Нэхъыжьхэр трагъэгушхуэ

ГъащIэр узыншэу ехьэкIыным телажьэ «Анна» валеологие клубым и щIыналъэ къудамэм хэтхэм, КъБР-м Лъэпкъ Iуэхухэмрэ жылагъуэ проектхэмкIэ и министерствэм и субсидие къэхьынымкIэ республикэ зэпеуэм зэрыщытекIуам и фIыгъэкIэ, «Ремесел древних новизна» грант Iуэхум хыхьэу гъэлъэгъуэныгъэ къызэрагъэпэщащ. Ар и жэрдэмщ клубым и унафэщI Жиздюк Маринэ. КъБР-м ЦIыхубэ IэпщIэлъапщIагъэмрэ IэпэIэсагъэмкIэ и центрым декоративно-прикладной гъуазджэм щыщ лэжьыгъэхэр щагъэлъагъуэ,

Iуэхур къыхалъхьащ ди нэхъыжь IэпщIэлъапщIэхэм я зэфIэкIыр къызэкъуахын, дэзыхьэх лэжьыгъэм нэхъри трагъэгушхуэн, я щыIэкIэ-псэукIэр ирагъэфIэкIуэн папщIэ.

Лэжьыгъэхэр щIэщыгъуэ ящыхъуащ выставкэм зрезыгъэхьэлIахэм. IуэхущIапIэм и пэшыр ИлъэсыщIэ таурыхъым хуэдэт, абы щагъэува сурэтхэмрэ хьэпшыпхэмрэ апхуэдизкIэ телъыджэти. Ахэр я Iэдакъэ къыщIэкIащ IэпщIэлъапщIэ, егъэджакIуэ Мысачэ Верэ и унафэм щIэт IэпэIэсэхэм. Гъэлъэгъуэныгъэм лэжьыгъэ 70-м нэблагъэ къызэщIеубыдэр. Абы щыболъагъу гуащэхэр, удз гъэгъахэр, гъащIэм узыщрихьэлIэ теплъэгъуэхэр.

КъБР-м и Парламентым ЩэнхабзэмкIэ, граждан жылагъуэм зегъэужьынымрэ хъыбарегъащIэ IуэхухэмкIэ и комитетым и унафэщI Текуев Амурбий къызэIуихащ гъэлъэгъуэныгъэр. Абы жиIащ республикэм щыпсэу, зэфIэкI зиIэ нэхъыжьыфIхэм я лэжьыгъэ щIэщыгъуэхэм япэу зэрызыхигъэгъуэзар, РАХ-м и президент Церетели Василий ди щIыналъэм къыщыкIуам ХудожествэхэмкIэ академием и къудамэ ди щIыпIэм къыщызэIухын зэрыхуейм и гугъу зэращIар, республикэм ис щIалэгъуалэм IэпэIэсагъэмкIэ щIэныгъэ зрагъэгъуэтыну Iэмал яIэн папщIэ. Текуев Амурбий гъэлъэгъуэныгъэм хэт IэпщIэлъапщIэхэм фIыщIэ яхуищIащ, пасэрей цIыхубэ IэщIагъэ дахэр зэрахъумэмрэ я IэдакъэщIэкIхэр зэрыкупщIафIэмрэ папщIэ.

Выставкэм зыкърагъэхьэлIащ КъБР-м Лъэпкъ Iуэхухэмрэ жылагъуэ проектхэмкIэ и министерствэм и къудамэм и унафэщI Куэцэ Эльбердрэ а къудамэм и IэщIагъэлI нэхъыщхьэ Шевченкэ Аллэрэ. Зи лIыкIуэ министерствэм Iуэху гъэщIэгъуэн куэд цIыхухэм зэрадиIыгъым, псэгъэгуфIэ-дахагъэ зыхэлъ мы зэхыхьэри абыхэм зэращыщым къытеувыIащ ахэр. Зэхуэсахэм абыхэм ягу къагъэкIыжащ къэралым ис нэхъыжьхэм я гъащIэр нэхъ кIыхь ящIыным, ядэIэпыкъуным телэжьэну УФ-м и Президентым и унафэм пщэрылъ къазэрыщищIыр. Выставкэр зи жэрдэмым, ар къызэзыгъэпэщахэмрэ абы хэтахэмрэ фIыщIэ хуащIащ, я ехъулIэныгъэхэм зэрыригушхуэри дыщIагъужащ.

- Гъэлъэгъуэныгъэм щыфлъагъу хьэпшыпхэм ящыщ куэд къызыхащIыкIа нартыху тхьэмпэр тхылъымпIэмрэ щэкIымрэ хуэдэу гъущэщ икIи мащIэу «ткIийщ», псы тIэкIу лъэбгъэIэсмэ, «жыIэдаIуэ» мэхъу. Пасэм абы кIапсэхэр, матэхэр, арджэнхэр, сабий вакъэхэр къыхащIыкIыу, абджыпс хьэпшыпхэм ар кърашэкIыу щытащ. Иджырей IэпщIэлъапщIэхэм нартыху тхьэмпэхэр къагъэсэбэпурэ гъуазджэ лэжьыгъэхэр ящI, - жиIащ Мысачэ Верэ.

КъБР-м ЦIыхубэ IэпщIэлъапщIагъэмрэ IэпэIэсагъэмкIэ и центрым и унафэщI Урыс Аслъэни арэзы техъуащ нартыху тхьэмпэм лэжьыгъэ щIэщыгъуэхэр къыхащIыкIыну Iэмал зэраIэм, абыхэм щIэупщIэр зэрыкуэдым. Абы щIигъужащ апхуэдэ хьэпшып зыбжанэкIэ я центрыр игъэдэхэну зэримурадыр.

- КъБР-м ЩэнхабзэмкIэ и министерствэмрэ Налшык къалэ администрацэмрэ я унафэкIэ, Мысачэ Верэ пэш хухахынущ, щылэжьэну, IэпщIэлъапщIагъэм щыхуигъэсэну. Абы екIуалIэ хъунущ пенсэм кIуа нэхъыжьхэр, апхуэдэ лэжьыгъэм гупыж хуэзыщI псори. Абы сурэтхэр, алэрыбгъухэр, нэгъуэщI гъуазджэ лэжьыгъэхэр щащIыну Iэмал яIэщ, - жиIащ Урыс Аслъэн. – Къапщтэмэ, ди центрым къекIуалIэхэр иджыпсту унэтIыныгъэ 12-м худогъаджэ. Ахэм ящыщщ лъэпкъ фэилъхьэгъуэхэмрэ вакъэхэмрэ дыныр, дыщэкI IэщIагъэр, кхъуэщын гъуазджэр, хьэпшыпхэр пхъэм къыхэIущIыкIыныр, нэгъуэщIхэри. Ди лэжьыгъэр зытеухуар Налшык дэсхэм я зэманыр гъэщIэгъуэну икIи щхьэпэу ягъэкIуэнырщ.

Жиздюк Маринэ и псалъэм къыхигъэщащ я зэфIэкIхэм адэкIи хагъэхъуэну зэрамурадыр. Гъэлъэгъуэныгъэм хэтахэм щIыхь тхылъхэмрэ сертификатхэмрэ иратащ. Зэхыхьэр ягъэдэхащ икIи абы зыкърезыгъэхьэлIахэм я нэгу зрагъэужьащ уэрэджыIакIуэ-макъамэ Iэмэпсымэхэм еуэ «Поющие укулеле» гупым, уэрэджыIакIуэ Шэрий Маринэ, артист Дым Эльдар.