Я нэгу зыщрагъэужь

 Налшык къалэ дэт зоопаркым и Iэгъуэблагъэм мэлыжьыхьым и 15-м псом хуэмыдэжу цIыху куэд къыщызэхуэсат - сабийхэр зи Iэпэгъу балигъхэр мыбы къэкIуат къызэIуа­ха хыжьей IэрыщI цIы­кIумрэ гуэлым и щхьэфэм щес къуалэ гъэщIэгъуэнхэмрэ зрагъэлъагъун пап­щIэ.

 Абы и закъуэкъым цIыхухэр дэзыхьэхар. Псэущхьэхэм, хьэкIэкхъуэкIэхэм я хэщIапIэ зэрагъэпэщыжар а махуэм къызэхэ­зыкIухьа цIыхухэм ялъэгъуа псори яфIэтелъыджэт. Псалъэм папщIэ, сабийхэм щхьэкIэ къызэIуаха къалэ цIыкIум нэхъыщIэ дыдэхэм я Iэпкълъэпкъым зыщрагъэукъуэдий, къыщажыхь хъунущ. Псыгуэным и Iэ­гъуэблагъэри зыгъэпсэху­пIэ телъыджэщ. Мыбдежым иIэщ уезэшамэ, ущетIысэх хъуну тетIысхьэпIэ зыкъи­зыххэри тIэкIу къэмэжэлIахэр щызэIурыу хъуну гъэ­махуэ шхапIэ цIыкIури. Хыжьей IэрыщIым тIэкIу пыIукIуэтауэ щыхасащ мэз кусэ цIыкIуу нэр зытеплъы­зэ­хэмрэ жыгыщIэхэмрэ. Хы­жьейм тес жьэдзыуэ (жьэкъэп, пеликан) ды­жьы­ныфэм, къыу (хьэр­зэ, ле­бедь), псыджэд цIыкIу­хэм зэрызащIым, зэрызыкърахым укIэлъы­плъынри тхъэгъуэщ, псэр зыгъэгуфIэщ.
 Зи гугъу тщIы махуэм и пэ къихуэу зоопаркым щыIахэм ялъэгъуащ хьэкIэ­кхъуэкIэхэм я «хэщIапIэм» лэжьыгъэшхуэ зэрыщрагъэкIуэкIар - гектарым нэ­б­ла­гъэр къагъэщIэрэщIэжащ, ягъэдэхащ. Хыжьей IэрыщIым и кум щащIа хытIыгу цIыкIум къуалэхэм папщIэ пхъэм къыхэщIыкIа абгъуэхэр трагъэбыды­хьащ. Псыгуэным ихъуре­ягъкIэ бжыхьхэр кърагъэувэкIащ, и кIуэцIым щы­псэухэм зыри зэран яхуэ­мыхъун хуэдэу.

КЪУМАХУЭ Аслъэн.

Свежие номера газет Адыгэ псалъэ


21.06.2017
20.06.2017
19.06.2017
16.06.2017