Гъуазджэм зэрыдрагъэхьэх Iэмал

«Гардарика Кавказа» арт-фестивалым хыхьэу, Санкт-Петербург къикIа хьэщIэхэм КъБР-м и Лъэпкъ музейм мы махуэхэм щрагъэкIуэкI лекцэхэр, зэхыхьэхэр, мастер-классхэр, пшыхь щIэщыгъуэхэр.

 Зэхыхьэм ирагъэблэгъат гъуазджэм, музейм, щэнхабзэм я лэжьакIуэхэр, сурэт щIыным дихьэххэр. СурэтыщI, дизайнер, ХудожествэхэмкIэ Ленинград академиер, Репин Илья и цIэр зезыхьэр, къэзыуха Анисин Василийрэ художник-монументалист цIэрыIуэ Аверьянов Дмитрийрэ гупыж зыщIхэр хуагъэсащ натюрморт зэращIым, абы и плъыфэр, теплъэр зэрызэхагъэувэ щIыкIэр зэпкърахащ.

Выставкэр езыгъэкIуэкI Пинижаниновэ Еленэ Iуэхур зи жэрдэмхэм къабгъэдэкIыу КъБР-м и Лъэпкъ музейм и унафэщIымрэ и лэжьакIуэхэмрэ фIыщIэ яхуищIащ, фестивалыр къызэрагъэпэщыным теухуауэ илъэс ещанэ хъуауэ къазэрыдэIэпыкъум папщIэ. Абы къыхигъэщащ Санкт-Петербургрэ Къэбэрдей-Балъкъэрымрэ я зэпыщIэныгъэр жыжьэ къызэрыщежьэр, Ленинград блокадэм щыгъуэ а къалэм щеджэ ди художник куэд къадеджэхэм ядэIэпыкъуауэ зэрыщытар, иджыри а хабзэ дахэм, зэныбжьэгъугъэм мы IуэхумкIэ зэрыпащэр.

Гуапэщ Налшык мыпхуэдэ выставкэ къызэрыщызэIуахар. Гъуазджэр фIыуэ зылъагъухэр мы лэжьыгъэ телъыджэхэм музейм къызэрыришэлIэнум шэч хэлъкъым. Мыпхуэдэ Iуэхухэр ди республикэм и щэнхбзэмрэ гъуазджэмрэ зезыгъэужьщ. Мазаем и кIэ пщIондэ выставкэр лэжьэнущи, налшыкдэсхэм, ди хьэщIэхэм щыщ куэд абы щызэблэкIыну къыщIэкIынщ. «Пушкиным и картэр» программэр зэрагъэзащIэм и фIыгъэкIэ, «Гардарика Кавказа» арт-фестивалым и егъэджэныгъэ Iуэхухэм щIалэгъуалэр хэтыну, гъуазджэм зыхагъэгъуэзэну Iэмал зэраIэри къыхэгъэщыпхъэщ.

«Гардарика-Кавказ» фестивалыр ди щIыналъэм ещанэу къыщызэрагъэпэщ. Абы и фIыгъэкIэ музейм щагъэлъэгъуащ Санкт-Петербург и музейхэм я лэжьакIуэхэм Налшык къаша сурэтхэр. Ахэр я IэдакъэщIэкIщ Урысейм, Кавказ Ищхъэрэм, хамэ къэралхэм щыщ художникхэм. Псалъэм папщIэ, ди республикэм и сурэтыщIхэу Зэхъуэхъу Валерэ, Ахъмэт Лиуан, Дэцырхъуей Рузанэ, Галимовэ Наилэ, Аккизов Керим, Зеленская Юлие, Галинский Ярослав, Хьэщхъуэжь Динэ, Жылэ Къантемыр, Ваннах Михаил сымэ, нэгъуэщIхэми я лэжьыгъэ щыфлъагъунущ музейм.