Электрокъару къэзылэжь IэнатIэм зэрызиужьыр

Республикэм и Iэтащхьэ КIуэкIуэ Казбек лэжьыгъэ IуэхукIэ ­хуэзащ «Кавказ Ищхъэрэм и Россети» ПАО-м и  унафэщI нэхъыщхьэ Левченкэ Роман. КъулыкъущIэхэр шэщIауэ теп­сэ­лъы­хьащ электро­къару къэзылэжь IэнатIэм ди щIыналъэм адэкIи зэрызыщегъэужьыпхъэм ехьэлIа Iуэхухэм. 

КъыкIэлъыкIуэу КIуэкIуэ Казбекрэ Левченкэ Романрэ зэ­гъусэу ирагъэкIуэкIащ КъБР-м и Правительствэм хэтхэр, ди щIыналъэм и элекрокъару IэнатIэм и пашэхэр къызрихьэлIа зэIущIэ купщIафIэ. Абы щытепсэлъыхьащ республикэм электрокъару къы­щызылэжь IуэхущIапIэхэм мылъку хэлъхьэн, зэманым къигъэув мардэхэм хуэкIуэу зегъэужьын, лэжьэкIэщIэхэр къэгъэсэбэпын зэры­хуейм.  
КъыхагъэбелджылыкIа Iуэхугъуэхэм ящыщщ цIыхухэр, IэнатIэхэр электрокъарукIэ къызэгъэпэщыным и фIагъым зэрыхэгъэхъуа­пхъэм, апхуэдэуи электроэнергием щыщу мыхьэнэ имыIэу кIуэдым и бжыгъэр гъэмэщIэным гулъытэшхуэ зэрыхуэщIы­пхъэм ехьэлIахэр. ЗэIущIэм зэрыщыжаIамкIэ, щIыналъэм и экономикэм зэрызиужь, жылэхэм унагъуэщIэхэр зэрыщытIыс зэ­пытыр къэлъытауэ, абы те­кIуадэ электрокъарур къэзылэжь IэнатIэм Iэмал имыIэу зегъэужьын хуейщ, а псоми пэлъэщын хуэдэу. 
КъБР-м и Iэтащхьэ КIуэкIуэ Казбек фIыщIэ хуищIащ Левченкэ Роман, щIыналъэм къыхуищI гулъытэмрэ зи пашэ IэнатIэм щекIуэкI лэжьыгъэм зиужьынымкIэ жэуаплыныгъэ лъагэ зэрызыхищIэмрэ папщIэ. Абы тегъэчыныхьауэ жиIащ зэгъусэу зэфIах Iуэхугъуэ псоми цIыхухэм я гъащIэм и фIагъыр къызэриIэтынур, республикэм и ­энергетикэ IэнатIэмрэ экономикэмрэ зыужьыныгъэфI къазэрыхуихьынур.