Къэбэрдей-Балъкъэр Республикэм и Iэтащхьэр ЩIыналъэ зыужьыныгъэмкIэ къэрал комиссэм и зэIущIэм хэтащ. Ар иригъэкIуэкIащ УФ-м и Правительствэм и УнафэщIым и къуэдзэ Хуснуллин Марат. ЗэIущIэм къыщыпсэлъащ УФ-м Ухуэныгъэмрэ псэупIэ-коммунальнэ хозяйствэмкIэ и министр Файзуллин Ирек, къэрал къулыкъущIапIэ зыбжанэм я IэщIагъэлIхэр.
ЗэIущIэм щызэпкърахащ къэралпсо икIи щIыналъэ проектхэр зэрагъэзащIэ щIыкIэр, и гугъу щащIащ ухуэныгъэхэр, гъуэгу лэжьыгъэхэр зэрекIуэкIым. Апхуэдэу къулыкъущIэхэр тепсэлъыхьащ ухуэныгъэхэр егъэжьэным икIи щIэгъэхуэбжьэным, жьы хъуа псэупIэхэр зэгъэпэщыжыным, жылагъуэ IуэхущIапIэхэмрэ IэнатIэхэмрэ егъэфIэкIуэным мылъку яхуэутIыпщыным хуэунэтIауэ щIыналъэхэм щыIэ щытыкIэм теухуа хъыбар къызэрырагъащIэ щIыкIэм, абыхэм яхэплъэн зэрыхуейм. Фигу къэдгъэкIыжынщи, ди хэгъэгум щаухуэнущ километр 77-м щIигъу зи кIыхьагъ Бахъсэн псыжапIэ бжьамийр. Къэрал бюджетым къыхэкIыу абы трагъэкIуэдэнущ сом мелардитIым щIигъу.
«Егъэджэныгъэ» къэралпсо проектым ипкъ иткIэ къыхалъхьа «Иджырей еджапIэ» лъэпкъ проектым хэт «Еджэныгъэ» программэр зэрагъэзащIэми шэщIауэ зэIущIэм щытепсэлъыхьащ. Программэм тету Къэбэрдей-Балъкъэрым еджапIэ унипщI щаухуэн хуейщ. Абы хохьэ Налшык къалэм (цIыху 1500-рэ щIэхуэу), Бахъсэн къалэм (цIыху 1224-рэ щIэхуэу), Псынабэ (цIыхуи 150-рэ щIэхуэу), Сэрмакъ (цIыху 275-рэ щIэхуэу), Май къалэм (цIыху 330-рэ щIэхуэу), Куба (цIыхуи 165-рэ щIэхуэу), Красносельскэ (цIыху 500 щIэхуэу), Нарткъалэ (цIыху 500 щIэхуэу), Прохладнэ къалэм (зым цIыху 560-рэ, адрейм цIыху 785-рэ щIэхуэу) дащIыхьыну еджапIэхэр. Апхуэдэу дызэрыт илъэсым и фокIадэм ирихьэлIэу Бахъсэн къалэ дэт еджапIитIым - Лермонтов Михаил и цIэр зезыхьэ курыт еджапIэ №6-мрэ Къардэн Бубэ и цIэр зезыхьэ курыт еджапIэ №10-мрэ, Ташлы-Тала дэт курыт еджапIэм хэту зи еджапIэ кIуэгъуэ мыхъуахэм папщIэ сабий гъэсапIэхэр къыщызэIуахынущ. ЗэрытраухуэмкIэ, илъэсым и кIэ пщIондэ лэжьэн щIадзэнущ Вольнэ Аулрэ Балъкъэр Ипщэмрэ дащIыхьа сабий садхэм.
Ухуэныгъэхэр зэрырагъэкIуэкIыр, курыт щIэныгъэ щрагъэгъуэт еджапIэхэм иджырей Iэмэпсымэхэмрэ техникэмрэ къызэрыхуащэхур «Жылагъуэр лэжьыгъэкIэ къызэгъэпэщын» къэралпсо проектым ипкъ иткIэщ. Къыхэгъэщын хуейщ щIыналъэхэм щыIэ еджапIэ 29-р зехьэным, я унащхьэм щегъэжьауэ уэздыгъэ кIапсэхэм щыщIэкIыжу зэхъуэкIыным, унэлъащIэхэри зэблэхъуным ехьэлIа лэжьыгъэхэри щIэгъэхуэбжьауэ зэрекIуэкIыр.
ЗэIущIэм и гугъу щащIащ «Спортыр гъащIэм и мардэщ» къэралпсо проектым ипкъ иткIэ бэнэкIэ лIэужьыгъуитхумкIэ дерсхэр щат спорт комплексым епха ухуэныгъэхэр иджыри зэрекIуэкIыр. Апхуэдэу, Налшык къалэм мыл лъэгу IэрыщIыр зытелъ япэ уардэунэр зэрыщащIми, Шэджэмыщхьэ топ джэгупIэ цIыкIуи зэрыщаухуэми зэIущIэм щытепсэлъыхьащ.
ЗэIущIэм и кIэм КъБР-м и Iэтащхьэ КIуэкIуэ Казбек къыхигъэщащ щIыналъэр и зыужьыныгъэкIэ пажэхэм зэрахэтыр, гъуэгуухуэ IэнатIэмкIи ипэ итхэм зэращыщыр. «Шынагъуэншэ икIи фIагъ лъагэ зиIэ гъуэгухэр» лъэпкъ проектым ипкъ иткIэ Къэбэрдей-Балъкъэрым щIыпIэ 70-м гъуэгутелъхьэ Iуэхугъуэхэр щокIуэкI, абы щыщу щIыпIитIым гъуэгухэр щытелъхьэныр 2023 гъэм зэфIэкIыну я гугъэщ. Гъуэгухэр къэрал мардэхэм хуагъэкIуэну, хэгъэгу икIи щIыналъэ мыхьэнэ зиIэ зэпрыкIыпIэхэр, лъагапIэхэр зэрахъуэкIыну, гъуэгу дамыгъэхэр къыхагъэщыну къапэщылъщ. Апхуэдэу лъэс лъагъуэр къыхагъэкIын, светофорхэр тегъэувэн, лъэмыжхэр зэгъэпэщыжын, гъуэгу уэздыгъэ пкъохэр хэтIэн хуейуэ къалэн щыIэщ. Лъэпкъ проектымрэ къэралпсо программэхэмрэ къызэрагъэувымкIэ, хэгъэгу икIи щIыналъэ мыхьэнэ зиIэ, километри 170-рэ зи кIыхьагъ гъуэгухэр тралъхьэн хуейщ.
