Высоцкий Владимир

ЩIышылэм и 25-м къалъхуащ зи IэдакъэщIэкIхэр сытым дежи игъуэ, зи уэрэдхэм къытедгъазэурэ дыщIэдэIу, совет зэманым трахауэ щыта фильмхэм щытлъагъу уэрэджыIакIуэ, театрымрэ киномрэ я актёр, усакIуэ, уэрэдус Высоцкий Владимир.

1938 гъэм ар Москва къыщалъхуащ, Мещанскэ уэрам бгъуфIэм тетт унагъуэр зыщыпсэу фэтэрыр. И адэр зауэлI-связистт, и анэр зэдзэкIакIуэ-референтт. Хэку зауэшхуэр къыщыхъеям Высоцкэр цIыкIут, и анэм щIыгъуу Оренбург областым Iэпхъуауэ щытащ. Зауэ нэужьым щIалэ цIыкIум и сабиигъуэр пIалъэкIэ щигъэкIуащ Германием, абы къулыкъу щызыщIэ и адэм щIыгъуу. Москва къигъэзэжащ 1949 гъэм.

ЗэрыцIыкIурэ театр утыкум зэIэпишэрт, школым щыщIэсым драмэмкIэ гупжьей кIуэрт фIэфIу. Класс нэхъыжьхэм щIэсу усэ зэхилъхьэу, макъамэ щIигъэувэу къиублащ. Высоцкэм и япэ гитарэр илъэс 17 щрикъум къыхуищэхуат и анэм. Курыт еджапIэр къиухри, Москва инженер-ухуакIуэ институтым щIэтIысхьащ благъэхэм я чэнджэщкIэ. Езыр зэхъуапсэр актёр IэщIагъэрати, илъэс ныкъуэ фIэкIа емыджэу институтым къыщIэкIыжащ.

1956 гъэм Высоцкий Владимир щIэтIысхьащ МХАТ-м и школ-студием. Студиер къиуха нэужь, Пушкиным и цIэр зезыхьэ театрым щылэжьащ. 1964 гъэм Таганкэм щыIэ театрым, Любимов Юрий и деж кIуэри, абы щыIащ, щылэжьащ псэуху. Гитарэр къищтэри, уэрэд жиIат Высоцкэм. Любимовыр абыкIэ къыдихьэхащ. «Уэрэд жиIэн щIидза нэужь, дакъикъэ 45-кIэ щыму седэIуащ, Iуэху куэд сиIэ пэтми», - жиIащ иужьым. Таганкэм и утыкум щигъэзэщIащ роль 20-м щIигъу. «Пугачёв», «Жизнь Галилея», «Вишнёвый сад», «Преступление и наказание» спектаклхэм, нэгъуэщIхэми щыджэгуащ. ЦIыхухэм псом нэхъри нэхъ къыхагъэщу ягу къинащ ар 1971 гъэм Любимов Юрий игъэува спектаклым Гамлету зэрыщыджэгуар.

Высоцкэр фильм 25-м хэтащ. Иужьу, 1979 гъэм щыджэгуащ «Место встречи изменить нельзя» сериалым. Высоцкэр капитан Жеглов Глебт.

1960 гъэхэм и кIэхэм Высоцкий Владимир нэхъ зритащ уэрэдхэр тхыным, гъэзэщIэным. Абы и уэрэдхэр радиом, телевидением къатырт, цIыхубэм гукIэ ящIэрт. Псори зэхэту уэрэд 600-м нэблагъэ, усэ 200-м щIигъу итхащ. Уэрэдус-уэрэджыIакIуэм концертхэр щитырт СССР-ми хамэ къэралхэми. «Я не люблю», «Кони привередливые», «На братских могилах» жыхуиIэхэр цIыху мелуанхэм гукIэ ящIэрт. Ахэр зэгуэр зэхэзыхахэм иджыри я дзапэ уэрэдщ.

1980 гъэм мэлыжьыхьым и 16 Ленинград БДТ-м иужьрей концертыр щитащ Высоцкэм. Бадзэуэгъуэм и 27-м «Гамлет» спектаклыр екIуэкIын хуейт. Ауэ махуитI ипэ иту, езыр дунейм ехыжат. 1986 гъэм Высоцкий Владимир, езыр щымыIэжу, РСФСР-м щIыхь зиIэ и артист цIэ лъапIэр къыхуагъэфэщащ.