Мэкъумэш IэщIагъэхэр къыхрагъэх

Къэбэрдей-Балъкъэрым дызэрыт илъэсым агротехнологие классыщIэу 10 къы­щы­зэрагъэпэщынущ школа­кIуэ­хэм папщIэ.

Иджыпсту ягъэбелджы­-лы 7 - 11-нэ классхэм щIэсхэм ­физикэр, химиер, биологиер, математикэр нэхъ куууэ щрагъэ­джыну курыт еджапIэхэр.  
Мы Iуэхум 2025 гъэм и фокIадэм зрагъэубгъун щIадзащ икIи республикэм и школип­лIым и еджакIуи 150-рэ абы къызэщIиубыдащ. Клас­сы­щIэ­хэр къызэIуахынущ «Ерыскъы шынагъуэншагъэр къызэгъэ­пэщын» лъэпкъ Iуэхум хыхьэу ягъэзащIэ «АПК-м и IэщIагъэлIхэр» федеральнэ проектым ипкъ иткIэ.
Агроклассыр къызэIуахын ­папщIэ, Урысейм Мэкъумэш ­IэнатIэмкIэ и министерствэм игъэува пщалъэ ткIийхэм ­школыр техуэу щытын хуейщ. Псалъэм папщIэ, ар зытещIы­хьар цIыху мин 50-м нэхърэ ­нэхъ мащIэ щыпсэу щIы­пIэ­хэрщ, школыр иужьрей илъэ­ситхум къриубыдэу яухуауэ е зэрагъэпэщыжауэ щытыпхъэщ, апхуэдэуи еджапIэм километр 30-кIэ пэгъунэгъуу ­мэкъумэш IуэхущIапIэ щыIэн хуейщ. 
Мыр зи жэрдэмхэм я мурад нэхъыщхьэр щIалэгъуалэм ­мэкъумэш IэщIагъэхэм гулъы­тэ хурагъэщIынырщ, АПК-м IэщIагъэлIхэр зэрыхуагъэ­хьэ­зыр щIыкIэр егъэфIэкIуэнырщ, IэнатIэр къыхэзыххэр лэжьыгъэм дегъэхьэхынырщ.