Эпидемиологие щытыкIэм топсэлъыхь

Видеоконференц жыпхъэм иту КъБР-м и Iэтащхьэ КIуэкIуэ Казбек хэтащ Кавказ Ищхъэрэ федеральнэ щIыналъэм и цIыхухэм я санитар-эпидемиологие щы­тыкIэр егъэфIэкIуэным теухуа зэIущIэм. Ар ирагъэкIуэкIащ УФ-м и Президентым и полномочнэ лIыкIуэу КИФЩI-м щыIэ Чайкэ Юрийрэ «Рос­потребнадзор»-м и унафэщI Поповэ Аннэрэ.

ЩIыналъэхэм щыIэ эпидемие щытыкIэм и гугъу ящIащ «Роспотребнадзор»-м и къудамэу хэгъэгухэм щы­лажьэ IуэхущIапIэхэм я унафэщIхэм. ЗэIущIэм щы­тепсэлъыхьащ эпидемиологие кIэлъыплъыныгъэр къызэгъэпэщыным теухуа Iуэхухэм, апхуэдэуи Кавказ Ищхъэрэ федеральнэ округым и щIыналъэхэм эпидемиер къыщымыгъэхъунымкIэ, абы пэщIэтынымкIэ Iэмалхэр гъэзэщIа зэрыхъунум.
Къэбэрдей-Балъкъэрым къыбгъэдэкIыу зэIущIэм хэтащ КъБР-м и Правительствэм и УнафэщIым и къуэдзэ Хъубий Маратрэ «Роспотребнадзор»-м и къудамэу республикэм щыIэм и унафэщI Пагуэ Жыраслъэнрэ.