Аруан щIыналъэм щыIэ ЩIалэгъуалэ IуэхущIапIэм мазаем и 3-м щызэхалъхьэжащ блэкIа илъэсым кърикIуахэр, я ехъулIэныгъэхэм щытепсэлъыхьащ, къапэщыт къалэнхэр щызэпкърахащ. ЗэIущIэм хэтащ КъБР-м щIалэгъуалэм я IуэхухэмкIэ и министр Лу Азэмэт, Аруан районым и администрацэм и Iэтащхьэ ЛIыжьыкъуэ Хьэзрит, Нарткъалэ, абы къедза къуажэхэм щыщ щIалэгъуалэр.
КъулыкъущIэхэм къалэн нэхъыщхьэу зыхуагъэувыж щIалэгъуалэ жыджэрхэр къызэщIэгъэуIуэныр, къуажэ къэс щIалэгъуалэм ядэлэжьэн IэщIагъэлIхэр яIэныр, мы Iуэхум дихьэхыу абы къыхыхьэну хуейхэр зыхуэныкъуэхэмкIэ къызэгъэпэщыныр. А жылэхэм щIалэгъуалэм ядэлэжьэныр я пщэрылъу щыIэ IэщIагъэлIхэм илъэс къэс зэхалъхьапхъэщ гъэсэныгъэр зэрырагъэкIуэкIынум и план, ахэр япыщIауэ щытын хуейщ школым щIэс ныбжьыщIэхэми нэхъыжьыIуэхэми. Апхуэдэ Iуэхум къыхэшэн хуейщ гъэсэныгъэ и лъэныкъуэкIэ лажьэ IэнатIэ псори. Сабийхэмрэ щIалэгъуалэмрэ дэзыхьэх Iуэхухэм щыхуагъасэ IуэхущIапIэ псоми я зэфIэкIыр купщIафIэу къэгъэсэбэпыпхъэщ. Абы къищынэмыщIауэ, егъэджакIуэхэр, тренерхэр, щэнхабзэм, дин зэгухьэныгъэхэм я лIыкIуэхэр, апхуэдэуи щIалэгъуалэ жыджэрхэр къуажэхэм я Iэтащхьэхэм я гъусэу жылагъуэ гъэсэныгъэ лэжьыгъэм и къару лъэщ хъун хуейщ.
Нарткъалэ щызэхэта зэIущIэм иужькIэ, щIыпIэ футбол секцэм щыIащ унафэщIхэр, тренерхэмрэ футболист ныбжьыщIэхэмрэ яхуэзащ.
Лу Азэмэт зэрыжиIамкIэ, лэжьыгъэ нэужьым ахэр щIалэщIэхэм футбол ядэджэгуащ. «Аруан щIыналъэм дызэрыщыIар мы гъэм ди япэ зекIуэщ. КъБР-м и Iэтащхьэ КIуэкIуэ Казбек унафэ къызэрытхуищIам тету, дэ щIэх-щIэхыурэ республикэм и районхэм лэжьыгъэ IуэхукIэ докIуэ», - жиIащ министрым.
Жылагъуэм щаIэ мыхьэнэр ягъэнаIуэ
Шэрэдж районым щыIэ ЩIалэгъуалэ центрым щекIуэкIащ школакIуэхэм папщIэ мыхьэнэ ин зиIэ Iуэхугъуэ – ХэхакIуэ ныбжьыщIэм и клубхэм я лэжьыгъэр ирагъэжьащ. Къэщкъэтау, Аушыджэр, Жэмтхьэлэ къуажэхэм къыщызэIуахащ апхуэдэ зэхуэсыпIэхэр, абыхэм екIуэлIэнущ нэхъыжь классхэм щIэс щIалэгъуалэ жыджэрхэмрэ жэуаплыныгъэ нэхъыбэ зыхэлъхэмрэ.
Клубхэр къыщызэIуахым щIалэгъуалэм я пащхьэ къыщыпсалъащ Шэрэдж щIыналъэ хэхакIуэ комиссэм и унафэщI Кужонов Рэмэзанрэ участковэ комиссэ №332-м и унафэщI Анахаевэ Аидэрэ.
Рэмэзан къыхигъэщащ апхуэдэ клубхэр щIалэхэмрэ хъыджэбзхэмрэ къэралым и пащхьэ щахь жэуаплыныгъэр зыхуэдэр къагурыIуэнымкIэ сэбэп зэрыхъур, къэралым и зэфIэувэныгъэр дэтхэнэми и Iуэху еплъыкIэм зэрелъытар жиIащ.
