Мэкъумэш техникэр зэрырагъэфIакIуэ Iэмал

УФ-м и Правительствэм и къалэн нэхъыщхьэхэм хохьэ мэкъумэшыщIэхэм защIэгъэкъуэнымрэ мэкъумэш техникэ паркхэр къэгъэщIэрэщIэжынымрэ. Абы къыхэкIыу, 2026 гъэм ахэр зыхуэныкъуэну машинэхэмрэ обрудованэхэмрэ къращэхун, абы и уасэр зэрыхудачых лизинг IэмалкIэ иужькIэ иратыжын папщIэ, къэралым и бюджетым сом мелардитI къыхэкIынущ. Апхуэдэ унафэм Iэ щIидзащ Мишустин Михаил.

Мэкъумэш техникэ зэмылIэужьыгъуэу мини 6,5-м щIигъу а ахъшэмкIэ къахуэщэхунущ. ИпэIуэкIэ хъыбар зэрыщыIамкIэ, зэрыхудачых мэкъумэш лизингым ехьэлIауэ лажьэ программэм трагъэкIуэдэну, 2026 гъэм къэрал бюджетым щыхухахащ сом мелард 13-м щIигъу, иджырей меларди 2-р хэмыту.

ЛизингымкIэ программэм лэжьэн зэрыщIидзэрэ Къэбэрдей- Балъкъэрым мэкъумэш техникэ зэхуэмыдэу зы миным щIигъу къыIэрыхьащ. Иджыпсту нэхъыбэу гулъытэ зыхуащIыр кIэрыхубжьэрыхухэр, пхъэнкIийхэр, н.къ. зэрыIуаш техникэхэр къэщэхунырщ.

Республикэм и мэкъумэш IэнатIэм нэхъри зыщиужь зэманым абы пыщIа IуэхущIапIэхэр куэду зыхуэныкъуэ финанс дэIэпыкъуныгъэхэм ящыщщ къызэрыхудачых лизинг Iэмалхэр, щыжаIащ КъБР-м Мэкъумэш хозяйствэмкIэ и министерствэм.