Хэкум теухуа уэрэдхэр ягъэзащIэ

Вэрокъуэ Владимир и цIэр зезыхьэ КъБР-м ЩэнхабзэмкIэ и фондым щекIуэкIащ ­«Гъат­хэ макъамэхэр» зэхыхьэр. Хэку зауэшхуэм ТекIуэныгъэ Иныр къы­зэрыщахьам, Къэбэр­дей-Балъкъэрым и къэралыгъуэр илъэ­си 100 зэрырикъум  я щIыхь­кIэ къы­зэрагъэпэща пшы­хьым щыжаIащ Хэкум, зауэм теухуа уэрэдхэр.

Абы ирагъэблэгъащ республикэм и лъэпкъ щэнхабзэ центрхэр. Концертым и япэ Iыхьэм КъБР-м гъуазджэхэмкIэ щIыхь зиIэ и лэ­жьакIуэ Гридасов Геннадий зи художественнэ уна­фэщI, республикэм и «Эстафета» академическэ хорым хэтхэм зауэм теухуа уэрэд нэхъыфIхэр, иджы­рей композиторхэм ятхахэри хы­хьэу, ягъэзэщIащ. Псом хуэ­мыдэу кърихьэлIахэм ягу дыхьэу дежьууащ «Весна сорок пятого года», «Парижское танго» уэрэдхэм.
Концертым и етIуанэ Iыхьэм зыкъыщигъэлъэгъуащ Гъуазджэ­хэмкIэ Кавказ Ищхъэрэ къэрал институтым щэнхабзэмрэ гъуазджэмкIэ и кол­леджым и хорым.
- Колледжыр 1957 гъэм къы­зэрызэIуахрэ хор иIэщ. Дирижёр ­къудамэр къэзыух студентиплIми фи пащхьэм зыкъыщагъэлъэ­гъуэ­нущ, экзаменым хуагъэ­хьэзыра уэрэдхэм фрагъэдаIуэу, - жиIащ Гридасов Геннадий и гъэсэнхэр утыку къыщришэм.
Хорым игъэзэщIащ Бабаджанян Арно и уэрэдхэр,­ Римский-Корсаков Николайрэ Джей­к­обсон Лаурэрэ, УФ-м гъуаз­джэхэмкIэ щIыхь зиIэ и лэжьакIуэ, КъБР-м и цIыхубэ артист ХьэIупэ ДжэбрэIил сымэ я IэдакъэщIэкIхэм щыщ.