КъБР-м и Музыкэ театрым щагъэлъэпIащ Артистым и махуэр. Ар мы гъэм япэу екIуэкIащ, актёр цIэрыIуэ Станиславский Константин къыщалъхуа махуэрщ зытрагъэхуари.
Пшыхь гуапэм щызэхуэсат республикэм и щэнхабзэмрэ гъуазджэмрэ я лэжьакIуэхэр, театреплъхэр.
IуэхущIапIэм и пэIущIэ пэшым, япэ, етIуанэ къатхэм щагъэуват Къэбэрдей-Балъкъэрым и щэнхабзэр къэзыгъэлъагъуэ сурэтхэр, концертхэмрэ спектаклхэмрэ я афишэхэр, декорацэхэм я макетхэр, концертхэмрэ спекталхэмрэ хэт артистхэм я фэилъхьэгъуэ нэхъыфIхэр, нэгъуэщIхэри.
Пшыхьыр ирагъэкIуэкIащ Горький Максим и цIэр зезыхьэ Урыс къэрал драмэ театрым и актёр Мизиев Аубэчыррэ КъБР-м щIыхь зиIэ и артисткэ, ЩоджэнцIыкIу Алий и цIэр зезыхьэ Къэбэрдей къэрал драмэ театрым и артисткэ Тхьэщыгъуей Жаннэрэ.
Пшыхьыр ирагъэжьащ Вознесенский Андрей и псалъэхэмрэ Паулс Раймонд и макъамэмрэ зыщIэлъ «Я вам спою ещё на бис» уэрэдымкIэ. Ар зэдагъэзэщIащ Музыкэ театрым и хорым хэтхэу Атмурзаевэ Танзиля, Абэнокъуэ Альмирэ, Теунэ Джэмал сымэ.
- Ягу, я псэ театреплъхэм тыхь яхуэзыщI, цIыхубэм яхуэгуапэ артистхэм пщIэрэ щIыхьрэ яхуэфащэщ. Аращ Артистым и махуэр ягъэлъэпIэну япэу къыщIыхалъхьар, – жиIащ КъБР-м щэнхабзэмкIэ и министр Къумахуэ Мухьэдин. – Мамырыгъэ, гуфIэгъуэ, ехъулIэныгъэ фи щхьэкIи фи унагъуэкIи фиIэну сынывохъуэхъу!
Къумахуэ Мухьэдин зи унафэщI министерствэм къыбгъэдэкI щIыхь тхылъыр зыхуагъэфэщахэм яритащ. Езы Мухьэдини абдеж щратыжащ УФ-м и Театр лэжьакIуэхэм я зэгухьэныгъэм и унафэщI Машков Владимир къыхуигъэхьа щIыхь тхылъыр, республикэм и театр гъуазджэмрэ щэнхабзэмрэ хуищIа хэлъхьэныгъэхэм папщIэ.
Машков Владимир артистхэм къазэрехъуэхъур экранымкIэ къагъэлъэгъуащ. Абы жиIащ я зэгухьэныгъэр илъэси 150-рэ щрикъум, Станиславский Константин къыщалъхуа махуэм, щIышылэм и 17-м, ирихьэлIэу Артистым и махуэр япэу мы гъэм зэрагъэлъапIэр, абы теухуа зэхыхьэхэр, фестивалхэр, концертхэр, гъэлъэгъуэныгъэхэр щIыналъэ псоми къызэрыщызэрагъэпэщынур. Абы артистхэм захуигъэзащ узыншагъэ, ехъулIэныгъэ, зэфIэкI, театреплъхэм я лъагъуныгъэ яIэну.
