Дунейпсо зэпеуэм Къамболэт макIуэ

Рязань къалэм щхьэзакъуэ зэзауэхэмкIэ и академием ще­кIуэкIащ УФ-м тхэквондомкIэ (ВТФ, Олимп джэгухэм хыхьэ лIэужьыгъуэмкIэ) пашэныгъэр къыщыхьыным хуэунэтIа зэ­хьэзэхуэ. Абы щызэпеуащ ди къэралым и щIыналъэхэм ящыщу 59-м я спортсмену, щIалэхэри хъыджэбзхэри зэхэту, 800-м щIигъу, я ныбжькIэ илъэс 15-17 хъухэу.

Къэбэрдей-Балъкъэрым щыщу зэхьэзэхуэм хэтащ Кэнжэ къуа­жэм дэт «Пять колец» спорт академием и гъэсэнхэр икIи ехъулIэныгъэфIхэр щызыIэрагъэхьащ. ЖыпIэнурамэ, Iусен Къамболэт и хьэ­лъагърэ ныбжьрэ елъытауэ зыхэта гупым зэIущIих щригъэкIуэкIри, псоми щытекIуащ икIи дыщэ медаль къихьащ. 
КъищынэмыщIауэ, ди щIалэм Iэмал игъуэтащ мы гъэм Узбекистаным и къалащхьэ Ташкент щекIуэкIыну дунейпсо зэхьэзэхуэм и зэфIэкIхэр щигъэлъэгъуэну.
Ди командэм дэлажьэхэр УФ-м щIыхь зиIэ и тренер Ахъмэт Амиррэ Унэжокъуэ Абдельджэбаррэщ.