ПсэукIэр егъэфIэкIуэным тращIыхь

- 2024-2025 гъэхэм къриубыдэу Къэбэрдей-Балъкъэрым и Аруан щIыналъэм щыдгъэзэщIащ лъэпкъ, федеральнэ проект щхьэпэхэр. Ахэр хуэунэтIауэ щытащ гъуэгухэр гъэтэмэмыным, къалэхэр гъэдэхэным, егъэджэныгъэм, узыншагъэм, нэгъуэщI Iуэхугъуэхэм. 

2024 гъэм «ПсэупIэмрэ къалэм и щытыкIэмрэ» лъэпкъ Iуэхум хэту гъэбелджыла «Къалэ Iэхуитлъэхуит къызэгъэпэщын» федеральнэ проектым хэту Аруан районым зыхуей щыхуэдгъэзащ цIыхухэр куэду щызэхуэс щIыпIэхэр: Нарткъалэ дэлъэдапIэм щыIэ паркыр, Шытхьэлэ дэт къуажэ курыт еджапIэм и Iэгъуэблагъэр, Псыкуэд къуажэкур. КъэдгъэщIэрэщIэжащ Старэ Шэрэдж къуажэм Хэку зауэшхуэм хэкIуэдахэм папщIэ дэт фэеплъыр. Нарткъалэ деж щыIэ къат куэду зэтет унэхэм егъэщIылIа пщIантIищ зыхуей хуэдгъэзащ. Жамборэм и цIэр зезыхьэ уэрамым и 82, 84, 86 унэхэм я пщIантIэхэр къэгъэщIэрэщIэным текIуэдащ сом мелуани 5, 2-рэ. 2025 гъэм Нарткъалэрэ Псыгуэнсурэ щыIэ цIыхубэ зэхуэсыпIэхэр къызэгъэпэщыным текIуэдащ сом мелуани I10, 4-рэ. Урысейпсо онлайн хэхыныгъэм тету, 2026 гъэм къапщытахэм ящыщу, нэхъыфIу къызэгъэпэщыжа щIыпIэхэм хабжащ Нарткъалэ и ут нэхъыщхьэр. АдэкIэ ди мурадщ Аруан, Старэ Шэрэдж дэлъэдапIэхэр дгъэдэхэну. Гъуэгухэр зыхуей хуэгъэзэным тещIыхьа федеральнэ проектым тету, Къэхъун Iэщышхуэ щаIыгъ и щIыпIэм хуэкIуэ гъуэгур, километр 0, 7-рэ хъур, къызэгъэпэщыжыным текIуэдащ сом мелуани 9,86-рэ. Зыхуей хуагъэзащ Шэрэджыпсым телъ, метр 90 зи кIыхьагъ лъэмыжыр. 

«Управдор» проектым хэту, 2025 гъэм Старэ Шэрэдж къуажэм и уэрамхэр электрокъарукIэ къэгъэнэхунымкIэ лэжьыгъэшхуэ екIуэкIащ. Старэ Шэрэдж-Котляревск, Старэ Шэрэдж –Жэмтхьэлэ – Сукан Су гъуэгухэр, Лениным, КIуащым я цIэхэр зезыхьэ уэрамхэр зыхуей хуагъэзащ. Зэхэту километри 9, 274-рэ къагъэнэхуащ. Уэздыгъэ зыфIадзэ пкъо 213-рэ ягъэуващ, «светодиоднэ» жыхуаIэм хуэдэ уэздыгъэ 377-рэ фIадзащ, электрокъару зрикIуэ кIапсэхэр уэрамхэм зэпрашащ. Нарткъалэ-Къэхъун-Правоурванск, Старэ Шэрэдж – Чёрнэ Речкэ, Налшык – Нарткъалэ автомобиль гъуэгухэр къагъэнэхуащ. Проектхэр гъэзэщIэным текIуэдащ Къэбэрдей-Балъкъэрым и гъуэгу фондым и ахъшэкIэ. 

2026 гъэм зыхуей хуэдгъэзэнущ Нарткъалэ  Лениным, ШэджыхьэщIэм, Ахъмэтым я цIэхэр зезыхьэ и уэрамхэр. 

ПсэупIэ коммунальнэ Iуэхутхьэбзэхэр егъэфIэкIуэнми гулъытэ игъуэтащ. 2025 гъэм Къэхъун къуажэм къыщызэрагъэпэщащ псы бжьамий километри 9. Иджы ар унагъуэ 400 хуэдизым ялъэIэсынущ. Лэжьыгъэм ихьащ сом мелуан 49, 1-рэ. 

Егъэджэныгъэмрэ узыншагъэр хъумэнымрэ я гугъу пщIымэ, щIыналъэм щекIуэкIащ ахэр егъэфIэкIуэным тещIыхьа Iуэхугъуэхэр. Нарткъалэ дэт курыт еджапIэ № 2-м  гуащIыхьащ сабий 400 зыщIэхуэну пэшхэр. 2025 гъэм «Унагъуэ» лъэпкъ проектым хэт «Унагъуэм зыщIэгъэкъуэн» Iуэхум тету, Старэ Шэрэдж щаухуащ цIыхуи 100 зрашэлIэну сабий сад. Абы текIуэдащ сом мелуани 139, 13-рэ. 

Старэ Шэрэдж, Нижнэ Шэрэдж къуажэхэм къыщызэIуахащ амбулаторэщIэхэр. 

2026-2027 гъэхэм къриубыдэу сабий садхэр щаухуэнущ Псыгуэнсурэ Аруанрэ. Псыкуэд,  Шэрэдж Ищхъэрэ, Старэ Шэрэдж, Нарткъалэ дэт сабий садхэр зэрахьэнущ.