Зэпсэлъэныгъэхэмрэ практикэ дерсхэмкIэ ныбжьыщIэхэм куууэ зрагъэщIэфынущ къэрал ухуэкIэм, хэхыныгъэм я лъабжьэхэр, IэIэтыр зэрекIуэкI щIыкIэр.
ЗэIущIэм и кIэухым клубхэм тыгъэ хуащIащ сурэт гъэщIэрэщIахэр зэрыт къыдэкIыгъуэ «Горы учат: от мудрого выбора к справедливому голосу» тхылъыр. Мы Iуэхур щIэдзапIэ хуэхъунущ щIалэгъуалэм жылагъуэм щаIэ мыхьэнэр захегъэщIэным.
Тыгъэхэр хуащIащ
Прохладнэ муниципальнэ районым и Приближнэ, Екатериноградскэ станицэхэм я щIалэгъуалэ IуэхущIапIэхэр 2023-2024 гъэхэм къызэIуахауэ щытащ. Абы лъандэрэ зэфIагъэкIыну зыхунэсахэр, я лэжьыгъэр зэрекIуэкIыр къипщытащ республикэм щIалэгъуалэм я IуэхухэмкIэ и министр Лу Азэмэт. Министрымрэ Прохладнэ щIыналъэ администрацэм и Iэтащхьэ Ломов Максимрэ IуэхущIапIэхэм зыщыщаплъыхьым къыхагъэщащ ныбжьыщIэ центрхэм нобэкIэ щIэупщIэшхуэ зэраIэр, абыхэм псэуныгъэм епха къалэн куэд зэрагъэзащIэр, ныбжьыщIэхэм я зыгъэпсэхугъуэр, зэрыцIыхуныр, зыужьыныгъэр къызэгъэпэщынымкIэ щIыпIэ телъыджэу зэрыщытыр. Гулъытэ хэха хуащIащ IуэхущIапIэхэр мылъку-техникэ и лъэныкъуэкIэ зыхуей хуэгъэзэным. Центрхэм щылажьэхэм абы теухуауэ къыхалъхьа жэрдэмхэри даIыгъащ къулыкъущIэхэм.
IуэхущIапIэхэм иратащ теннис щыджэгу стIолхэр, аэрохоккейр, стIолыщхьэ джэгукIэхэр, Приближнэ станицэм и ныбжьыщIэ центрым зекIуэхэм къыщагъэсэбэп хьэпшыпхэм хуэди тыгъэ хуащIащ.
Екатериноградскэ станицэм и къэзакъ зэгухьэныгъэм и лIыкIуэхэмрэ дизайнерхэмрэ ящIыгъуу къапщытащ сабийхэмрэ щIалэгъуалэмрэ папщIэ спорт-узыншагъэр щрагъэфIакIуэ лагерыр щагъэувыну утыкухэр. Мы проектыр гъэзэщIа мэхъу Къэбэрдей-Балъкъэр Республикэм и Iэтащхьэ КIуэкIуэ Казбек и унафэкIэ. Районыр апхуэдэ лагерь зэрыхуейр къыщыхалъхьауэ щытащ щIыналъэзэхуаку щIалэгъуалэ къэзакъ форумым.
«НыбжьыщIэ, щIалэгъуалэ зэхуэсыпIэхэр ди районым и къэкIуэнум хуэтщI хэлъхьэныгъэщ. Мыхьэнэшхуэ иIэщ щIалэхэмрэ пщащэхэмрэ щызэпсэлъэн, зыщаужьын, жыджэру зыщагъэпсэхун иджырей утыку шынагъуэншэр яIэным. Республикэм и Iэтащхьэмрэ зи нэIэ дыщIэт министерствэмрэ зэрызыкъытщIагъакъуэм Iэмал къыдет а къалэнхэр зэкIэлъыкIуэу зэфIэдгъэкIыну, щIалэгъуалэм щалъхуа щIыналъэм зыкъыщагъэлъэгъуэфыну, зыкъыщызэкъуахыфыну Iэмал еттыну», - къыхигъэщащ Прохладнэ муниципальнэ районым и щIыпIэ администрацэм и Iэтащхьэ Ломов Максим.
Сабий-щIалэгъуалэ лагерь къызэIухыныр Прохладнэ районым дежкIэ мыхьэнэ ин зиIэ проектщ, сыт щхьэкIэ жыпIэмэ, абы къекIуалIэхэр хэкупсэу гъэсэным, я узыншагъэр егъэфIэкIуэным, Iуэху щхьэпэхэм хэшэным теухуауэ ядэлэжьэнущ. Зи гугъу тщIы лагерым и зэхэлъыкIэм иджыпсту елэжьу аращ, дяпэкIэ федеральнэ, щIыналъэ программэ хэхахэм хагъэхьэнущ.
