Голливудым папщIэ вакъэ лъэдакъэ лъагэхэр

«Шпильки» жыхуаIэ лъэдакъэ псыгъуэр къигупсысауэ нэхъ хуагъэфащэ итальян Феррагамо Сальваторе. Ауэ модэр зыджхэм иджыри унэцIитI къраIуэ: Вивье Роже, Массаро Раймоне.

Франджым лъэдакъэм и модэр щигъэкIуэтащ вакъэм и модельер Вивье Роже. Диор Кристиан зэригъэцIыхуа нэужь, модельерыр Dior-м щылэжьэн щIидзащ. Роже и вакъэхэр щIэхыу цIэрыIуэ хъуащ. 1952 гъэм Британием и пащтыхь гуащэ Елизаветтэ II Вивье вакъэ иригъэщIат, пащтыхьыгъуэр къыщылъыса махуэм лъитIэгъэну. Вакъэр дыщафэт, удз гъэгъа щIыкIэ зиIэ и лъэдакъэхэм рубин хэгъэпщIат. Вивье вакъэ ирагъэщIырт Дитрих Марлен, Лорен Софи, Бардо Брижит, Тейлор Элизабет сымэ. 1954 гъэм псоми я гум дыхьащ «Stilеtto» лъэдакъэр - папцIэу пыупсыкIа къэрэндащым хуэдэт и щIыкIэр. 1967 гъэм ягъэлъэгъуауэ щытащ «Дневная красавица» фильмыр. ЛIыхъужь нэхъыщхьэ Денев Катрин Вивье ищIа вакъэ лъэдакъэ плIимэр щигъэлъэгъуащ.

Вакъэм и тхыдэм хэтщ Chanel модэ унэм и вакъэщI Массаро Раймон и цIэр. 1960 гъэхэм Дитрих Марлен папщIэ мывэ цIухэр зыхэгъэтIысхьа вакъэ лъэдакъэ лъагэр ищIат.

Модэр зыджхэм къызэралъытэмкIэ, «шпильки» жыхуэтIэ лъэдакъэ лIэужьыгъуэр къэзыгупсысар итальян Феррагамо Сальваторэщ. Ар къыщалъхуа махуэр - бадзэуэгъуэм и 5-р, вакъэ лъэдакъэм и махуэу ягъэувыжащ.

Вакъэм Сальваторе пасэу дихьэхат. Илъэси 9 хъууэ адэ-анэм я унэм къабгъэдэкIри, нэгъуэщI къалэ Iэпхъуат, вакъэ ищIу зигъэсэн папщIэ. Мазэ зыбжанэ нэхъ дэмыкIыу абы япэ вакъэр ищIауэ щытащ и шыпхъум папщIэ. Илъэс 11-м иту Феррагамо вакъэ щащI лъэщапIэ къыщызэIуихащ и адэ-анэм и унэм. Езым и ныбжьу лэжьакIуитIи къищтат. Илъэс 14 щыхъум, лэжьакIуих иIэт. ИужькIэ ар Америкэм Iэпхъуащ. Бостон къалэм вакъэ лъапщхьэ кIыхьхэр щащI унэм щылажьэрт абы и къуэш нэхъыжь. Абы и деж Сальваторе къыщилъэгъуащ вакъэр машинэкIэ зэрадыр. Мазэ зыбжанэкIэ а фабрикэм щылажьэри, и къуэшыр тригъэгушхуащ Калифорнием и гъусэу Iэпхъуэну. Феррагамо зэкъуэшхэм лъэщапIэ къыщызэIуахащ япэ щIыкIэ Санта-Барбара, иужькIэ Голливудым. Вакъэр дахэ къудей мыхъуу, икIи тыншу щытын зэрыхуейм егупсысащ Сальваторе. Калифорнием и университетым анатомие щIэныгъэр щиджащ а псом хищIыкIын папщIэ. Куэд дэмыкIыу Феррагамо и вакъэхэр Голливудым и артистхэм зэбгырах хъуащ. Гарднер Ава, Хепбёрн Одри, Пикфорд Мэри сымэ вакъэхэр яхуидырт.

Бзылъхугъэхэр лъагэ зыщIар

1927 гъэм Феррагамо Италием игъэзэжащ. МылъкуфI зэригъэпэщат, и IэщIагъэм щIэ хилъхьэфырт. Флоренцием вакъэ щад лъэщапIэ къыщызэIуихащ. 1933 гъэм экономикэ щытыкIэ гугъум и зэранкIэ, вакъэ хьэрычэтыр къызэтригъэувыIэн хуей хъуащ. ИтIани, илъэс зыбжанэм и кIуэцIкIэ Iуэхум аргуэру зригъэужьыжащ. 1938 гъэм XIII лIэщIыгъуэм яухуа Spini Feroni уардэунэшхуэр къищэхуащ. ИужькIэ ар и IуэхущIапIэм и хэщIапIэ хъуащ.

 Сальваторе и вакъэхэр щIызэбгырахыр и фIагъ къудейртэкъым, ахэрбзылъхугъэхэр дихьэхын хуэдэу дахэт. 1940 гъэхэм Гуггенхайм Пэгги папщIэ къигупсысащ зи лъэдакъэр Iуву зэдэкIуэ вакъэ. 1947 гъэм Феррагамэ «F» плъыфэр иIэу къигупсыса вакъэм Nermin Marsus саугъэтыр къыхуагъэфэщащ. Ар вакъэм и модэм и саугъэт нэхъ лъагэ дыдэщ.

Вакъэм къыщIих мылъкур щымысхьу тригъэкIуадэрт щIэщыгъуэ гуэрхэр и IэщIагъэм хилъхьэн папщIэ.

Феррагамо 1959 гъэм нэхъыщхьэ дыдэр къехъулIащ. «В джазе только девушки» комедиер Голливудым щагъэлъагъуэрт. Модельерым Монро Мерлин папщIэ ида вакъэ 40-м ящыщу а фильмым зыр цIэрыIуэ щыхъуат. Лъэдакъэр псыгъуэт, лъагэт, екIут. ИужькIэ, езы Феррагамо игу къигъэкIыжт лъэдакъэ лъагэм и щэхухэр къызэрихутар. Нэхъапэхэм лъэдакъэр сантиметрипщIым нэбгъэсыну гугъут - лъэдакъэр псыгъуэмэ, зэпыщIыкIырт. Сыту жыпIэмэ, ар пхъэм къыхащIыкIырт. Абы щыгъуэ егупсысащ гъущIым къыхищIыкIыу фэ трибзэжыну. Апхуэдэу къежьауэ щытащ бзылъхугъэхэм я гум дыхьа лъэдакъэ «шпилькэр».

 ГУГЪУЭТ Заремэ.