Накъыгъэ махуэшхуэхэр къоблагъэ. ЦIыхухэм я нэхъыбэм а зыгъэпсэхугъуэхэм иджыпсту щыщIэдзауэ зыхуагъэхьэзыр. Хэти бгылъэ щIыпIэхэм кIуэуэ зыщиплъыхьыну треухуэ, хэти щыхьэрым дэт нэгузыужьыпIэхэм зыщигъэпсэхуну егъэпс.
НыбжьыщIэхэм Iэмал хъарзынэ яIэщ «Пушкиным и картэ» лIэужьыгъуэр къагъэсэбэпу махуэшхуэхэр дахэу ягъэкIуэну. Фигу къэдгъэкIыжынщи, зи гугъу тщIы «Пушкиным и картэр» УФ-м и Президент Путин Владимир и унафэкIэ къыхалъхьа Iэмалщ - ныбжьыщIэхэм я щэнхабзэ зэхэщIыкIым хэгъэхъуэн икIи зиужьын папщIэ. Абы ипкъ иткIэ зи ныбжьыр илъэс 14-м щегъэжьауэ 22-м нэс щIалэгъуалэм къэралым щекIуэкI хэкупсэ хуэIухуэщIэхэм хыхьэну, театр, макъамэ икIи гъуазджэ IуэхущIапIэхэм щIыхьэну Iэмал яIэщ. Гу лъытапхъэщ картэм илъ ахъшэр музей икIи театр гъэлъэгъуэныгъэхэм, концертхэм фIэкIа нэгъуэщI Iуэхугъуэхэм тебгъэкIуадэ зэрымыхъунур.
Къэралым картэм кърилъхьэ сом мини 3-р 2022 гъэм минитху ищIащ. Апхуэдэу УФ-м и Правительствэм и УнафэщI Мишустин Михаил и Iэ зыщIэлъ Унафэм ипкъ иткIэ, мазаем и 1-м щегъэжьауэ щIалэгъуалэр пщIэншэу здэкIуэ е зыщIыхьэ хъуну щэнхабзэ IуэхущIапIэхэмрэ хэкупсэ Iуэхугъуэхэмрэ нэхъыбэ хъунущ. Псалъэм папщIэ, «Пушкиным и картэмкIэ» театрхэм, музейхэм, концерт гъэлъэгъуапIэхэм къищынэмыщIауэ, кинотеатрхэми укIуэфынущ. УФ-м ЩэнхабзэмкIэ и министерствэр и щIэгъэкъуэну траха кинофильмхэм а картэр къэбгъэсэбэпу уеплъыфынущ. Псори зэгъусэу кинотеатрхэм щагъэлъагъуэ урысей фильмхэм уеплъыным сом минитI тебгъэкIуадэ хъунущ.
«Пушкиным и картэр» зыIэрызыгъэхьэну хуейхэм Iуэхугъуэ зыбжанэ ящIапхъэщ:
1. «Къэрал Iуэхутхьэбзэхэр» интернет утыкум зыщебгъэтхын хуейщ. Апхуэдэ Iэмал иIэщ зи ныбжьыр илъэс 14 ирикъуауэ къэралым зэрицIыхумкIэ щыхьэт тхылъ зрата дэтхэнэми.
2. «ЩэнхабзэмкIэ къэрал Iуэхутхьэбзэхэр» зи фIэщыгъэ программэ гуэдзэнхэр телефоным требгъадзэ хъунущ. Ар къыщыбгъуэтыфынущ AppStore, Google Play, App Gallery телефон программэхэм. Апхуэдэу узыхуэныкъуэну QR-жыпхъэри «Къэрал Iуэхутхьэбзэхэр» интернет утыкум къыщыбгъуэтынущ.
3. Зебгъэтха нэужь, «Пушкиным и картэм» узэрыхуейр къыбогъэлъагъуэ. Ар зыIэрыбгъэхьэжыфынущ Урысейм и Банкым и IуэхущIапIэм, паспортымрэ СНЛС-мрэ ебгъэлъагъумэ.
4. «Пушкиным и картэмкIэ» уздэкIуэну Iуэхугъуэр Урысейм ЩэнхабзэмкIэ и министерствэм и сайтым илъ хъыбарегъащIэм хэтмэ еплъын хуейщ е билет къыщыпщэхукIэ, ар къыщыпщэху IуэхущIапIэр а программэм хэтмэ зэгъэщIэн хуейщ.
«Пушкиным и картэм» и лэжьэкIэр зыубзыху программэм Къэбэрдей-Балъкъэрым и щэнхабзэ IуэхущIапIэ 11 хэтщ: Къэбэрдей-Балъкъэр къэрал Макъамэ театрыр, ЩоджэнцIыкIу Алий и цIэр зезыхьэ Къэбэрдей къэрал драмэ театрыр, Кулиев Къайсын и цIэр зезыхьэ Балъкъэр къэрал драмэ театрыр, Горький Максим и цIэр зезыхьэ Урыс къэрал драмэ театрыр, Къэбэрдей-Балъкъэр къэрал гуащэ театрыр, Къэбэрдей-Балъкъэр лъэпкъ музейр, Сурэт гъуазджэмкIэ Ткаченкэ Андрей и цIэр зезыхьэ къэрал музейр, Темыркъан Борис и цIэр зезыхьэ къэрал филармониер, «Кабардинка», «Балкария», «Тэрч къэзакъхэр» къэфакIуэ гупхэр.