НОБЭ

Мазаем и 2, блыщхьэ
Псы-псыпцIэ щIыпIэхэм я дунейпсо махуэщ 
Урысейм и Дзэ щIыхьым и махуэщ 
1943 гъэм СССР-м и Совет Нэхъыщхьэм и Президиумым унафэ ищIащ «Хэку зауэшхуэм партизану хэтам» и медалыр, япэ, етIуанэ нагъыщэхэр зиIэр, къащтэну. 
1892 гъэм къалъхуащ хамэ къэралыр псэупIэ зыхуэхъуа ди лъэпкъэгъухэм ящыщ, Кавказыр джыным елэжьа профессор, «Шэрджэсхэр къызытекIар» тхылъыр зи IэдакъэщIэкI Нэмитокъуэ Айтэч. 
1898 гъэм къалъхуащ Франджым и ЛIыхъужь Хьэгъундокъуэ Елмэсхъан. 
1929 гъэм къалъхуащ «Ленин гъуэгу» газетым жэуап зыхь и секретару илъэс куэдкIэ лэжьа, КъБР-м щэнхабзэмкIэ щIыхь зиIэ и лэжьакIуэ Джаурджий Iэбисал. 
1937 гъэм къалъхуащ композитор, Адыгей къэрал университетым гъуазджэхэмкIэ и институтым и япэ ректору щыта, УФ-мрэ АР-мрэ гъуазджэхэмкIэ щIыхь зиIэ я лэжьакIуэ, Кубаным щIыхь зиIэ и егъэджакIуэ, профессор КIыкI Хьисэ. 
 Дунейм и щытыкIэнур
«pogoda.yandex.ru» сайтым зэритымкIэ, республикэм къешх-къесу щыщытынущ. Хуабэр махуэм градуси 2 - 4, жэщым градус 0 - 1 щыхъунущ. 
                                                               Лъэпкъ Iущыгъэ:
Лъакъуэ зышхыр щхьэ шхыгъуи йохуэ.