы­зыщэ Iуэху щхьэпэ хъуащ.