IэщIагъэлI нэсхэр

Кэнжэ къуажэм щыщ Темукуев Сэлихь иджыблагъэ и узыншагъэр щригъэфIэкIуэжащ Налшык къалэ и Дубки хьэблэм дэт, Медицинэ технологие лъагэхэмкIэ республикэ клиникэ центрым. Сэлихь  къеIэза дохутырхэм фIыщIэ хуащIу къытхуэтхащ  абы и бынхэр.

«Нэгъабэ дыгъагъазэм и 24-м и жэщым си адэ Темукуев Сэлихь Лэкъумэн и къуэр,  и узыншагъэм  хьэлъэу игъэщхьэжагъуэу, къызэIыхьащ. Илъэс 11 хъуауэ абы и гур къоуз, нэхъапэкIэ стенд хагъэувауэ щытащ. Абы лъандэрэ пIалъэкIэрэ и узыншагъэм кIэлъигъэплъу къокIуэкI. Апхуэдэуи абы пкърытт Паркинсон и узыфэри. Сытми, а пщыхьэщхьэм дыкъеджащ «ДэIэпыкъуэгъу псынщIэм», абы и  IэщIагъэлIхэм сымаджэр зыхуэныкъуэ Iэзэгъуэр ирахьэлIащ. И лъыдэуейр лъагэти (200/110), шыIэныгъэшхуэ яхэлъу, ар зэпIэзэрыт хъужыху бгъэдэсащ. Абы папщIэ а гупым фIыщIэ яхудощI.

АрщхьэкIэ пщэдджыжьым ди адэм и щытыкIэр екIэкIуащ. Аргуэру «ДэIэпыкъуэгъу псынщIэм» дыкъеджащ. ЗэкIэлъхьэужьу гупищ къытхуэкIуащ. Ещанэм сымаджэр Кардиоцентрым ишащ.

Къыхэзгъэщыну сыхуейт сымаджэхэр здрашалIэ къудамэм деж щегъэжьауэ дызыхуэза дохутырхэр псори гулъытэ яхэлъу къызэрытпыкъуэкIар. Ди жагъуэ зэрыхъунщи, а къудамэм и дохутырхэм я цIэ-унэцIэхэр къэтщIакъым, ауэ дэтхэнэми икъукIэ дыхуэарэзыщ.

Си адэм и щытыкIэр къапщыта нэужь,  4-нэ кардиологие къудамэм щIагъэгъуэлъхьащ. А IэнатIэм и унафэщI Къул Лианэ Мурадин и пхъур жьы хъуа ди адэ-анэм гуапэу къахущытащ, гулъытэншэ ищIакъым. Пщэдджыжь къэс ар сымаджэхэр зыщIэлъ пэшхэм щIыхьэурэ я щытыкIэм зыщигъэгъуазэрт.  Зи нэгум гуапагъэр кърих бзылъхугъэм и псалъэ гуапэхэмкIэ сымаджэхэм гугъэ яритыжырт мыгувэу я узыншагъэр зэрызэфIэувэжынумкIэ. Дохутырым и псалъэ гуапэри хущхъуэщ, жыхуаIэращи, апхуэдэ гулъытэм сымаджэм дежкIэ мыхьэнэшхуэ иIэщ.

 Паркинсон и узыфэр зыпкърытхэр гурыщхъуэщI, гу махэ мэхъу. Къул Лианэ хузэфIэкIащ ди адэм  бгъэдыхьэкIэ щхьэхуэ къыхуигъуэту, и гур фIы хуэзыщIын псалъэхэр зэхригъэхын. И щытыкIэр зэрыхьэлъэм къыхэкIыу, абы пэш щхьэхуэ хухахри, кIэлъыплъыну ди анэри и гъусэу къыщIанащ.

 «Дэ къыткIэлъыплъ дохутыр Щоджэн Каринэ Владимир и пхъум пщэдджыжь къэс ди Iуэху зыIутыр  зригъащIэрт. ШыIэныгъэ хэлъу сымаджэм и тхьэусыхафэхэм едаIуэрти, зыхуэныкъуэ къэпщытэныгъэхэр, Iэзэгъуэр иубзыхурт. Абы къыдихьэлIа хущхъуэхэм нэхърэ и гулъытэр нэхъыбэу сэбэп къытхуэхъуауэ къысщохъу, - жеIэ ди анэ Темукуевэ Лидие.

 Нобэрей зэман гугъум сымаджэхэм апхуэдэ бгъэдыхьэкIэхэр яхузиIэ дохутыр Iэзэхэр зэрыдиIэр  гуапэщ. Я лэжьыгъэр зыхуэдэр, я зэфIэкIыр здынэсыр дгъэунэхуащи, дэ, шэчыншэу, тхужыIэнущ Налшык  къалэ дэт Кардиоцентрым зыпэрыт Iуэхум фIыуэ хэзыщIэкI, дохутыр тхьэрыIуэм хуэпэж IэщIагъэлI нэсхэр зэрыщылажьэр. Дохъуэхъу абыхэм узыншагъэ яIэну, я унагъуэхэм насып илъыну!»

Зыгъэхьэзырар

ЩхьэщэмыщI Изэщ.