КъБР-м и профсоюзхэм я зэгухьэныгъэм и унафэщI Амщокъуэ ФатIимэтрэ КъБР-м и Театр лэжьакIуэхэм я зэгухьэныгъэм и унафэщI Фырэ Майерэ зи махуэр зыгъэлъапIэ, гу къабзэрэ псэ хьэлэлкIэ зи IэнатIэм пэрыт артистхэм зыхуагъэзащ театреплъхэр къахуэарэзырэ узыншагъэ яIэу утыкур ягъэбжьыфIэну, я Iэзагъэм хагъэхъуэну, ехъулIэныгъэ яIэу я лэжьыгъэр ирахьэкIыну икIи зи унафэщI IуэхущIапIэхэм къабгъэдэкI щIыхь тхылъхэр зыхуагъэфэщахэм иратыжащ
Къэбэрдей-Балъкъэрым и щэнхабзэмрэ гъуазджэмрэ зегъэужьыным хуащI хэлъхьэныгъэхэр къалъытэри, я махуэшхуэм ирихьэлIэу пшыхьым щагъэлъэпIащ ЩоджэнцIыкIу Алий и цIэр зезыхьэ Къэбэрдей къэрал драмэ театрым, Кулиев Къайсын и цIэр зезыхьэ Балъкъэр къэрал драмэ театрым, Горький Максим и цIэр зезыхьэ Урыс къэрал драмэ театрым, КъБР-м и Музыкэ театрым, Темыркъан Борис и цIэр зезыхьэ Къэбэрдей-Балъкъэр къэрал филармонием, Республикэм и Гуащэ театрым, НыбжьыщIэ театрым, «Кабардинка», «Балкария», «Терские казаки» къэфакIуэ ансамблхэм я артистхэр.
ЩоджэнцIыкIу Алий и цIэр зезыхьэ Къэбэрдей Къэрал драмэ театрым и артистхэр усэ къеджащ. УФ-м щIыхь зиIэ и артисткэ, КъБР-м и цIыхубэ артисткэ ЖьакIэмыхъу КIунэ къеджащ «Варварэ» пьесэм щыщ «Актрисэ» монологым. КъБР-м и Музыкэ театрым и артистхэм ягъэлъэгъуащ Кальман и «Сильва» опереттэм щыщ пычыгъуэ. КъБР-м и цIыхубэ артист Балъкъэр Юрэ, УФ-м щIыхь зиIэ и артист Шыбзыхъуэ Басир, КъБР-м и цIыхубэ артист Жангуразов Мажид сымэ къеджащ Шекспир Вильям, Бештокъуэ Хьэбас, Кулиев Къайсын сымэ я усэхэм. НыбжьыщIэ театрым и артистхэу Жашуев Мухьэмэдрэ Къэшэж Дисанэрэ къеджащ Гафт Валентин и «О, театр!» усэм. КъБРм и Музыкэ театрым и балетым хэт Къущхьэ Камиллэ игъэзэщIащ «Эсмеральда» балетым щыщ пычыгъуэ. АдэкIэ пшыхьыр ягъэдэхащ «Кабардинка», «Балкария», «Терские казаки» къэфакIуэ ансамблхэм, КъБР-м и Къэрал филармонием и уэрэджыIакIуэ Гуазэ Тимур, КъБР-м и Гуащэ театрым, Кулиев Къайсын и цIэр зезыхьэ Балъкъэр къэрал драмэ театрым я артистхэм. Концертым хэта псоми утыкум щызэдагъэзэщIащ «Виват, Артист» уэрэдыр икIи абыкIэ пшыхьыр зэхуащIыжащ.
Артистым и махуэм ирихьэлIэу, ПащIэ Бэчмырзэ и цIэр зезыхьэ республикэ Сабий библиотекэм Налшык къалэм и школ №23-м и еджакIуэхэмрэ артистхэмрэ я зэIущIэ къыщызэрагъэпэщащ. Абы ирагъэблэгъащ Кулиев Къайсын и цIэр зезыхьэ Балъкъэр къэрал драмэ театрым и унафэщI Жангуразов Мажидрэ ЩоджэнцIыкIу Алий и цIэр зезыхьэ Къэбэрдей къэрал драмэ театрым и артисткэ Мысостышхуэ Маринэрэ. ХьэщIэхэр ныбжьыщIэхэм яхутепсэлъыхьащ актёр Iэзагъэм и щэхухэм, я лэжьыгъэм епха Iуэху гукъинэжхэм, я IэщIагъэм хэлъ гугъуехьхэм.
НыбжьыщIэхэри куэдым щIэупщIащ: утыкум умыукIытэу узэритыным, псалъэхэр пщыгъупщэжмэ пщIэнум, ролыр псынщIэу зэрызэбгъэхъулIэнум, нэгъуэщIхэми. КъыжыIапхъэщ, мы IуэхущIапIэм еджакIуэхэм папщIэ тхакIуэхэм, усакIуэхэм, щэнхабзэм и лэжьакIуэхэм я зэIущIэхэр щIэх-щIэхыурэ зэрыщрагъэкIуэкIыр.
