ТекIуэныгъэм и уасэр

1945 гъэм мэлыжьыхьым и 29-м Берлин и къалэкум зэхэуэ гуащIэхэр щекIуэкIащ. Маршал Жуков Г. К. унафэ ткIий яхуещI генералхэу Чуйков, Берзарин, Кузнецов, фронтым и штабым и унафэщI, генерал Малинин сымэ махуитI-щым къриубыдэу зауэр ухын хуейуэ.

* * *

Мэлыжьыхьым и 30-м пщэдджыжьым жьыуэ советыдзэхэм Берлин и Рейхстагым ебгъэрыкIуэн щIадзэ. Махуэ псом зэхэуэ гуащIэхэр екIуэкIащ.

Мыбдежым бийм щыфIэкIуэдащ сэлэтрэ офицеру 2.500-рэ, топу 28-рэ, фочрэ автомату 1.800-рэ, танкыу 15. Нэмыцэ 2.604-рэ гъэр щыхъуащ. Ныкъыгъэм и 1-м пщэдджыжьым жьыуэ бийм зыкъитащ. 3-нэ армэм и командующэ генерал Кузнецов В. И. Маршал Жуков Г. К. хъыбар иригъэщIащ сержантхэу Егоров Михаилрэ Кантарие Мелитонрэ ТекIуэныгъэм и бэракъыр Рейхстагыщхьэм зэрыщыфIадзамкIэ.

* * *

Мэлыжьыхьым и 30-м сыхьэти 10-м полковник Марченкэ Е. Т. зи командир, гвардием и фочауэ дивизэм Германием и канцелярием ебгъэрыкIуэу щIидзащ. Абы хэтт Гитлер и бункерыр, гъущIрэ бетонкIэ къищIыкIар. Ар фIыуэ зэщIэузэда цIыху минитхум яхъумэрт. Бункерым хэтт унафэщ1хэр зыщ1эсыр, генерал Вейдлинг и связым и узелыр. Мы бункерым папщIэ икъукIэ зауэ гуащIэ екIуэкIащ.

* * *

Накъыгъэм и 2-м советыдзэхэм къанэ щымыIэу Берлин къащтащ.

* * *

Накъыгъэм и 8-м Берлин и къуэкIыпIэ лъэныкъуэм щыIэ Карлсхост щIыпIэм Iэ щытрадзащ Германием псалъэмакъыншэу зыкъызэритымкIэ актым. А махуэ дыдэм ди къэралым и щыхьэр Москва топ 324-рэ 24-рэ салют щагъэуащ ТекIуэныгъэм Иным и щIыхькIэ.

* * *

Берлин къыщащтэм зэрахьа лIыгъэмрэ къагъэлъэгъуа хахуагъэмрэ папщIэ зауэлI 600-м Совет Союзым и ЛIыхъужь цIэ лъапIэр фIащащ, цIыху 13-м ЛIыхъужьым и Дыщэ Вагъуэр етIуанэу иратащ. ЗауэлI мелуанрэ мин 82-м «Берлин къызэращтам папщIэ» медалыр хуагъэфэщащ.

* * *

Накъыгъэм и 24-м Сталин Иосиф Кремлым и Уардэунэм и Георгиевскэ залышхуэм ТекIуэныгъэм и щIыхькIэ иригъэблэгъащ КПСС-м и ЦК-м, Правительствэм хэтхэр, зауэлIхэр, еджагъэшхуэхэр, 1энат1э зэмыл1эужьыгъуэхэм щыпашэхэр, щIэныгъэм, щэнхабзэм я лIыкIуэхэр – псори цIыху миным нэс. Дзэзешэ пашэхэу, Совет Союзым и Маршалхэу Жуков Г. К., Конев И. С., Рокоссовский К. К., Толбухин Ф. И., Малиновский Р. Я. сымэ орден нэхъ лъапIэ дыдэр – «ТекIуэныгъэ» орденыр иратащ.

* * *

Мэкъуауэгъуэм и 24-м Москва и Утыку Плъыжьым ТекIуэныгъэм и парад щызэхэтащ. Ар езыгъэкIуэкIар Маршалхэу Рокоссовский К. К., Жуков Г. К. сымэщ.

Мыбы ТекIуэныгъэм и ныпу 360-рэ щыблахащ, фашист бэракъыу 200 щыхыфIадзащ.