Зэныбжьэгъугъэ зэIущIэхэм текIуэныгъэхэм къыщыпащэ

«Спартак-Налшыкым» зи чэзу текIуэныгъэр къыщихьащ Урысей Федерацэм футболымкIэ и етIуанэ лигэм и «Б» дивизионым и Япэ гупым щекIуэкIыну зэхьэзэхуэм зыхуигъэхьэзыру. Иджы абы хигъэщIащ Владимир областым къикIа «Муром»-р. 

Щэбэт кIуам, хабзэ зэрыхъуауэ, ЕсэнтIыгу къалэм и стадионым нал­шыкдэсхэр щаIущIащ Урысей Федерацэм футболымкIэ и етIуанэ лигэм и «дыжьын» гупыр 2025/2026 гъэхэм екIуэкI зэхьэзэхуэм и япэ Iыхьэм зрагъэбгына «Муром»-р. Лъэныкъуэхэр икъукIэ гуащIэу зэпэщIэтащ икIи «Спартак-Налшыкым» и текIуэныгъэкIэ иухащ.
Налшыкдэсхэм хуабжьу жыджэру къыщIадзащ икIи еплIыщIанэ дакъикъэм ирихьэлIэу 2:0-у япэ ищащ. ТIэуми къыхэжаныкIар гупым къыхыхьагъащIэ Ибрагимовращ. АрщхьэкIэ загъэпсэхуну имыкI щIыкIэ муромдэсхэм зы топ ди щIалэхэм къыхудагъэкIыжащ.
Джэгур езыгъэжьа Къумыкъум, КIэдыкIуейм, Гирзишевым, Пириевым, Балъкъызым, Блийм, Селяевым, ХьэцIыкIум, Урысым, Кумы­щым, Ибрагимовым япIэкIэ «Спартак-Налшыкым» и тренер нэхъыщхьэ Емкъуж Мурат зэIущIэм и етIуанэ Iыхьэм губгъуэм къригъэхьащ Каркаевыр, Кенжевыр, Жабоевыр, Гъуэгузокъуэр, Хьэ­шырыр, Дзыгулыр, КIэнцIэлийр, Пекъур, Уэлджырыр, Соблырыр, ЛIу­пыр. Абыхэм бжыгъэр 3:1-м нагъэсащ, Хьэшырым метр пщы­кIузым и деж щыту топыр дигъэкIа иужькIэ.
АрщхьэкIэ ди щIалэхэм текIуэныгъэныгъэр яIэщIэкIыным зымащIэщ иIэжар. ЯпэщыкIэ Владимир областым къикIахэм Iуэхур 3:2-м нагъэсащ. КъыкIэлъыкIуэу «Муром»-м Iэмал къыхукъуэкIащ метр пщыкIузым и деж щыту пенальти еуэну, я ебгъэрыкIуэныгъэхэм ящыщ зы «Спартак-Налшыкым» и гъуащхьэхъумэхэм хабзэм ­къемызэгъыу я гъуэм пэгъунэгъуу къызэрызэпаудам къыхэкIыу. Ди гъуащхьэтет Каркаевым абы къригъэгъэзащ икIи налшыкдэсхэм я текIуэныгъэр яхуихъумащ. 
Зыгъэсэныгъэхэм зэрыщIадзэрэ «Спартак-Налшыкым» зэныбжьэгъугъэ зэIущIэу 5 иригъэкIуэкIати 4-м щытекIуащ («Динамо-СОУР» - 2:1, Къэбэрдей-Балъкъэрым и гуп къыхэха – 4:0, «Ставро­польАгроСоюз» - 4:1, «Муром» - 3:2), 1-м щызэрытегъэкIуакъым (Мейкъуапэ и Дружба» - 1:1).