Спорт хъыбархэр

 Уэзрокъуэ Минарэ ятокIуэ

«Локо-Дзюдо» фIэщыгъэр зезыхьэ урысейпсо зэхьэзэхуэ Астрахань къалэм щекIуэкIащ мазаем и 27 - гъатхэпэм и 1-хэм. Абы щызэпеуащ ди къэралым и щIыналъэхэм ящыщу 28-м, Белоруссиемрэ Къэзахъстанымрэ щыщ хъыджэбз цIыкIуу 473-рэ, 2013 - 2014 гъэхэм къалъхуауэ.

 Къэбэрдей-Балъкъэрым и щIыхьыр яIэту зэхьэзэхуэм хэтащ Налшык къалэ администрацэм Физкультурэмрэ спортымкIэ и управленэм «Дзюдомрэ самбэмкIэ» и спорт еджапIэм и гъэсэн цIыкIуитI.  Ди гуапэ зэрыхъущи, Уэзрокъуэ Минарэ и хьэлъагъ елъытауэ зыхэта гупым щригъэкIуэкIа зэIущIиплIым щытекIуэри, зэхьэзэхуэм и дыщэ медалыр къихьащ.

Ди хъыджэбзым и тренерхэр Борыкъуейхэ Юрэрэ Алимрэщ.

  Биткаш Давид япэщ

 Мэзкуу къалэм мазаем и 26 - гъатхэпэм и 2-хэм щекIуэкIащ кекусинкаймкIэ дунейпсо зэхьэзэхуэр, «Лъэпкъхэм я Кубок» фIэщыгъэр зезыхьэр. Карате лIэужьыгъуэхэм ящыщу спортсменхэр нэхъ гуащIэ дыдэу щызэпэщIэт зэпеуэм кърихьэлIащ цIыху I500-м щIигъу, хамэ къэралу 43-мрэ УФ-м и щIыналъэхэм ящыщу 4I-мрэ я лIыкIуэхэу.

 Зэхьэзэхуэр зэрекIуэкIам кIэлъыплащ ММА-мкIэ «UFC»-м тIэунейрэ щытекIуэ Ян Петр, УФ-м щIыхь зиIэ и тренер Газзаев Валерэ, Олимп джэгухэм я чемпион Мудэн Беслъэн сымэ, нэгъуэщIхэри.

Налшык къалэ администрацэм Физкультурэмрэ спортымкIэ и управленэм «Дзюдомрэ самбэмкIэ» и спорт еджапIэм и егъэджакIуэ, дунейпсо классымкIэ спортым и мастер Биткаш Давид зэпеуэм и дыщэ медалыр къихьащ. Ди щIалэм зэхьэзэхуэм и утыкум плIэнейрэ къихьати, зэIущIэм хухаха зэманыр и кIэм нимыгъэсу псоми щытекIуащ. Абы и тренерыр и къуэш Емельянщ.

 МЫСОСТ Наурыз.