ЩIыналъэр ирагъэфIакIуэ

 Шэрэдж щIыналъэм псы къабзэ зэбгрызытыкI, километр 12,7-м щIигъу зи кIыхьагъ бжьамийхэр щаукъуэдиящ икIи, абы и фIыгъэкIэ, районым и къуажэ нэхъ инхэм хыхьэ Къэщкъэтау, Аушыджэр, Бабугент жылэхэм щыпсэу цIыху мин 15-м щIигъум псы къабзэр зэпымыууэ яIэрыхьэн щIидзэнущ.

ПэхуэщIэр ягъэзащIэ къуажэхэм сыт и лъэныкъуэкIи зегъэужьынымкIэ щыIэ программэм ипкъ иткIэ. Лэжьыгъэ ирагъэкIуэкIахэм къадэкIуэу, псы къыщIэшыпIэм, псыр зэбгрызытыкIым, псыр щызэхуахьэс чейм екIуалIэ гъуэгухэри, нэгъуэщIхэри зэIузэпэщ ящIащ.

Абыхэм нэмыщI, «ГъащIэм хуэщIа инфраструктурэ» лъэпкъ пэхуэщIэм ипкъ иткIэ Жэмтхьэлэ къуажэм псы къабзэ зэрыкIуэ, километри 4,4-м щIигъу зи кIыхьыгъ и бжьамийхэр, Балъкъэр Ипщэм ейуэ километри 6,6-рэ хъур къызыхуэтыншэу зэрагъэпэщыжащ.

 Апхуэдэуи, Шэрэдж районым нэгъуэщI ухуэныгъэ лэжьыгъэхэри щрагъэкIуэкIын мурадхэр щыIэщ. ЖыпIэнурамэ, Зэрэгъыжрэ Безенгирэ  спорт комплексхэр щаухуэнущ. Безенгим Кадыровымрэ Черкесовымрэ я цIэхэр зезыхьэ уэрамхэр къызыхуэтыншэу зэрагъэпэщыжынущ, иджырей модельнэ библиотекэ абы къыщызэIуахынущ.

КъищынэмыщIауэ, Джэрпэджэжрэ Балъкъэр Ипщэмрэ  я курыт еджапIэхэр къагъэщIэрэщIэжынущ. Къэщкъэтау и курыт еджапIэм и пщIантIэм дэт, Хэку зауэшхуэм хэкIуэдахэм я фэеплъыр зыхуей хуагъэзэнущ. Лэжьыгъэхэм къызэщIрагъэубыдэнущ икIи къызыхуэтыншэу зэрагъэпэщыжынущ фэтэр куэду зэхэт унэхэмрэ пщIантIэхэмрэ, фэеплъ зэхуэмыдэхэр, цIыхухэр куэду щызэхуэс щIыпIэхэр, нэгъуэщIхэри, къитащ Шэрэдж щIыналъэ администрацэм и пресс-IуэхущIапIэм. 

ЩЭУЕЙ Былэ.