Щэхур нахуэ мэхъу

Урысей ФСБ-м и управленэу КъБР-м щыIэм, ­КъБР-м щыIэ МВД-м я лэжьакIуэхэм къэлъыхъуэныгъэхэр ирагъэкIуэкIыу къызэпаудащ илъэс 24-рэ зи ныбжь, республикэм и Лэскэн районым щыпсэу щIалэм илэжь щIэпхъаджагъэр. Ар пыщIат маркировкэхэр зы­темылъ фадэхэкIхэр хабзэншагъэкIэ гъэхьэ­зы­рыным, зыIэрыгъэхьэным, хъумэным икIи  иригъэ­кIын мурадкIи гъэIэпхъуэным. 

Iуэхур щызэхагъэкIым Аргудан къуажэм къыщагъуэтащ контрафакт фадэхэкIхэр къыщыщIагъэкI цех щэху. ХабзэншагъэкIэ ирагъэкIыну ягъэхьэзыра, федеральнэ маркэхэр зытемылъ кумбыгъэ мини 5-м нэблагъэ къытрахащ.
Уголовнэ Iуэху къаIэтащ, УФ-м и 171.1 статьям и 6-нэ Iы­хьэм и «а», «б» пунктхэм, 171.3 статьям и 2-нэ Iыхьэм и «б» пунктым къыщыхьа щIэпхъаджагъэхэр илэжьауэ ягъэ­къуаншэу. Хабзэм къызэригъэувымкIэ, ар илъэси 6-м нэскIэ ягъэтIысынкIэ мэхъу.
Апхуэдэу, а хабзэхъхумэ IэнатIэхэм къыщIагъэщащ  илъэс 21-рэ зи ныбжь, Пермь крайм щыпсэум зэрихьэ хабзэншагъэр. Абы шэч хуащI хамэ къэрал «колл-центрхэм» я сэбэп пылъу япэIэщIэу лажьэ гъэпцIакIуэхэм япыщIауэ. 
КъызэрахутамкIэ, мы гъэм и щIышылэм налшыкдэс цIыхубз гуэрым деж хамэ къэрал мессенджерымкIэ къэпсэлъащ къэрал властым и органхэм я лэжьакIуэу къыжезыIахэр. Абыхэм цIыхубзыр трагъэгушхуащ курьерым сом мелуан 1,4-м нэблагъэ иритыну, и хэхъуэр зыхуэдизыр къэралым Iэмал имыIэу ищIэн зэрыхуейм трагъащIэу, икIи ар зэрибзыщIам папщIэ уголовнэ Iуэху къыхухамыгъэкIынуи къагъэгугъэу.  
Шэч зыхуащIыр яубыдащ, УФ-м и УК-м и 159-нэ статьям и 4-нэ Iыхьэм ипкъ иткIэ уголовнэ Iуэху къаIэтащ. Хабзэм къызэригъэувымкIэ, апхуэдэ щIэпхъаджагъэхэр зылэжьар илъэси 10-м нэскIэ ягъэтIыс.